Cebu Pop Friday Musika ni Manolito

CEBU, Philippines - "Ang musika anaa sa palibot matag karon ug unya nagsakaysakay sa bukobuko sa hoyuhoy, sa tinagiktik sa tulo sa ulan diha sa atop, sa taghoy sa kalanggaman, sa kasikas sa kadahonan o ba kaha sa hinaganas sa balud ug daghan pa. Anaa ra gayud ang musika, andam nga mounong bisan unsay imong bation, mao nga angay ug matarong lang tingali nga ato pod siyang baslan sa pagmahal."

  Mao kini ang lawom nga pagpasabot ni Manolito Languido kun nganung dako kaayo ang iyang paghigugma sa musika.

Alang kaniya, usa ka dakong aspeto ang musika sa pagpalambo sa iyang kinabuhi karon.

Gipakasentro niya ang iyang kinabuhi sa maong butang ug gumikan niini daghan na siyang napamatud-an sa iyang pagkatawo.

Nagsugod ang pagkahilig ni Manolito sa musika sa dihang bata pa lamang siya kun diin malingaw kaayo siyang mag-apong sa iyang amahan nga nagtugtog sa gitarang hinuwaman sa  iyang iyaan hangtud nga nakat-on na lang usab siya sa pagitik niini.

Mahiligon sab kaniadto si Manolito sa pagkanta- kanta samtang nagtamod sa karaan na kaayo nga song hits ug music magazines hangtud nga nahulma sa iyang alimpatakan ang pangandoy nga unta usa ka adlaw makahibawo na siyang mo- compose og mga awit.

Usa sa di mahikalimtan ni Manolito nga kasinatian sa musika mao ang higayon kaniadto nga maghuwat pa siya nga mahuman sa pagamit sa gitara ang tag-iya niini una pa siya makahuwam ug didto gawasnon na siyang makapadagayday sa gusto niyang tukaron nga musika.

Gipabuhagay usab niya nga sa panahon sa iyang pagkabatan –on, magpaatbang siya sa ilang silingan nga adunay radyo arun makapaminaw sa mga bag -ong kanta sanglit niadtong panahona ,wala pa man sila’y radyo.

Tuod man, tungod sa iyang dakong paghangop sa kalibutan sa musika sukad sa bata pa siya, hinay hinay nga nagbunga ang iyang pag-abiba niini.

Usa sa  mga dakong kalampusan nga nakab- ot niya mao ang iyang pagdaog sa 35th Cebu Pop Festival niadtong tuig 2015 sa rock category alang sa gi-compose niya nga awit nga mao ang "Padayon Sugboanon" nga gi-interpret ni Jamila Albino.

Gawas sa maong pasidungog, pipila usab sa naangkon niya nga award kaniadto mao ang ikatulong ganti sa Huni sa Paglaum songwriting contest tuig 1998.

Nahimo usab siyang finalist sa mga awit nga iyang giduso sa Carcar City Hymn ug Carcar City College Hymn songwriting contest.

Ang wala’y hunong pagpursige ug pagkab-ot sa damgo sukad sa iyang pagka- bata maoy naghatag og kahulugan sa tanang nakab-ot ni Manolito sa mga pasidungog sa natad  sa musika.

Q&A

BNH: Nganong dali ra man ka maka-compose og kanta?

Manolito: Dali ra ko maka-compose sa mga higayon nga naay deadline, kana bitaw?ng naay moingon nga himoa dayon ni kay gamiton na dayon. Kasinatian ni nako dihang nagtrabaho pa ko isip helper sa kombento sa mga madre. Adunay panahon matag semana nga gigahin alang sa katesismo ug pamalandong sa Pulong sa Dios nga kutloon sa pagbasa nianang adlawa.  Nagkinahanglan og awit nga motukma. Maglisod ko’g pangita’g awit. Mao nga ang akong buhaton magtagik ko’g awit nga magbase sa pagbasa nianang adlawa.

BNH: Unsa'y imong ikatambag sa mga aspiring composers karon?

Manolito: Dili mosurender dayon. Padayon lang gyud. Ayaw ka -discourage kun dili madawat ang imong composition. Paminaw sa mga tambag sa nanag-una samtang padayon sa pagpangita sa kaugalingon mong mugna.

BNH: Unsang panahona ang daghan ka'g ma-compose nga mga kanta?

Manolito: Kanang panahon sa deadlines.

BNH: Giunsa nimo pagpaambit sa imong talent sa religious aspect?

Manolito: Pinaagi sa akong pagka aktibo isip miyembro sa choir sa among kapilya sa barangay. Pinaagi usab sa pagtagik og mga awit alang sa mga songwriting festival nga relihiyoso sama sa Huniño ug sa Glory Songwriting Festival nga gipasiugdahan sa Couples for Christ.

BNH: Kinsa'y imong gihimong inspirasyon niining tanan nimong gibuhat isip composer?

Manolito: Ang akong pamilya.

BNH: Sa unsa nga paagi nakatabang nimo'g dako ang Cebu Pop?

Manolito: Tungod sa Cebu Pop nahimo kong host sa radio program nga “Sugboanon ug ang Iyang Huni”. Programa nga magpatugtog og lunlon CebuPop Music nga mga awit, matag Domingo, alas otso hangtud sa alas nuybe y media sa gabii sa estasyong DYRF. (BANAT NEWS)