Jake Zyrus na si Charice!

CEBU, Philippines - Kapin sa usa ka buwan  human nagkabuwag sila ni Alyssa Quijano,   hingpit na nga giusab ni  Charice ang iyang screen name ngadto sa  Jake Zyrus.

Giusab na pud niya ang username sa iyang mga social media account.

“From the bottom of my heart, thank you for the love and respect. I love you back and I'm sending peace to everyone,” suma pa sa singer.

 Niadtong June 2, maoy ikaupat na nga tuig sukad siya niangkon sa iyang pagkatomboy.

Kahinumdoman nga niangkon si Charice sa iyang  sexual preference sa usa ka  exclusive interview ni  Boy Abunda sa  "The Buzz"  niadtong 2013.

Sue  ug Loisa nagkasumpaki?

Bugnaw matud pa ang pagtinagdanay nila ni Loisa Andalio ug  Sue Ramirez   gumikan sa personal nga problema.

Wala na modetalye ang duha ka kampo  kalabot sa maong taho apan duna’y mga nagduda nga si Ronnie Alonte maoy rason niini.

Giingong nagsugod  kini sa dihang na-link si Sue kang Ronnie nga gidungog nga uyab karon ni Loisa.

Nabantayan usab  nga gi- unfollow na ni Loisa si Sue sa Instragram. Apan ang best friend ni Loisa nga si Maris Racal nagkanayon nga hagbay ra naka-move on ang duha ka kampo busa dili na kini angayan hisgotan. 

Gil nakulbaan sa kissing scene

Giangkon ni  Gil Cuerva nga gikulbaan gyud siya og maayo sa dihang gihimo ang kissing scene nila ni Jennylyn Mercado sa My Love From The Star.

Matud pa niya nga iyaha gyud kini nga gipangandaman ilabi na nga dili siya anad sa maong eksena.

"Toothbrush, mouthwash, 'wag muna kumain. Kailangan gising, kailangan fresh, kailangan guwapo. Kaya ayon,  nagpaguwapo talaga," tsika pa niya ngadto sa GMA News.

La Luna, daog balig 2.8%!

Hingpit na nga nilugwa ang pantaserye sa ABS-CBN nga gikahinaman sa mga fans sa KathNiel, ang La Luna Sangre.

Gisalida kini sa primetime sugod niadtong Lunes sa gabii, diin gipakita sila si Angel Locsin (Lia) ug John Lloyd Cruz (Mateo) nga nanimuyo nga simple ug wala nay mga gahom kauban sa ilang anak nga si Malia.

Giadto sila ni Baristo (Joross Gamboa) nga nigawas isip lobo, ug gipahibawo nga kinahanglan nilang duha nga mubalik isip pangulo sa La Liga Unida, ang kahugpungan gumikan kay nahulga ang siguridad sa mga sakop niini gumikan sa bag-ong grupo nga gituohang gipangulohan og bampira.

Apan nibalibad ang duruha, hangtud nga hingpit na gayud nga nawagtang ang ilang gahom atol sa pagtakdol sa buwan.

Gipakita sab si Richard Gutierrez isip pangulo sa mga bampira nga si Sandrino.

Samtang suma pa sa NUTAM rating sa AGB ug gimantala sa www.pep.ph, daog ang maong pantaserye sa ABS-CBN batok sa kaatbang niini nga Pinoy adaptation sa Korean series nga My Love From The Star sa GMA7 nga gibituonan ni Jennylyn Mercado.

Nakalabaw ang La Luna Sangre balig 2.8 % human kini nitala og 11.5%, batok sa 8.7% MLFTS.

Nilugwa og kalit

Gisurpresa  si  Sarah Lahbati sa  iyang boyfriend  nga si Richard Gutierrez sa  premiere night sa iyang pelikula nga  “Ang Pagsanib Kay Leah dela Cruz” niadtong Lunes.  Nagtoo si Sarah nga dili makatikang si Richard sa maong kalihokan sanglit natayming man kini  sa pilot episode sa pantaseryeng La Luna Sangre busa nakugang siya sa presensya sa aktor kinsa nagdala usab og buwak alang kaniya.

Pahimangno ni Nadine

Pahimangno ni Nadine Lustre ngadto sa iyang mga kritiko nga dili damayon ang iyang mga higala.  Matud pa niya nga dili gyud niya lung-an ang mga tawo nga moatake sa iyang mga higala. Okay ra ni Nadine kon siya lang ang  sawayon.

Gikapoy sa social media

Giklaro ni Xian Lim nga  magpabilin siya sa showbiz  ug  sa social media ra siya   mopahuway . Nasayran nga nakugang ang iyang fans sa dihang ni-post siya sa Instagram og  “Goodbye  for now.”    Tsika pa ni Xian nga duna lang gyu’y oras nga ganahan siya og hilom.  “Minsan kailangan natin maging alone lang sa thoughts natin dahil doon tayo mas nagiging creative. Mas doon tayo nakakapag-isip. ‘Yung lang ‘yung story behind that,” pasabot pa sa aktor.

Recording artist na gyud

Gi-release na sa  Star Music ang  official lyric video sa debut single ni  Maymay Entrata nga  "Toinks."  Matud pa ni  Maymay nga wala gyud damha nga mahimo siya nga recording artist.

Pokwang mopahuway sa trabaho

Temporaryong mopahuway sa trabaho ang 44 anyos nga komedyanteng aktres nga si Pokwang gumikan kay talandogon ang iyang pagmabdos.  Nasayran nga  ubay-ubay pa unta ang nakalinya nga proyekto ni Pokwang karong tuiga apan gikinahanglan gyud niya  ang saktong pahuway.

Suportado sa pamilya

Gibutyag ni  Shaina Magdayao nga todo suporta ang iyang tibuok pamilya ngadto kang Vina Morales  human napakyas ang relasyon niini ngadto kang  Marc Lambert sa miaging buwan.  Nagmalaumon ang aktres nga maabot ra gyud ang “Mr. Right” ni Vina sa saktong panahon.

Edgar mobalik sa GMA

Balik-Kapuso ang kanhi  Mr. Pogi winner nga si Edgar Allan Guzman. Malakip ang aktor sa upcoming series sa GMA nga My Korean Jagiya  ug makauban niya si Heart Evangelista.

Laing estilo na pud

Nasuta  ni  Darren Espanto  nga duna pa siya’y  ubay-ubay nga estilo sa pagkanta ug dili lang  siya kutob sa pagbirit. Dinhi masukod ang iyang abilidad sa pagkanta. "Kaya ko pa lang hindi masyadong bumirit,” suma pa ni Darren.

Wala’y mahims

Nadawat na ni Mikael Daez ang kamatuoran nga duna gyu'y higayon nga usahay na lang sila magkita sa iyang uyab nga si  Megan Young  ilabi na kung magsugod na kini sa Hollywood project niini.  Suma pa ni Mikael nga suportado niya ang  mga butang nga ikalipay sa iyang girlfriend.

Ipasalida og balik

Tungod sa daghang hangyo,  ipasalida og balik  ang serye nila ni James Reid ug Nadine Lustre  nga On The Wings of Love.  Apan niining higayona, ipasalida kini sa cable channel nga  Jeepney TV.  (BANAT NEWS)