Pag-ayo sa nagubang pampagwapa

CEBU, Philippines — Matud pa sa mga kababayen-an , gasto gyud ang pagpagwapa ilabi na og gikinahanglan kini sa trabaho o sa uban pa nga kinahanglan nga presentable ang dagway.

Ang labing importante nga hiraminta sa pagpagwapa mao ang lipstick.

Ang lipstick usab ang nahimong tinubdan aron adunay kompiyansa ang usa ka babaye sa pagpakig-atubang sa mga tawo tungod kay dili uga ug luspad ang nawong kun anaa kini sa ngabil.

Usahay, dili gyud malikayan nga mahitabo gyud nga maguba kini. Mao nga maguol na usab ka gumikan kay mogasto na usab og palit og bag-o nga lipstick bisan og bag-uhay lang ka nipalit.

Karon, dili na kini angay nga ilabay gumikan kay ang www.makelifelovely.com dunay gisugyot nga mga pamaagi sa pag-ayo sa imong nabuak ug nabali nga lipstick. Dali lang kini buhaton gumikan kay kadiyot lang gyud kini nga mga pamaagi.

Sa nabali nga lipstick:

• Mag-andam lang og lighter o posporo ug kandila.

• Dayon, dagkutan ang kandila.

• Padaganan sa kayo ang nahabilin nga parte sa lipstick nga nagkupot sa base niini. (Angay nga timan-an nga dili kini sunugon pag-ayo ug igo ra gyud kini nga palanayon.

• Itapot ang nakabuwag nga parte sa lipstick ug padaganan na usab og balik ang liki nga parte aron mobalik kini sa orihinal nga porma.

• Kun adunay mosimang nga parte tungod sa pagpadagan sa kayo, limpyuhan lang kini pinaagi sa toothpick.

• Ibutang ang lipstick sa sulod sa refrigerator aron mogahi kini pagbalik.

Aduna usa’y laing pamaagi aron mas limpyo na tan- awon ang nagusbat nga lipstick.

• Ipatong ang nabali nga parte sa lipstick sa babaw sa kutsara.

• Ipatong sa ibabaw sa nagsiga nga kandila ang kutsara ug palanayon kini sa pipila ka minuto.

• Human na kini malanay, mag-andam og lip balm jars o gamay nga butanganan nga mamahimong butangan sa nalanay nga lipstick.

• Ibutang kini sa refrigerator aron mogahi kini.