Real arts of Karencitta

CEBU, Philippines — “I don’t want to waste my time. I always make music and think how to revolutionize OPM to the next level”,pulong pa sa   multi-talented nga lumad nga taga-Lorega, Cebu City nga si Karen Ann Cabrera o mas naila na karon sa nagkadaiyang dapit sa kalibutan isip si Karencitta. Nagsaulog karon  sa iyang birthday si Karencitta .  Nailhan siya sa publiko gumikan sa iyang mga pakatok sa Facebook. Miabot og minilyon ang iyang mga viewers ug followers tungod lang sa iyang kamaayo mohimo og content videos nga daghan gyud ang maka-relate. Daghan ang wala masayod nga aduna gyud siya’y dakong pagmahal sa arts ug usa sa iyang gihatagan og prayoridad mao ang musika.

Bata pa lang si Karen, mahiligon na gyud siya sa pagkanta ug pagsayaw. Mao kini ang unang duha ka talento ang nakita sa iyang maguwang nga si Karl Cabrera.

Mahimuot usab maghandum si Karencitta nga samtang manan-aw og TV ang tibuok niya nga pamilya, mobarog gyud siya sa atubangan aron mopakita sa iyang mga talento. Gitag-an gyud sa iyang kinamaguwangan nga igsuon nga si Karl nga mahimo gyud siya nga superstar. Ug wala gyud kini masayop gumikan kay nahitabo na gyud kini karon pinaagi sa online world.

“Akong maguwang, siya gyud ang believer nako sukad nga bata pa ko. Akong parents mao na’y di sa entertainment pero siya kay niingon nako nga “I believe that you’re gonna be a superstar one day”, suma pa niya. Istorya pa ni Karencitta, nagsugod ang iyang career niadtong 4 anyos pa lang siya sa dihang miapil siya sa Little Miss Philippines sa Eat Bulaga sa GMA niadtong 2000 kun diin nakauban niya sila si Aiza Seguerra ug Kim Domingo sa maong kompetisyon. Usa siya sa mga grand finalist ug nakaangkon sa Miss Friendship award. Human sa maong kompetisyon, mipadayon siya sa iyang pagtungha sa Center for International Education gikan sa Grade 1 hangtud sa Senior High.

Bisan og nagtungha pa siya, wala niya hikalimti ang iyang damgo nga mao ang mahimo nga ilado nga singer. Gani, gisudlan niya ang nagkadaiyang mga workshop, training lessons aron madiskubre pa niya ang iyang mga katakus .

“When I was young, gipugos ko pa-enrol sa akong mama og soccer, basketball, badminton, piano lesson, fencing, swimming lesson kay para ma-busy akong utok ug di ko mag-uyab-uyab”, butyag pa ni Karencitta.

Aron mohanas ang iyang pagkanta, gipa-enrol usab siya kaniadto sa Salonga atbang sa Basilica Minore del Santo Niño Church ug mipadayon siya didto sa School of Rock.

Nakauyon pag-ayo si Karencitta sa pag-perform ug nakakita usab siya og gugma sa musika nga lisod na gyud niya nga mabuhian.

Pulong pa niya nga anaa sa iyang sistema ang musika. Ang musika ang nagsilbi nga nipuno sa iyang nagkaguliyang nga kinabuhi. Gani, nakat-on siya sa pagsuwat og kanta.

“Yes, my songs released, I wrote them personally. I write songs based on experience but most of the time, based on observations from my friends, what I see in movies. I write songs from the lessons of others”, pasabot pa niya.

Gawas sa musika, nagdance lessons usab siya sa Abellana kaniadto ug gipadayon niya kini didto sa Dance Millenium didto sa Hollywood sa dihang nakahukom siya nga mopadayon sa iyang pagtungha sa kolehiyo didto sa Los Angeles tungod kay didto na usab  nakabase ang iyang pamilya. Una pa siya nga mitikang didto sa L.A., hinay-hinay una niya nga gibuild-up ang iyang career pinaagi sa pagpahumot sa iyang pangalan.

Nahimo siyang bugtong female emcee sa grand concert ni Abra niadtong 2013 sa Makati Circuit didto sa kauluhan. Gani, human sa maong panghitabo, lakip na usab siya sa ABRA2013 Tour kauban ang mga respetadong artista sa industriya nga sila Loonie, Ron Henley, Mike Swift, J-Hon, Alex O, Rjay Ty, DJ Spnz, ug uban pa. Human sa maong kalampusan, nakahimo siya og mga appearance sa telebisyon. Usa siya sa mga host sa travel show ni Kat De Castro nga ‘Escape’. Lakip usab siya sa MYX Reality TV Show ug 'Starcamp Season 1'. Sa iyang pagtikang didto sa L.A., gipanglantawan niya nga mopadayon ra siya sa iyang pagtungha isip nursing student.

Sa wala damha, mas daghan ang mga oportunidad ang miabot kaniya sukad usab nga misugod na siya og tuon sa “Law of Attraction”. “I have this belief which is the Law of Attraction because I have applied it since 2013. Sukad ato, daghan kaayo og opportunities na nisud nako,” suma pa niya.  Matud pa niya nga nagsagunson na gyud og kaabot ang mga dugay ra niya nga gidamgo kaniadto.

“I dreamt of becoming a recording artist but wala nako gi-expect na I’d become an actress”, suma pa niya. Nibida siya sa usa ka pelikula didto sa Amerika nga “Funny Man” ni Omri Dorani kun diin aduna siya’y hugyaw nga role nga gidala. Matud pa niya nga miagi siya og upat ka audition una niya nakuha ang maong role.

“I went through call backs and had collaborative process kay gihatagan ko og opportunity sa direktor para mopili kinsa na lalaki akong gusto makauban. I felt like that this is real art kay naa koy freedom makabuhat sa akong gusto. Pagbasa nako sa script, naka-realize ko na daghan kaayo kog linya which is good kay for once, makarepresent ko sa atong country kay this is my first actual quality film and now it’s out in Amazon Prime ug mapakita puhon sa Netflix,” saysay pa niya.  Gisaysay niya nga gitabangan gyud siya sa iyang manager kaniadto nga si Ray Hughs aron makasulod sa maong pelikula.

Sa laing bahin, misikat na usab si Karencitta pinaagi sa iyang paghimo og content videos sa Facebook.

Sa iyang Facebook page, hilig gyud siya og himo og music covers. Pipila sa iyang namugna mao ang Rude, Don’t Know Why, Diamonds, Cruisin’ ug uban pa.

Tungod kay naimpluwensiyahan siya sa Vine App, didto siya nagsugod og post sa iyang mga pakatok sa Facebook.

“I started with the Vine App. Then pag 2016, nipatok man ang comedy sa Facebook, mao nga ni-segway ko and mas daghan nako og time to make content sa FB kay mas taas siya. And so, ni build akong followers after I uploaded the video “My Mom Was Like Part 2” last November 2016. That was my first million views for just a short span of time. And then I realized that it’s really actually happening”, asoy pa niya.

Dugang pa niya nga usa sa iyang inspirasyon sa iyang pagbuhat og mga content videos mao ang iyang inahan gumikan kay mao kini ang kanunay niya nga maobserbaran apan gusto siya nga direkta nga mopadayag sa iyang gibati apan dili niya mahimo gumikan kay dili usab siya gusto nga mosukol niini. Mao nga pinaagi sa pagmugna og video, didto niya nga gipabuhagay ang buot niya nga ipadayag.

Karong tuiga, mas naila pa gyud siya tungod sa padayon niya nga pagpakita og pakatok sa Facebook ug mas daghan ang miduol kaniya aron sa pagpakigkolaborasyon niya sa paghimo og comedy videos ug sa paghimo og musika.

“Many noticed me. Message-message pud mi sa comedian nga si Babing sa The Liloan Fun Trip and nag-start na og traffic akong schedule”, suma pa niya.

Sa iyang paglusad sa iyang kanta nga “Fckround”, nakita niya nga magmalampuson siya dinhi sa natad sa musika gumikan kay daghan ang mihangop sa maong awit. “Thank, God! Everything just fell into place.  I think it’s the law of attraction, and I’ve always loved to do pop. Wala gani ko mag-expect nga mo-tap nako si Jon Ingoldsby.  I think that’s something. I’m a firm believer in the law of attraction. It’s fate”, padayag niya.

Naabot sa punto nga nakig-communicate kaniya ang grammy award winner nga si Jon Ingoldsby nga  sound engineer nila ni Madonna, Lana Del Rey ug Elton John.

Matud pa niya nga mipadala si Jon og mensahe kaniya pinaagi sa email apan dugay kini niya natagad.  Nagduha-duha usab siya nga dawaton ang maong imbitasyon kay nagtuo usab siya nga scam kini. Apan gipahimangnoan siya sa iyang amahan nga kitaon lang kini aron masusi og tinuod ba gyud ang maong imbitasyon nga nakasulti sa maong gipadala nga mensahe. “At the meeting, we realized we had the same vision! So yeah! The Jon Ingoldsby is added to my team”, suma pa niya. Karon nga aduna na’y lig-on nga nihupot kaniya, andam na usab niya ipadayon ang iyang tumong nga ipaugmad ang OPM gumikan kay gusto niya nga mas bag-o ug modern na usab ang madungog sa bag-o nga henerasyon.

Giangkon niya nga gisugdan na niya kini pinaagi sa pagmugna og bisaya original music. Matud pa ni Karencitta nga ipadayon na gyud niya ang pagpalambo sa iyang karera ug andam usab siya nga mobalik dinhi sa nasud aron sa paghatag og kalingawan sa mga bisaya.

Jason Kapuso na!

Opisyal na sa Kapuso ang aktor nga si Jason Abalos human siya mipirma og exclusive contract sa GMA Network niadtong Martes .

Giklaro niya nga malinawon ra ang iyang pagpanamilit sa  ABS-CBN.

Suma pa ni Jason nga gusto niya sutaon ang iyang kapalaran sa maong network mao nga nakadesisyon siya nga mobalhin.

Sagubangon niya   kun  unsa pa ang mahimo niya isip aktor o  mahatagan  ba siya og role nga wala mahatag kaniya sa kanhi network.

Salig ra usab si Jason nga ampingan ra usab ang iyang career sa bag-o niya nga mother network sama sa pag-amping niini sa iyang kanhi network.  (BANAT NEWS)