Cebu Pop Friday; Halad ni Niño ngadto kang Sangay!

Name: ??Niño James Bañares

N-Name: ??Ka Onin

Age: ???34

Date of Birth: ?June 22, 1982

Place of Birth: ?Cebu City (But grew up in Bacolod City)

Favorite Singer / Artist: ?THE COMPANY

Favorite Songs: PERO ATIK RA and KUNG AKO NA LANG SANA

"Cebu Pop has been a stepping stone for many Cebuano Songwriters and Artists. Sama nila, nakakuha sab ko og inspirasyon sa Cebu Pop nga ipadayon ang paggama ug pagpakaylap sa mga Sugbuanong huni."

Mao kini ang pagpabuhagay sa dakong pasalamat ni Niño James Bañares o mas naila isip Ka Onin sa mga nagpaluyo sa Cebu Pop Music Festival, ang tinamud ug usa sa mga nag- unang songwriting competition dinhi sa Sugbo.

Sama sa kadaghanang composers, mas naangkon ni Niño ang halapad nga popularidad sukad siya misalmot niini.

Nahimo siyang unang finalist niini niadtong 28th Cebu Pop sa awit niyang "Magkahiusa" uban sa pagtambayayong ni  Rex Maribao ug gi-interpret ni Zennith Rivera.

Naangkon ang unang kadaugan ni Niño sa maong kompetisyon atol sa ika-33rd Cebu Pop Festival sa dihang nahimong 3rd placer ang gitagik niyang awit nga "Amomahon Ka" uban sa laing nagsuwat niini nga si  Ramonito Carbon ug gi-interpret nila ni  Jan Michael Banaynal ug Windey Prado.

Apan gawas niining maong mga pasidungog, mga nagkadaiyang award sab ang naangkon ni Niño gikan sa mga nagkalain laing kadaugan sa ubang kompetisyon.

Sa Huniño SongWriting Contest, kaupat siya nahimong  mananaug sa nagkalain-laing tuig.

Nahimo siyang third placer atol sa 2nd Huniño, 2nd placer sa 4th Huniño, 3rd placer niadtong 5th Huniño ug katapusang nahimong 2nd placer atol sa 7th Huniño.

Naila sab si Niño isip director sa choir.  Sa maong natad, ang gihuptan niyang CNU Children and Youth Choir nakadawat na og Silver Diplomas sa “A Voyage of Songs” sa prestihiyosong International Choral Festival and Competition didto sa Penang, Malaysia niadtong tuig 2015.

Nagsugod ang pagpanimpad ni Niño sa kalibutan sa musika sa dihang giagda siya sa iyang higala sa pagsalmot sa choir sa Lourdes Parish niadtong 1996.

Sa pagserbisyo niya sa Lourdes Parish isip miyembro sa Marian Choir, aduna siyay nahimamat nga musikero nga maoy nagdala kaniya arun manimpad sa pag- audition sa Salvador and Pilar Sala Foundation isip music scholar ug sa pagkadawat niya sa maong foundation, didto na siya nagsugod sa pagbansay bansay sa tinaguan niyang abilidad sa pagtagik og awit ug isip mang-aawit hangtud nga nahimo na siyang miyembro sa Cebu Youth Symphony Orchestra.

"Alang sa uban, ang musika usa lamang ka hobby o kun kalingawan; apan alang kanamo, labi na namong mga music graduates; mao kini ang nagbuhi namo; mao kini ang nagpakaon sa among pamilya; mao kini ang nagpa eskuwela sa among mga anak; mao kini ang naghatag namo og kaugmaon. Suwerte lang gyud siguro mi kay ang trabaho nga nagbuhi kanamo mao ang propesyon nga pinangga sad kaayo namo," pagpaambit ni Niño sa dako niyang paghigugma sa musika.

Dugang mensahe ni Niño, gihimo niyang inspirasyon isip musikero mao ang iyang pamilya ug mga higala nga wa gyuy puas sa pagsuporta kaniya.

Q and A

BNH: Sa tanan nimong gi -compose nga mga kanta, unsay nagmarka gyud nimo nga dili  nimo malimtan?

Niño: So far, ang pinaka paborito nako’ng nahimo mao ang awit nga “AKO’Y IYO O SENYOR SANTO NIÑO” nga giawit ni Robert Bernadas. Nahimo siyang 3rd Placer atol sa 5th Huniño. Murag paminaw nako mao’y background music igkamatay nako.

BNH: Giunsa nimo pagpaambit sa imong talent sa religious aspect?

Niño: Currently, I am the project director of the Salesian Music Ministry under the supervision of Fr. Randy Figuracion. Usa siya ka Salesyanong Pari. Among tumong mao ang pagkolekta ug pagpaambit sa mga Salesyanong awit ngadto sa katawhan. Lain sab namong tumong mao ang pagtabang sa mga church choirs nga mas mapa nindot pa ang ilang serbisyo sa simbahan. In fact naka -produce na mi og duha ka libro, ug karong May 24, amo na sab i-launch ang among ikatulo nga libro nga nag -ulohan og “MEMORARE”, compilation kini sa mga awit alang sa Mahal nga Birhen, tugoti ako sa pagpahibalo sa kadaghanan nga kining mga libroha mapalit sa Our Lady of Lourdes Parish Bookstore.

BNH: Unsa ang labing dakong leksyon nga imong nakuha sa imong pagka –songwriter ?

Niño: As a songwriter, daghan ka og leksyon nga makuha sa matag proyekto nga imong mahimo apan alang kanako kining duha ka leksyon ang labing nitatak nako, ako ni’ng nakat-onan sa akong songwriting mentor nga si Jude Gitamondoc, first, "Each song has its own time." Second, "A Good Song isTimely, But the Best Song is TIMELESS.” (BANAT NEWS)