Iya nanganak na!
CEBU, Philippines - Gihimugso na sa TV host nga si Iya Villania ang anak nila ni Drew Arellano kagahapon. Lalaki ang labing una nga anak sa magtiayon ug ilaha kini ginganlan og Antonio Primo nga gibase sa pangalan sa amahan ni Drew nga mitaliwan na tulo ka tuig na ang nilabay. Gikasal sila si Drew ug Iya niadtong 2014 ug nalangan ang plano nila nga makabaton og bata gumikan kay gi-enjoy una nila ang ilang kinabuhi isip magtiayon. Una nga gipasigarbo ni Iya nga gipreserbar gyud niya ang iyang virginity sa dihang uyab pa sila ni Drew kaniadto.
JC misidlak og kalit
Kalit nga misaka ang popularidad ni JC Santos gumikan sa iyang partisipasyon sa serye nga Till I Met You nga gibidahan nila ni Nadine Lustre ug James Reid. Wala magdahom si JC nga dako diay ang iyang exposure sa maong serye. Nahimong performer si JC kaniadto sa Hong Kong Disneyland ug Universal Studios Singapore.
Pia molugwa sa ASAP
Si Miss Universe 2015 Pia Wurtzbach ang special guest sa ASAP New York karong Sabado, September 3. Ang maong show ipahigayon sa Barclay’s Theater, Brooklyn.
Shawie sa concert stage
Mobalik na si Sharon Cuneta sa concert stage ug kini mahitabo karong October sa Solaire Resort & Casino. Todo praktis na ang singer ug makit-an usab sa kadaghanan ang iyang ka-sexy.
Rachelle Ann kaslunon?
Nitumaw ang tsismis nga matud pa engaged na si Rachelle Ann Go sa gidungog niya nga non-showbiz boyfriend gumikan sa gisul-ob niya nga diamond ring. Apan pipila sa iyang mga higala ang nitin-aw igo ra nisul-ob og singsing ang singer ug dili kini angayan hatagan og bug-at nga interpretasyon. Tak-om pa si Rachelle sa maong tsismis.
Nauyonan si Angel
Nitumaw ang taho nga nagsugod na og tigom ang kadagkoan sa Star Cinema ug gusto nila nga si Angel Locsin gyud ang ilang padalhon sa Darna. Giingong mao kini ang proyekto sa Star Cinema sa unang bahin sa 2017.
Aksyon og kabalaka
Nakaingon si Diego Loyzaga nga dunay dili ingon nato sa iyang balay gumikan kay kalit lang napawong ang ilang suga ug nagsige og paghot ang iro panahon sa kagabhion. Nakugang usab ang aktor nga napawong og kalit ang telebisyon.
Bag-ong putahe
Gipahibalo ni Yeng Constantino nga i-release ang iyang ikapito nga studio album sa dili pa mahuman ang tuig. Suma pa sa singer nga lahi ang unod sa iyang upcoming album kumpara sa nangagi niya nga kanta. Isip singer, lain-lain nga putahe ang idalit niya sa iyang fans.
Bisan unsa
Nitumaw ang mga sugyot nga angayan hatagan og proyekto si Sue Ramirez kung diin siya gyud ang bida. Apan sa habig ni Sue, nitataw kini nga wala siya magdali ug dili siya mamili og proyekto bahalag support role ang iyang madawat. (BANAT NEWS)
- Latest