Stephanie Center Stage malampuson, gipunsisukan, mabulokon!

CEBU, Philippines - Napuno sa abiba ug hudyaka ang nagmalampuson nga concert sa Cebuana singer nga si Stephanie   niadtong Domingo sa gabii sa Grand Ballroom sa Waterfront Cebu City Hotel.

Nibukas sa maong show ang ML Madrigas Dancers nga gisundan sa online sensation ug columnist sa Banat News nga si Medyo Maldito  kinsa niawit sa gi-compose niya nga “Hahahahasula” ug sipa nga pakpak ang iyang nadawat gikan sa audience.

Dayon nilugwa si Stephanie.     

“Daghan kaayong salamat ninyong tanan, wala ko ga-expect nga maabot ko ani, pasiunang mensahe ni Stephanie ngadto sa audience.

Nakilig usab ang mga tawo sa  usa ka song number ni Stephanie  kung diin aduna’y partisipasyon ang singing heartthrob sa Sugbo nga si Von Saw.

Nahugyaw og samot ang mga tawo sa pagkanta niya og Girl On Fire kung diin ka-duet niya ang Cebuana ug international singer nga si Anna Fegi.

“Salamat kaayo ate Anna nga usa sa akong mga mentor,” matud pa ni Stephanie.

Daghan og nakat-onan si Stephanie sa iyang todo nga ensayo pinaagi sa tabang sa Brown Academy of Music nga gipanag-iya nila ni Anna  ug sa bana niini nga si  Adam Brown kinsa mao usab ang musical director sa maong concert.

Nihatag usab sa ilang special numbers ang Kwin and Kim dance artists, ug ang Power Trio uban sa surprisa nga partisi-pasyon ni Carlos Agassi.

Wala gyud mawala ang enerhiya sa tawo sa pagsige og abiba, ug padayon ang ilang maka-bungog nga pakpak sa performance sa beteranang singer nga si Dulce.

Aduna pu’y portion nga nag-duet sila si Dulce ug Stephanie.

“Grabe kabuotan nga bata (Stephanie), ug segurado ko nga layo gyud siya og maabtan,”  tipik sa mensahe ni Dulce pagkahuman sa duet nila ni Stephanie.

Gikagubtan usab sa mga tawo ang paglugwa sa Kapamilya star nga Daniel Matsunaga ug Kapuso star nga si Alden Richards.

Sa pagkanta ni Alden,  naka-alerto og maayo ang mga guard  gumikan sa kadaghang tawo nga gusto magpa-picture sa aktor, wala gyud niya sipyata ang pagkanta og God Gave Me You nga  nisikat og samot gumikan sa kalyeserye nila ni Maine Mendoza sa Eat Bulaga.

Nitumaw usab ang emosyon sa entablado sa dihang nakahilak si Stephanie sa pagpasalamat niya sa mga tawong maoy rason nga nahulma ang  “Stephanie Centerstage Concert.”

Gipasaka niya sa entablado ang iyang inahan nga si Aida Patana nga maoy nagdumala sa  M-Talents Events & Promotions kauban usab ang major sponsors nga sila si Señorito Michel Lhuillier ug  Señorita Amparito Lhuillier.

Nihatag usab og suporta sa concert sila si  Selina Sevilla, Bobbi Yan,  Ethel Booba, Daisy Reyes,  ug Department of Tourism undersecretary  Kath de Castro.

Si Victor Cuenca ang direktor sa maong concert ug ang University of Cebu usab ang nagsilbi niya nga backup dancers.

Nikabat ngadto sa 122 ang sponsors sa maong solo concert ug 5000 ka tickets ang nabaligya, hinungdan nga napuno gyud ang venue.