Kim sa MMK
CEBU, Philippines - Ang Sugbuanong aktres nga si Kim Chiu maoy bida sa episode ugma sa Maalaala Mo Kaya kung diin modala siya sa babaye nga nag-agi og kalisod sa kinabuhi nga nagtukmod kaniya nga mosalmot og mga beauty pageant.
Makauban ni Kim sa maong episode sila si Sylvia Sanchez, Jong Cuenco, Johan Santos, ug Lassy Marquez.
Ubos kini sa direksyon ni Dado Lumibao ug sinuwat nila ni Jaymar Santos Castro ug Arah Jell Badayos.
Charie Villa niatras
Nitumaw ang mga hungihong nga matud pa nga ang baruganan niya batok sa extrajudicial killings ug pagpalubong kang Ferdinand Marcos maoy nakapatukmod ni Charie Villa nga balibaran ang posisyon nga mahimong head sa PTV4.
Ang balita nga gimantala sa www.medianewser.com nagkutlo sa Facebook post ni Villa nga nagkanayon nga dili seryoso ang kagamhanan sa mga saad niini ug nakaingon siya nga labing epektibo tingale ang iyang pag-alagad sa laing area.
Gitataw ni Villa nga gitanyagan siya ni Presidential Communications Office Secretary Martin Andanar sa nahisgotang posisyon apan hangtod karon, wala pa siyay nadawat nga update kalabot sa maong appointment. Nahimo na nga kabahin si Villa kaniadto sa British Broadcasting Network sa wala pa manumpa si Presidente Rodrigo Duterte sa iyang katungdanan isip stringer.
Suma pa ni Villa nga nagkauban sila ni BBC anchor Rico Hizon sa INTV, diin gisaaran matud pa sila og one on one interview kang Presidente Duterte didto sa Davao apan wala kini nahinayon.
Pagbalik niya sa Manila, nanawagan kaniya si Andanar ug nagtuo siya nga mangayo kini og dispensa kaniya gumikan sa wala nahinayon nga interview, apan gipangutana na hinuon siya kun ganahan ba siya nga mamahimong pangulo sa PTV4, hinungdan nga nagtagbo sila.
Human niini, nilarga siya sa Amerika ug nagkasabot sila nga dili una maghisgot kabahin sa ilang nasabotan. Dungan niini, gidapit si Andanar ni Karen Davila isip guest sa show nga Headstart sa ANC, diin gibutyag niini nga executive sa usa ka network ang mahimong head sa PTV-4 News.
Dinhi na matud pa nagpusot-pusot ang mensahe nga iyang nadawat kabahin sa PTV4. Apan dinhi ra kutob kay wala na matud pay update kabahin niini.
“But until now, no word so I have decided to refuse any offer, because I think they are not serious about what they promised, and with what’s happening lately, I think I will be more effective outside,” tipik sa Facebook post ni Villa.
- Latest