Nash Racela bag-ong head coach sa TNT

CEBU, Philippines - Opisyal nang ginganlan isip bag-ong head coach sa TNT KaTropa ang veteran assistant coach nga si Nash Racela hulip ni Jong Uichico.

Dugay nang gihugon-hugonan ang maong dakung kausaban apan una kining gihimakak sa mga kadagkuan sa TNT. Kagahapon nahingpit na kini human usab sa usa ka tigum tali sa mga kadagkuan sa koponan ug sa MVP Group.

Usa sa nakitang rasun mao ang bati nga performance sa TNT diin pakyas sila pagsud sa semis sa All-Filipino Cup ug Commissioner's Cup ug ang pagkapakyas nila paglusot sa finals human mapilde sa Meralco Bolts sa semis sa PBA Governors' Cup.

Mga mihukom sa pag-ilis og head coach mao mismo si team owner Manny V. Pangilinan uban sa mga top executives nga sila si Ricky Vargas, Patrick Gregorio ug team manager Virgil Villavicencio.

Si Racela motiwas pa hinuon sa iyang trabaho isip head coach sa Far Eastern University sa UAAP nga laraw nga musulod sa finals.

Ang 2016-2017 PBA season buksan sa Nobiyembre 20 ug didto magsugod si Racela isip head coach. Taas na og kasinatian si Racela kinsa dugay nga nahimong assistant coach sa Coca-Cola Tigers, San Miguel Beer ug Talk N' Text. Lakip usab siya sa coaching staff sa national team. (BANAT NEWS)