SPOTLIGHT: The truth behind the brushes

CEBU, Philippines - Hugyaw gyud ang nahimong Banat News FB Live Session sa miaging semana gumikan kay ang Rayna sa ChikachikaChurva ug nagpauso sa “Are We Live?”nga si Wenwen Zaspa ang gikahinabi sa Banat News Hugyaw editor  nga si Ryan Mark  sa usa sa mga #MARKado session.

Ang paglugwa ni Wenwen sa maong live session tipik lang sa kasaulugan sa ika-23 ka tuig nga kasumaran sa Banat News ug gani, mao usab kini ang ikaduhang higayon nga matuki ang istorya sa iyang kinabuhi.

Si Wenwen, naila sa kadaghanan isip usa ka mapuanguron ug malipayong tawo. Naila usab siya isip usa sa mga banggiitan nga make-up artist dinhi sa nasud. Pipila sa iyang mga napagwapahan mao  sila si Kris Tiffany Janson, Crystal Aberasturi, Sheryn Regis, Kristine Hermosa ug ang nahimong Queen Philippines 2017 Samantha Dodson.

Gipanganak siya sa Davao Oriental ug nagtubo sa Surigao City. Giangkon niya nga nagtubo siya sa kapobrehon.

“Tricycle driver akong papa ug akong mama kay naa sa balay. Sakto lang akong kinabuhi didto. Igo ra ka makakaon sa usa ka adlaw pero dili nimo mapalit ang unsa ang imong gusto”, siya nagkanayon.

Siya ang usa sa kinamaguwangan sa pito nila nga managsuon gumikan kay aduna siya’y kaluha nga si Alvin.

“Identical twins gyud mi. Baby pa mi, akong mama di gyud makaila namo. Ang kaning something sa akong dunggan mao ra  ni ang ilhanan  nga ako ni. Naa mi pictures nga kami gyu’ng duha sa akong kaluha, asta ko, dili ko kaila og asa ko ato. Bisan karon, identical gyud mi, the way mi mo-istorya and everything”, saysay pa niya

Apan bisan og managsama gyud sila og panagway, gibutyag niya nga managlahi sila og sekswalidad tungod kay lalaki gyud nga straight ang iyang kaluha,  samtang siya matawag gyud  nga usa ka “special creation”.

Una nga nahibaw-an ni Wenwen nga usa siya ka special creation o lahi og sekswalidad sa dihang nagsilbi siya isip altar boy.

Matud pa niya nga nahimo siya nga usa ka altar boy kaniadto sa dihang nagtungtong pa siya og Grade 5 gumikan kay aduna sila’y kapilya kilid sa ilang balay.

“Ang relihiyon sa akong papa kay Filipinista, then usa ko sa altar boy. Then bisan katong altar boy ko, ma-crush man gyud hinuon ko (og laki).”

Giangkon usab ni Wenwen nga sama sa mga tipikal nga mga bata, makigduwa usab siya og mga babaye apan makigduwa usab siya og mga lalaki tungod kay aduna siya’y kaluha.

Apan kun maabot na sa punto nga sungugon na siya, dili gyud siya magduha-duha nga baslan kini aron makat-on ug makahibaw nga dili siya klase nga bata nga magpadaog-daog lang.

“Musukol gyud ko. Di gyud ko magpaalkansi. Naa man gali moadto sa balay nga naa nay plaster ang mata kay gi bully ko. Laki to ha pero wa gyud ko paalkansi”, saysay pa niya.

Sa laing bahin, istorya pa ni Wenwen nga nagsugod ang iyang career sa dihang ni-graduate siya og high school. Matud pa niya nga bakasyon pa lang niadtong 1995, nibisita siya dinhi sa Cebu sa iyang iyaan nga si Tita Maluz kinsa igsuon sa iyang amahan.

“Sa una, magsuroy-suroy gyud mi sa mga bayot ,unya mag-istambay dayon mi sa parlor sa Fatima. Unya nakat-on ra pud ko og manicure eventually dayon mobalik ko’g tambay didto kay mangapply ko”, asoy pa niya.

Niistar siya dinhi sa Cebu aron motungha ubos sa pagsuporta sa iyang iyaan. Bisan og nagtungha siya sa Cebu Institute of Technology sa kurso nga Computer Science kaniadto, nakahigayon pa gyud siya sa pagpangraket didto sa parlor nga gidumala ni Torib sa Fatima nga naila kaniadto isip Hair Whiz.

Tsika pa niya nga nakauyon gyud si Torib sa iyang kakugihan sa trabaho. Matud pa niya nga sayo gyud siya mo-duty ug siya gyud ang mohikutar og pagpanglimyo ug mohuwat og mga customer. Manicure lang una ang iyang expertise niadtong tungura.

Sa gidugayon na niya sa maong parlor, nakahukom siya nga magkat-on og tupi aron mas modaghan ang iyang kwarta.

Tungod usab nga sa iyang mga higala nga mga bayot nga kusog usab nga moraket og make-up sa mismong parlor, nakahukom usab siya nga sudlon ang maong linya. Apan una pa siya nga nahimong usa ka make-up artist, nahimo usab siya nga mga yaya sa iyang mga higala nga mga make-up artist nga adunay mga kandidata sa mga  beauty pageant .

Buwan lang ang nakalabay sa iyang pagka-yaya, siya na gyud mismo ang nagda og mga manok sa mga beauty pageant. Wala pa kaayo siya’y mga kahimanan, mao nga manghuwam una siya sa iyang mga higala hangtod sa nakapalit na gyud siya og personal nga mga hiraminta.

Tungod sa iyang determinasyon ug kaagresibo nga makat-on sa maong natad, miapil siya og usa ka make-up competition ug nalangkat gyud niya ang korona sa ikaduhang tuig na niya nga pag-apil.

“First time ko niapil kay ang nakadaog sa category nga akong giapilan kay si Jonas Borces pero nag-aim ko sa bridal category, didto ko nakadaog”, suma pa niya.

Sa pagsulod niya sa fashion industry, dili gyud malikayan ang diskriminasyon ug ubos nga pagtan-aw gikan sa mga tang-an. Matud pa niya nga dili na lamang niya panumbalingon ang mga istorya ug ipalusot kini sa pikas dunggan gumikan kay ang malampusong tawo, magsugod gyud sa labing ubos.

Ug karon nga hingpit na gyud niya nga naangkon ang wala damha nga damgo, misuway na usab siya og pagpangita sa iyang kalipay nga mao ang makigrelasyon. Milungtad kini og lima ka tuig.

Dili na usab gusto ni Wenwen nga mahibalik kadto ang maong kagahapon gumikan kay nakita niya nga usik kini sa panahon, apan wala siya magmahay gumikan kay nasuwayan ug nasuta niya kon kinsa siya isip usa ka lover.

“Desente sab gud kon ma-inlove. If you are in love, you are insecure and selfish mao nga di na lang ko kay mahadlok na sab ko. Pero naa ko’y crush karon pero ako lang gyud butangan og boundary kay para dili ma-exaggerate ang feelings ug usa sab kay I have to limit myself ”, pasabot pa niya.

Sa mga kaagi nga nahiaguman ni Wenwen sa iyang kinabuhi, wala pa gihapon niya hikalimti ang mga tawo nga nanginahanglan sa iyang tabang. Mao nga pipila na sa mga  personalidad nga sila si Farrah ug si anhing Chikita ang pipila lang sa iyang mga natabangan.

 “Wala usab na nako gihunahuna  nga that is my responsibility pero nagsugod lang gyud to sa akong kaugalingon kanang dili gyud ko makonsensiya kon ako sila nga pasagdan kay in the first place, ako man ang nay connections sa ilang mga kinahanglanon. Mao nga I have to provide sa akong makaya”, padayag  pa niya.

Mao nga kun aduna siya’y mga matabangan nga mga tawo ilabi na usab sa mga mapagwapahan niya sa mga events sama  sa mga kasal, malipay usab ang iyang kasingkasing ug pamati kon makita niya nga nalipay ug kontento kini sa iyang serbisyo.

“Lami sa feeling oy nga nay moingon nga best  make-up artist kay sa karon man gud nga panahon, dili man gud ka maingon sa imong kaugalingon nga maayo ko. I let other people to rate me. Kon imong isud sa imong ulo kon unsa ang imong na-achieve, hydrocephalus gyud ang resulta ana. Naa kay utlanan ana nga dili ka mabuhi sa industry”, pasabot niya.

Isip panapos sa maong live session, mipaambit pa gyud og mahinungdanong mensahe alang sa tanan.

“Destiny is a matter of chance. Kon responsible gyud ka sa imong work, naa gyud kay kapaingnan.  Trabaho lang gyud mo with a heart and don’t stop learning. Be responsible tanan sa inyong mga appointments and maintain good attitude… being punctual, hardworking and be able to deal with people, apil nana sa attitude”, panapos pa  ni Wenwen. (BANAT NEWS)