Pambato sa mga Sugbuanon!

CEBU, Philippines - Nag-inusarang Cebuano film sa labing una nga Pista ng Pelikulang Pilipino, ug mohatod sa  istorya kabahin sa pamilya uban sa makahilak ug kataw-anan nga mga eksena. Mao kini idalit sa pelikulang Patay Na Si Hesus.

Ubos kini sa direksyon ni Victor Villanueva ug kasagaran sa mga eksena gihimo sa nagkadaiyang dapit sa Sugbo, aduna puy didto sa Dumaguete City.

   Ang mga bituon niini naglangkob sa award winning actress nga si Jaclyn Jose ug ang mga Sugbuanon nga sila si Chai Fonacier, Joe Melde Montanez, Angelina Kanapi ug Vincent Viado.

  Atol sa presscon sa maong pelikula nga gidumala sa JSP Ads and Promo ni Ms. Josie Pereyra, gibutyag ni Joe nga  siguradong malingaw gyud ang mga tawo nga motan-aw niini.

  “Dili gyud magmahay ang mga tawo nga motan-aw niini, kay nindot gyud ang dagan sa story,” suma pa ni Joe.

Maghisgot kini sa sitwasyon sa usa ka pamilya nga nag-uban sa panahon sa kalipay ug nag-agi usab og mga pagsulay.

Matud pa ni Joe nga dakong hagit alang kaniya nga malakip sa usa ka pelikula gumikan kay mao kini ang labing una nga higayon nga nisuway siya sa pag-arte.

 Naa ra gyud unta satechnical side ang iyang kaalam apan gidawat niya ang maong hagit nga moatubang sa kamera.

 “Medyo nakulbaan ko gamay pag-una, pero gipaagi gyud mi og workshop sa among direktor maong nakat-on gyud mi, “nagkanayon si Joe.

 Dali ra usab siya nakahilak sa dihang gibuhat ang pipila ka mga eksena gumikan kaymakatakod gyud ang ka maayo ni Jaclyn.

“ Kon katupad na nimo si Ms. Jaclyn, dali ra jud ka madala sa mga eksena nga duna’y hilak-hilak. Makatakod gyud siya, nindot kaayo siya ikauban , “ dugang pa ni Joe.

 Kahinumdoman nga nakalangkat og Audience Award and Gender Sensitivity Award angPatay Na Si Hesus sa QCinema International Film Festival. Nahimo usab kini nga paborito sa Frameline International Film Festival didto sa San Francisco, California.

Sila si Bianca Balbuena ug Moira Lang pinaagi sa T-Rex Productions ang nagpaluyo sa maong pelikula.

Ang laing bituon niini nga si Chai nibutyag nga nagtangag og maanindot nga pagtulun-anang maong pelikula.

“ Bisan sa unsa nga sitwasyon, naagyud na ang atong pamilya, sa kaguol ug kalipay makauban gyud na nato ang atong pamilya. Ato gyud ni nga suportahan ang Patay Na Si Hesuskay mao ra ni ang Cebuano film sa Pista ng Pelikulang Pilipino,” nagkanayon si Chai.

Matud pa ni Chai nga importante kaayo ang suporta sa mga Sugbuanon sa maong pelikula gumikan nagpakita kini nga dili basta-basta ang mga Sugbuanon kon mogama kini og pelikula.

 Ang istorya niini nagbase sa kinabuhi sa writer sa maong pelikula nga si Fatrick Tabada nga usa pud ka Sugbuanon.

Sa pakighinabi ni Fatrick dinhi sa Banat News Hugyaw, gibutyag niini nga dako ang iyang kalipay nga nalakip sa Pista ng Pelikulang Pilipino ang iyang sinuwat.

 Usa sa inspirasyon ni Fatrick mao ang iyang inahan nga maoy nag-inusara nga nagbuhi kaniya ug sa iyang mga igsuon.

 “Promise nako sa moviegoers, magsige ra gyud mo og katawa kon makakita mo sa film ,” suma pa ni Fatrick.

 Dakong garbo alang kang Fatrick nga nakauban niya sa trabahosi Jaclyn ngabanggiitan na kaayo sa natad sa pag-arte.

 Target ni Fatrick nga mosuwat pa og dugang mga pelikula nga makahatag og inspirasyon sa mga tawo.

Ang Pista ng Pelikulang Pilipino mosikad karong August 16-22, ug usasa naningkamotniini mao ang Film Development Council of the Philippines (FDCP) nga gipangulohan ni Liza Diño-Seguerra. (FREEMAN)