Banat ( Leaderboard Top ), pagematch: 1, sectionmatch: 1

Brigada News Gihapon!

CEBU, Philippines - Malipayong gipahibalo sa station manager sa Brigada News FM 93.1-Cebu, Raul del Prado  nga sila gihapon maoy  numero uno sa gipahigayong survey sa Kantar alang sa unang quarter karong tuiga.

Matud pa niya nga ang  pag-istablisar og lig-ong  koneksyon ngadto sa viewers maoy usa  sa mga rason kun nganong  nagpabiling humot sa masa ang Brigada News FM 93.1 –Cebu.

Nakakuha ang Brigada og 26.22 % nga rating ug malipayon si del Prado sanglit sila man usab ang numero uno sa miaging quarter busa nagpakita kini nga namintinar nila ang kalig-on sa ilang istasyon.

“Gawas sa gipalig-on nato nga mga programa, amo pud nga gipalig-on ang among relasyon ngadto sa mga tawo sa field. Dili lang kutob on air ang among pagpangalagad kanila,” padayag pa ni del Prado sa Banat News Hugyaw.

Suma pa ni del Prado nga nagkadaiya nga mga feeding program   ug uban pa ang ilang gibuhat sa kumunidad.

Giumol usab nila ang grupo sa ilang listeners nga gitawag og Ang Nagkakaisang Ka-Brigada Ng Komunidad Incorporated nga rehistrado sa Security and Exchange Commission.

Naumol ang maong grupo alang sa pagtinabangay ilabi na kun duna’y masakit nila nga kauban.

Gidalit usab  sa maong organization ang nagkadaiyang livelihood program busa ubay-ubay na gyud ang natabangan niini.

Moabot na sa dul-an sa 3,000 ka mga tawo ang sakop sa maong grupo ug gipaabot nga mosaka pa ang gidaghanon niini human nikisaw og samot ang maayong binuhatan sa maong grupo.

“Balanse ang paghatod nato og serbisyo ngadto sa katawhan, naghatud ta og nindot nga programa on air, ug sa susamang higayon, nialagad pud nila didto sa  ilang lugar  hinungdan nga nisamot ta og kaduol sa ilang kasingkasing,” dugang pa niya.

Matud pa ni del Prado nga usa lig-ong formula sa Brigada mao ang paghatod og igong news and public affairs  ug music programs  busa naa dinhi ang  tanan nga  gipangita sa listeners.

Ni-click usab ang ilang videoke challenge sa nagkadaiyang barangay nga naghatag og luna sa mga tawo nga ipakita ang ilang talento sa pagkanta

“Nasayod man gyud ta, nga mahilig gyud mokanta ang mga Cebuano. Kun duna gani mga contest, dumugan gyud na sa mga tawo, “matud pa ni del Prado.

Matud pa niya nga dili gyud  sila mohunong sa pagmugna og mga kalihokan diha sa kabarangayan ingon man usab ang paghatod og mga programa  nga humot kaayo sa publiko.

Matud pa ni del Prado nga dili malikayan ang mga pagsulay ilabi na nga kapin pa lang sila sa tulo ka tuig.

“Naa gyud ta’y mga challenges nga naagian, kanang pag-handle sa imong mga tawo aron magkahiusa maoy usa sa akong mga hagit kaniadto. Sa pagkakaron, amo gyud nga gihimo nga magkahiusa gyud mi pinasubay sa polisiya sa atong kompanya, mo-matter gyud na nako ang attitude sa usa ka tawo,” matud pa ni del Prado.

Usa sa naglawig og maayo karon sa Brigada News FM 93.1 –Cebu mao ang The Brigada Tandem uban nila ni Carlo Duga-duga ug  Atty Juril Patiño.

Sa maong programa, magsawo sa nagkadaiyang isyu sila si Duga-duga ug Patiño ug mag-debate kun duna sila’y nagkalain-laing opinyon.

Matud pa ni del Prado nga moabot ngadto sa kapin sa 30 ka Brigada FM stations nationwide ug target nila nga maabot kini sa 100.

“Gawas sa Cebu, duna pu’y mga Brigada sa ubang lugar ang nag-number one. Naningkamot gyud mi og maayo ron nga mapalig-on og samot ang among mga programa uban usab sa lig-ong personalities.

Nahimutang sa ikaduhang puwesto ang FM  station sa ABS-CBN nga  MOR 97.1  ug wala na mohatag og lapad nga komento ang  head niini nga si DJ Jacky G  ug nilenggua ra kini   og “congrats” alang sa nag-unang istasyon. (BANAT NEWS)

  • Follow Us: