First runner-up Angelica Hale nakapuwesto sa AGT

CEBU, Philippines — Nagmaya ang mga Pinoy    human  napili nga first runner-up  ang Fil-Am nga young singer nga si  Angelica Bolando-Hale sa America’s Got Talent (AGT) Season 12   kagahapon.

Ang napili nga big winner mao ang 12-anyos nga ventriloquist nga si Darci Lynne Farmer.

Una na nga nahugyaw ang kadaghanan sa  performance ni Angelica sa dihang gikanta niya ang  “Symphony” sa  British electronic music group nga Clean Bandit ug nakadawat kini og  standing ovation gikan sa  mga hurado.

Una na nga gibutyag ni Angelica   nga wala niya damha  ang pagka-finalist niya sa maong show ug dakong milagro ang pagkatungtong niya sa AGT finale.

“I’m just so happy just to be here like making it to the finals. No matter what happens on AGT, I will still be a winner and just to make it this far, is an absolute miracle,” saysay pa niini atol sa iyang  Facebook Live session sa miaging adlaw.

Lumad nga taga Iligan City ang inahan ni Angelica nga si Eva Bolando-Hale . 

Sarah ug Alden  motikang sa Sugbo

Mohatag og kalingawan  sa mga Sugbuanon   ang endorsers sa Cebuana Lhuillier  nga sila si Sarah Geronimo  ug Alden Richards  diha sa Hoops Dome  sa Lapu-Lapu City.

Ang maong special concert mahitabo unya  September 22  sa alas 7 sa gabii.

Mao kini ang usa sa mga nagsilbing kasaulogan  sa 30th anniversary  sa Cebuana Lhuillier  hinungdan nga gidala gyud nila dinhi sa Sugbo ang big stars.

Mao kini ang ilang pamaagi sa pagpasalamat sa tanang  suki sa Cebuana Lhuillier.

Nagikan  si Sarah sa ABS-CBN, samtang talent usab sa GMA-7 si  Alden.

Makauban sa duha sa pagtikang nila dinhi sa Sugbo mao sila si   Erik Santos, Rey Valera  G-Force, Pop Girls,  Nitro, Manouvers , Julian Trono ug Ella Cruz.

Duna pud sila’y giandam nga surprisa nga mga  guests  busa  naputos sa mga kalingawan ang mahitabo karong gabii.

Reaksyon gipangandaman

Tsika pa ni  Bela Padilla inga  giandam na niya ang iyang kaugalingon sa mga mahimong reaksyon sa pelikula nila ni  Piolo Pascual ug Toni Gonzaga   sa  Star Cinema nga  “Last Night.”  Nasayran nga si Bela maoy nagsuwat sa script sa maong pelikula. “I don’t mind senseless bashing. Constructive criticism, I will accept all of it. Kapag senseless bashing, medyo wala siya sa list ng kailangan kong pagtuunan ng pansin,” matud pa niya.

Marco pasok sa banga

Malakip si Marco Gumabao  sa upcoming movie sa Viva nga pagabidahan nila ni James Reid ug Nadine Lustre.  Matud pa nga siya maoy third  wheel sa JaDine sa nahisgotang pelikula. Bag-ohay lang  nipirma si Marco sa Viva human kini  nibiya sa Star Magic.

Gikasab-an sa direktor

Giangkon ni  Ken Chan nga duna’y mga higayon kaniadto nga ganahan na siya moundang sa showbiz  human siya  gikasab-an  og maayo sa usa ka direktor. Dili ibutyag ni Ken ang pangalan niini isip respito sa maong direktor. Suma pa sa aktor nga usa kini sa mga instrumento aron makat-on siya sa iyang  mga  sayop.

Fun date

Nag-date  sa miaging adlaw  sila si  Kim Chiu ug  Xian Lim sa Subic. Kahinumdoman nga nahilom na ang ilang tandem sa TV screen  gumikan kay gi-partner na sila og laing mga artista.

Nakalarga na gyud

Nadayon na gyud ang paglarga ni Robin Padilla paingon sa China.  Kahinumdoman nga gipugngan siya kaniadto nga makalarga sa maong dapit sa pasangil nga duna siya’y  “hold departure order” nga gipahamtang sa  Bureau of Immigration  batok kaniya apan hugtanon kini nga gihimakak sa maong ahensya.

Morampa na

Molarga na karong  Oktubre  sa  Tokyo, Japan   ang beauty queen nga si Mariel de Leon alang sa pagsikad sa   Miss International pageant 2017.

"I'm really happy. Kasi it will be nice to see familiar faces in the crowd especially in a foreign country,"suma  pa ni Mariel.

Uso pa ang harana

Matawag nga uso gihapon  karong panahona ang "harana" ug mao kini ang gibuhat ni John Prats sa iyang asawa nga si Isabel Oli sa miaging gabii.  Gikanta ni John ang OPM hit nga "Torete."  Nasurprisa pag-ayo si Isabel sa gibuhat sa iyang bana.

Humble gihapon

Gipasalig sa komedyanteng aktor nga si Empoy Marquez nga magpabilin siya nga mapaubsanon bisan pa man sa istado sa iyang career karon. Nasayran nga inilog si Empoy karong panahona human nagmalampuson ang pelikula nila ni Alessandra de Rossi nga Kita Kita.  Suma pa sa aktor nga dili gyud mausab ang iyang batasan.

LDR

Masuwayan gyud sa magtiayong  Rufa Mae Quinto ug Trev Magallanes, ang  long-distance relationship.  Suma pa ni Rufa Mae nga mobalik siya sa showbiz, samtang naka-base sa Amerika ang trabaho sa iyang bana.

Nangala

Nagkatawang gibutyag sa nagsabak nga aktres nga si Sarah Lahbati nga nangala siya  permi  og   dimsum ug corn soup.   Gikatakdang manganak si Sarah sa ikaduhang anak nila ni Richard Guttierez karong April 2018. (BANAT NEWS)