Deniece gihimong ambassador of goodwill

CEBU, Philippines - Gitudlo nga Ambassador of Goodwill si Deniece Cornejo sa Minadanao-based international group nga The Chivalric Order of the Royal House of Baloi.

Sa report sa TV Patrol, gipatigbabaw sa grupo ang kalinaw ug interest sa kabataan.

Nisalmot usab si Deniece sa kampanya batok sa krimen ug korupsyon.

Nagpanikad na usab siya gumikan kay mahimong ka tie-up sa iyang grupo ang National Youth Commission of the Philippines nga gidumala ni Aiza Seguerra.

“My aim is to empower youth from all walks of life,” suma pa niya.

Nagdumili paghisgot si Deniece kalabot sa isyu nila kaniadto ni Vhong Navarro.

Kahinumdoman nga nahimong kontrobersiyal ang pangalan ni Deniece human niya gipasanginlan si Vhong nga ni-rape kaniya sa iyang gi-istaran nga condo unit.

Alden gipanalipdan ni Sunshine

Todo ang pagdepensa ni Sunshine Dizon ngadto sa iyang higala nga si Alden Richards human kini gipasanginlan nga matud pa dili kahibalo “makisama”.

Matud pa sa aktres nga dili tinuod ang lenggua sa usa ka netizen nga matud pa daghan ang naglagot sa aktor  gumikan sa attitude problem niini.

Dali nga nakakomento si  Sunshine ug gipikhan niya ang maong netizen. 

“@KathnielRules26 @showbiz_Pools nakatrabaho mo na ba siya? Hindi di ba?Fyi Alden is one of the nicest and down-to-earth actor in the biz,”  tweet pa sa aktres.

Una na nga gibutyag ni Sunshine nga maayong tawo si Alden ug iya kini nga nakita sa dihang nagkauban sila sa  seryeng  Mundo Mo’y Akin  sa GMA-7 niadtong 2013.

 “Always keep your feet on the ground and you will surely go places.Simula pa ng Mundo Mo’y Akin hangang ngayon ay talaga namang wala kang pinagbago. Proud na proud ako sa ‘yo,” saysay pa niya.  

KathNiel nagkalig-on

Lima ka tuig na ang tandem nila ni Kathryn  Bernardo  ug Daniel Padilla  ug mapasalamaton ang duha kay wala pa gyud sila nabungkag ug sila  gihapon ang nag-uban karon sa nagkadaiyang proyekto.

Nagsugod ang ilang panagpares sa youth oriented show kaniadto sa ABS-CBN nga Growing Up ug nasundan dayon kini og mga serye ug pelikula.

 Bisan sa pagsulbong sa daghang loveteam karon sa showbiz,  pabilin gihapon sila nga gihangop sa masa.

Busy karon ang duha sa pag-promote sa ilang upcoming film  sa Star Cinema nga  Barcelona: A Love Untold nga ipasalida na karong September 14.