Transport strike wa kaparalisar

CEBU, Philippines - Malampuson ug malinawon ang transport strike nga gilusad sa Pinagkaisang Samahan ng mga Tsuper at Operators Nationwide sa Metro Cebu.

Kini ang paghulagway ni Greg Perez, ang coordinator sa PISTON-Central Visayas, kinsa nangangkon nga 80 porsiyento ang pagkaparalisar sa biyahe sa Dakbayan sa Mandaue, Lapu-Lapu ug ubang kasikbit nga mga lugar bisan dili nila tumong ang pagparalisar sa pangpublikong transportasyon.

Apan matud pa ni Land Transportation Franchising and Regulatory Board-7 Director Ahmed Cuizon mga 20 porsiyento lang sa mga publikong sakyanan sa Metro Cebu ang apektado sa welga.

Gani si Konsehal Dave Tumulak niingon nga daw sa wala ray welga nga nahitabo sa Dakbayan sa Sugbo tungod kay daghan gihapon nga mga jeepneys ang nibiyahe.

Hinoon matud ni Tumulak nga nahasol gyud ang kagamhanan sa dakbayan kay nakagasto sa gasoline, pagkaon sa mga drivers sa ilang mga sakyanan, kapolisan ug uban pa.

Nagpadagan ang siyudad og 12 ka bus ug tulo ka V-Hire aron maoy mopasakay sa mga pasahero nga natanggong.

Gidawat-dawat sab ang mga pasahero gikan sa Dakbayan sa Lapu-Lapu ug Mandaue paingon sa Dakbayan sa Sugbo.

Walo ka Elf trucks sa barangay ug laing duha ka bus sa kagamhanan sa Dakbayan sa Lapu-Lapu ang nihakot sa mga natanggong nga mga pasahero human 80 porsiyento sa mga jeepneys ang wala mobiyahe sumala pa ni Andy Berame, ang officer-in-charge sa Lapu-Lapu City Disaster Risk Reduction and Management Office.

May lima sab ka Ceres Liner Buses nga dunay special permit gikan sa LTFRB ang namasada kagahapon.

Si Mario Napule sa Lapu-Lapu City Traffic Management Systems nitataw nga hapsay ra ang dagan sa mga gipangtagana nga sakyanan sa gobiyerno ug tanang pasahero sa matag terminal daling nakasakay.

Ang mga pasahero gikan sa Lungsod sa Consolacion ug ubang bahin sa amihanan ang kutob lang sa Highway Ibabao, Dakbayan sa Mandaue ug mobalhin sa ilang pagsakay sa mga sakyanan sa kagamhanan sa dakbayan paingon sa Ayala o SM. Walay plite ang mga pasahero gawas sa mga pribadong sakyanan sama sa Ceres bus nga P10 ang plitehan gikan sa Dakbayan sa Lapu-Lapu ug Dakbayan sa Mandaue.

Si Glenn Antigua, operation chief sa Traffic Enforcement Agency of Mandaue (TEAM), nibana-bana nga 15 ngadto sa 20 porsiyento lang ang pagkunhod sa gidaghanon sa nibiyahe nga mga jeepneys.

Si Senior Police Officer 1 Celina Dizon sa Consolacion Police Station nitataw sab nga malinawon ang transport strike sa ilang dapit.

Sa laing bahin, gidawat ni Cuizon ang counter proposal kabahin sa  transport modernization nga gipasiugdahan sa mga transport leaders nga wala niuban sa welga sama sa Cebu Integrated Transport Multi-Purpose Cooperative, National Confederation of Transport Workers Union-Central Visayas, Alyansa sa Nagkahiusang Drivers at Operators Nationwide ug Basak-Lapu-Lapu Jeepney Operators and Drivers Association.

Gisugyot sa grupo nga hinay-hinayon lang ang pag-modernized sa mga jeepneys sugod 2018 hangtud 2026 ug dunay mga lagda nga himoon ang LTFRB alang sa transport modernization.

Ang lihok-protesta malinawon nga gitapos atubangan sa buhatan sa LTFRB-7.

Gisupak sa PISTON ang planong pagpapas sa mga sakyanan nga 15-anyos pa pataas.

Samtang si Cebu City Mayor Tomas Osmeña sa iyang bahin nagkanayon nga hugot gyud ang ilang monitoring aron ang mga tinun-an lakip na ang mga trabahante makauli gyud sa ilang panimalay.

Nitumaw sab ang kalibog sa publiko human si Presidential Assistant for the Visayas Michael Dino nipagawas og advisory nga walay klase sa mga dapit nga apektado sa strike.

Si Osmeña una nga nipahibawo nga dunay klase ang mga tinun-an sa Siyudad sa Sugbo.  Mitchelle L. Palaubsanon, Rowena D. Capistrano, Decemay P. Padilla, Romeo T. Limpangog ug  Christell Fatima M. Tudtud (BANAT NEWS)