Banat ( Leaderboard Top ), pagematch: 1, sectionmatch: 1

“I Found My Heart in Santa Fe” gihugupan

CEBU, Philippines — Paraiso  nga makahatag og katagbawan sa  mga tawong gusto mo-relax. Mao kini ang nagpahipi  nga hiyas  sa   Santa Fe, Cebu  nga maoy lokasyon  sa tanang eksena sa pelikula nila ni Roxanne Barcelo ug Will Devaughn   nga “I Found My Heart in Santa Fe”.

Istorya kini sa lalaki nga  nitikang sa Sta. Fe  aron pangitaon  ang  iyang inahan nga usa sa mga espesyal nga tawo sa iyang kinabuhi, ug sa wala damha,  iyaha usab  nga makit-an ang tawong mopapitik sa iyang kasing-kasing  hinungdan nga dili gyud niya malimtan ang maong lungsod.

Ang babaye nga nakapapitik sa iyang kasingkasing mao ang tawo nga heartbroken human kini wala tungaha sa lalaki sa adlaw sa ilang  kasal.

Gibahaan sa mga tawo  ang red carpet premiere sa maong pelikula sa SM City-Cebu niadtong Domingo sa hapon. Nibarog usab nga co-producers sa maong pelikula sila si Roxanne ug Will .

Gawas sa duha ka bida,  puros  taga Sante Fe ang ilang co-stars  ug gipasigarbo sa direktor niini nga si Bona Fajardo nga  duna gyu’y katakos sa pag-arte ang mga tawo sa maong dapit.

Matud pa ni Direk Fajardo nga upat ka tuig na nga anaa kaniya ang istorya sa maong pelikula ug nakakita na gyud siya og  “right timing”. Semana Santa karong tuiga gihimo ang maong movie.

Matud pa ni Direk Bona nga swak gyud kaayo sila si Will ug Roxanne alang sa maong proyekto ug wala gyud siya kahuna-huna og laing artista nga maoy modala niini.

“Sila talaga ang nasa sa isip ko, seguro alam nating lahat na meron silang relasyon sa totoong buhay, isang challenge para sa kanila na gawin ang nasabing pelikula,” suma pa niya.

Dakong garbo alang sa direktor nga na-realize ang maong proyekto  ug nagbunga gyud ang kahago sa iyang researchers ug writers sa pagpangita og lugar nga matawag og paraiso.

"It has been so organic working with them, with God's grace, the shoot really went very well," ang direktor nagkanayon.

Mapasalamaton usab  siya sa amahan  sa Santa Fe nga si  Mayor Jose  Esgana  gumikan sa kooperasyon niini sa maong proyekto.

Si Mayor Esgana sa iyang bahin,  nilenggua kini nga  nataypan gyud niya ang dagan sa istorya sa  “I Found My Heart in Santa Fe” ug nisamot pa gyud nga sa iyang dapit gyud gibuhat ang tanang eksena niini.

Matud pa niya nga  dako  gyud og tabang  ang maong pelikula  sa pagpalambo  sa  turismo sa ilang lugar.

“Nindot kaayo ang movie,  love sad kaayo nako ang title,  makita gyud nimo nga nindot gyud suroyan ang Sta. Fe,” matud pa sa mayor.

Ang usa sa bida niini nga si Roxanne nibutyag ngadto sa mga sakop sa E-Group  nga  dili gyud lisod katrabaho ang taga Santa Fe  gumikan kay dali ra kaayo kini makakuha sa ilang mga eksena.

“Ang galing nila, mababait   at saya nila kasama,  isang malaking bagay para sa amin  na  napunta kami sa isang magandang lugar (Sta. Fe), “ matud pa ni Roxanne.

Gipasigarbo usab ni Roxanne ang usa sa mga mensahe sa maong pelikula kalabot sa gugma.

"Sa movie na ito, I’ve learned na dapat sa pag-ibig, you have to be patient. Hindi natin dapat ipilit ang ating sarili sa mga taong ayaw sa atin. Ika nga, love is really worth the wait, “dugang pa sa aktres.

Gisaad usab ni Roxanne nga mobalik gyud siya sa Santa Fe gumikan kay nataypan gyud niya ang maong lugar aron mo-relax. Dugang pa niya nga  dili gyud kabayran ang ilang kasinatian sa maong dapit.

“Marami kang ma-discover kung pupunta ka Santa Fe, hindi kailangan ng itinerary, punta ka lang dun, and mag-enjoy,” matud pa niya.

Si Will sa iyang bahin,  nipadayag kini nga  dili jud basta-basta nga makauban  ang iyang hinigugma sa  usa ka proyekto.

Magsilbi usab niya kini nga major movie project gumikan kay mao kini ang labing una nga higayon nga nahimo siyang bida sa pelikula.

“Sobrang positive yung energy namin sa shooting , ang ganda din ng Santa Fe, talagang balik-balikan mo, “matud pa ni Will.

Mitambong usab sa red carpet premiere  si  Cebu  Vice Governor Agnes Magpale ug dako ang iyang  kalipay nga  natawo ang maong  klaseng pelikula nga  nag- promote sa kanindot sa usa sa mga lugar nga nabantog sa amihanang bahin sa Sugbo.

"It promotes Cebu in a wholesome manner. What a "feel so good" movie," matud pa ni Magpale.

Nasayran nga full force usab nga suporta ang gigahin sa LGU Santa Fe alang niining movie.

Dili sab malimtan sa mga bida niini mao ang higayun sa pagsud-ong nila sa Kinatarcan, usa sa mga isla sa Santa Fe diin gihulagway kini nila nga virgin island nga usa sa hugyaw nga lugar sa maong dapit. (BANAT NEWS)

  • Follow Us: