Gibasura

CEBU, Philippines — Makaginhawa na gyud og tarong ang It’s Showtime host nga si Vhong Navarro gumikan kay gibasura na sa Department of Justice ang kasong rape nga gipasaka ni Denise Cornejo batok kaniya. Kahinumduman nga miulbo kining maong isyu niadtong tulo ka tuig na ang nakalabay.

Present sa ball

Motambong karong tuiga ang mga orihinal nga mga Star Magic babies nga sila si Kristine Hermosa, Heart Evangelista ug Claudine Barreto sa gikahinamang Star Magic Ball. Giingon nga pila ka tuig ang milabay una kini nga mitambong sa maong okasyon.

Nasuya sa classmates

Wala gyud gilimod sa TV host nga si Robi Domingo nga nasuya siya sa iyang mga classmates nga duna nay lisensya sa pagka doctor. “Siyempre may inggit. Kasi, magulang ko doctor, tapos sila… Yung iba pa nga don nangongopya sa akin dati, eh, ngayon doctor na. So, medyo nainggit ako ng slight. Pero iniisip ko, kung sila naka-white coat, ako naka-black coat naman pag Star Magic Ball,” suma pa ni Robi.

Dunay requirements

Strikta si Mommy Ruffa Gutierrez ngadto sa mga suitors sa iyang mga dalagang anak nga si Lorin ug Venice. Matud pa niya nga daghan gyud siya og requirements sa mga suitors niini mao nga dili gyud sayon ang modiskarte sa iyang mga anak.

Likayan nga mahisgutan

Giangkon ni Devon Seron nga gilikayan gyud niya nga maabot ang topic ngadto sa iyang kanhi ka-loveteam nga si James Reid. Matud pa niya nga hangtud karon, gi-bash gihapon siya sa mga fans ni James tungod kay nahimo siya nga kanhi ka-tandem niini. Gusto usab ni Devon nga wala na siya’y daghang istorya pa nga madunggan aron hapsay ang dagan sa iyang karera ug sa karera usab ni James.

Gahuwat og imbitasyon

Willing gyud mokanta si Christian Bautista sa kasal sa iyang ex-girlfriend nga si Rachelle Ann Go ug sa fiancé niini nga si Martin Spies. Matud pa ni Christian nga naghuwat na lang siya og imbitasyon gikan niini ug andam na usab ang awit nga iyang kantahon sa maong selebrasyon.

Mipanawang inahan

Masulub-on karon ang kinabuhi sa Hashtag member nga si Jon Lucas human mitaliwan ang iyang inahan gumikan sa stroke. Matud pa ni Jon nga wala siya magdahum sa maong panghitabo ug nadismaya usab siya sa iyang kaugalingon gumikan kay wala pa gyud niya matuman ang pangandoy nila nga mopalit og kaugalingong balay.

Lisensiyado na ang anak

Usa na ka lisensyadong doktor ang anak ni Jose Manalo nga si Myki Manalo. Niadtong 2012 sa dihang nakuha ni Myki ang iyang degree sa BS Psychology sa De La Salle University Manila ug nahuman usab niya ang iyang Doctor of Medicine sa FEU-NRMF Institute of Medicine niadtong 2016. Karong Hulyo niining tuiga lang niya nakompleto ang iyang post-graduate internship sa De Los Santos Medical Center.

Nakadawat og dress

Nakadawat og customized dress ang Kapuso aktres nga si Heart Evangelista gikan sa sikat nga Fashion Designer nga si Ulyana Sergeenko. Dakong pasalamat ni Heart gumikan kay nakatahi gyud sa tag sa maong sinina ang pangalan nilang duha sa designer.

Daddy na

Usa na gyud ka daddy si Geoff Eigenmann gumikan kay nanganak na kagahapon ang iyang kapikas nga si Maya. Usa ka himsog nga batang babaye ang gihimugso niini ug ginganlan nila kini og Arabelle Simone Eigenmann.