Pahimangno sa kadalanan

CEBU, Philippines - Matag adlaw, naandan na nato nga kanunay gyud kita mobiyahe padulong sa atong trabahuan, tunghaan o sa mga lugar nga buot natong padulngan.

Kasagaran kanato, magbagulbol gumikan kay dugay maabot sa lugar nga buot adtuon tungod sa kahinay sa dagan sa mga sakyanan.

Karon nga kanunay nga huot ang atong kadalanan, kasagaran sa atong mga motorista, mangita gyud og paagi aron lang makaipsot sa kabug-at sa dagan sa trapiko.

Gani, usa usab sa dakong rason kun nganong bug-at ang dagan sa trapiko mao ang pagka wala'y alamag sa publiko asa dapit ang angayan nga mosakay og mga sakyanan ilabi na sa pampaseheroan nga mga sakyanan.

Angayan nga hinumduman  ang  mga pahimangno nga namantala sa  www.medicardphils.com aron makatabang sa pagpagaan sa dagan sa trapiko ug aron usab nga makalikay sa mga disgrasya.

Kung adunay kaugalingong sakyanan, kinahanglan nga siguraduhon nga sakto pa sa gasolina, tubig ug ang brake fluid. Kinahanglang inspeksyunon usab ang mga ligid, headlamps, shock absorbers, windshield wipers, brakes ug ang makina.

Likayan ang paggamit sa cellphone samtang nagmaneho. Kinahanglan nga magpokus lang sa pagmaniho.

Kanunay gamiton ang seatbelt.

Kinahanglan nga alerto ug dili magtanga-tanga kun mag-drive.

Kinahanglan nga modistansiya sa gisundan nga sakyanan para malikayan ang bangga.

Dili moinum og ginadiling ilimnon aron hitsas ang panghuna-huna.

Dili magpatuyang og padagan kun libre ang kadalanan.

Kanunay namagsul-ob og helmet kun mogamit og motor.

Kanunay nga magpatingog sa busina kun adunay nakita nga tawo nga molabang.

Sa mga tawo nga molabang, kinahanglan nga magpanglingi sa isig ka kilid ug siguraduhon nga layo ang nagpadulong nga sakyanan aron dili maligsan. Magdali usab sa paglabang aron mas malikayan ang disgrasya.

Kinahanglan nga sundon ang traffic lights aron wala'y bangga nga mahitabo.

Sa mga mosakay sa pampasaheruan nga sakyanan, kinahanglan nga mosakay kun diin haum sa loading ug unloading sa mga pasahero.

Kinahanglan nga magdali sa pagsakay og jeep aron molarga kini dayon.

Sa mga nagplanong maglakaw lang, kinahanglan nga pokus sa paglakaw ug kanunay nga mag-amping sa mga moagi nga sakyanan.

Dili magsigi og selfie sa kadalanan ug dili magyampungad sa mga gadgets aron makalikay sa mga tulisan ug snatchers.

Tipik  lang kini sa mga angayan nga hinumduman kun anaa kita sa kadalanan. Kinahanglan nga gamiton usab nato ang atong sintido kumon kun anaa kita sa publiko nga lugar. Kining tanan, pahimangno lang. Kitang tanan adunay katungdanan nga kinahanglan natong buhaton aron mahimong hamugaway ang atong pagpuyo.