“Magbuwag Ta Kay” Movie ni Medyo Maldito, karong Enero na

CEBU, Philippines — Karong umaabot nga Enero 2018 na gyud ipasalida ang gikahinamang lilas sa kinaham ninyo nga hugutero nga si Rowell Ucat o Medyo Maldito kauban ang kanhi  Star Power finalist nga si Akiko Solon.

Human sa malampusong paglusad niini niadtong Hulyo, daghan ang nagpangutana kun unsa ang nagpahipi sa tulo ka letra nga adunay kahibulungan nga kahulugan.

Nalingaw usab og panag-an ang solid fans ni Medyo Maldito kon unsa gyud ang nagpaluyo sa tulo lang kabuok nga letra.

Ni’ng pagbukas sa Septiyembre lang niining tuiga, gisugat ang SM City Cebu Event Centre og kahugyaw sa mga nibida sa pelikula ug didto na gibutyag na usab ang buot pasabot sa #MTK nga mao ang “Magbuwag Ta Kay”.

Opisyal na nga gianunsyo ang titulo, apan aduna gihapo’y dili matubag nga pangutana kun ngano mao kini ang nahimong titulo.

“Mao nana ang angay nila na atngan kay they already knew what the title is, just the story kay ipakita na puhon gyud”, suma pa ni Akiko.

Misamot usab og kahugyaw ang maong kalihukan sa dihang minaog sa escalator si Medyo Maldito samtang nagkanta ang iyang ka-loveteam nga si Akiko sa awit nga lakip usab sa pelikula nga “Unta Ikaw Nalang” nga sinuwat ug ginama ni Niño James Banares.

“Na-shock ko kay late siya, abi nako na di na gyud siya kaabot pero diay naa diay siya’y surprise”, suma pa ni Akiko.

Gani, dili lang ang sa titulo sa pelikula ang gibutyag niadtong higayona, lakip  usab ang mga portraits sa mga bida nga kinuha sa nabantog nga photographer nga si Herry Ahn.

Gani, wala usab gipaulahi og pagpakita sa trailer sa maong pelikula.

Matud pa ni Medyo Maldito nga ang istorya musubay sa kun unsa ang dagan sa iyang kinabuhi ug aduna usab kini kalabutan sa relasyon sa laing binuhat, sa pamilya ug sa mga higala.

Gipasigarbo usab sa executive producer nga si Sunshine Lim nga ang maong pelikula aduna pu’y ipakita nga mga maanindot na dapit dinhi sa Sugbo nga mamahimong kasuruyan sa mga tawo.

Ang “Magbuwag Ta Kay” ubos  sa direksyon ni RJ Aquino ug Janice Perez nga sinuwat sa singer-songwriter nga si Therese Marie Villarante ug music producer nga si Jude Gitamondoc.

Starring ang mga Cebuano talents nga sila si Professor Ligaya Rabago, Dante Luzon, Rio Delizo, Snake Princess, Denise Tan ug Alem Garcia, ug uban pa.

Wala usab gitago ni Akiko ang iyang paghinam-hinam sa umaabot pa nila nga kasikas sa pag-promote sa ilang pelikula .

Gipadayag usab niya nga puno gyud sa pagmahal ang iyang paghubit sa karakter isip si Kay, ang uyab ni Roy (Medyo Maldito).

“Ang akong ganahan sa film is hopefully to show millennials, or anyone who finds it difficult surviving life nga dili sad hadlang ang lovelife sa pag-pursue sa passion sa kinabuhi,” esplikar pa niya.

Gidapit usab ni Akiko ang tanan nga suportahan sila ni Medyo Maldito sa ilang panag-uban sa Magbuwag Ta Kay”.

“I’m calling on Cebuanos to please support ‘Magbuwag Ta Kay’ kay lingaw gyud ni siya na movie unya maka-relate sab mo . Tungod sab kay Bisaya ni. Atoa ni. Mao nga ato gyud ika-proud ang Bisaya Films!”, panapos pa  ni Akiko. (BANAT NEWS)