‘The Bagman’

Sikat kaayo ron ang word nga  “bagman” niining kampanya sa administrasyon batok sa ginadiling drugas. Ang labing bag-ong giingong bagman mao ang driver matud pa ni Senator Leila de Lima. Ambot tinuod ba o dili, basta usa ra akong masulti: I am a bagman! Pakkk!

Yes, usa ka semana human nalusad ang “The Good Vibes Project” daghan na ko og nadawat nga pre-owned bags—kasagaran pang babaye. Ug ubay-ubay na sab ang nahalin. Ug kaluoy sa Ginoo P2,000 na kapin ang atong na-donate sa The Freeman Foundation.  Daghang salamat sa mga malumo og kasingkasing nga ni-donate sa ilang used bags ug maingon man usab sa mga nipalit niining maong mga items. Pakpak!

Adunay nangutana, bags ra ang pwedeng i-donate? Kinahanglan branded gyud? Dili gyud. Anything of value mahimong i-donate. Kanang mga butang nga mahimo pa sab nga magamit ako nang dawaton for bidding. Ug dili sab kinahanglan nga branded gyud or katong mga mahalon. Bisan unsa nga dili na nimo magamit ug maayo pa kaayo og kondisyon, i-donate na. Naa say mga nangutana, naay panglaki nga items? So far wala. Ug manghinaot ko nga adunay mu-donate.

May mga nangutana sab, nganong nagpasiugda man ka ana nga project? Akong kinomedya nga tubag mao nga kay beauty queen man gud ko. Unya kun beauty queen ka, kinahanglan gyud nga aduna kay charitable works or activities. Pakkk! But seriously ganahan lang gyud ko nga maka feel mo sa joy of helping in your own simple little ways. Ganahan ko nga maka experience mo unsa mo ka blessed kun mutabang sa mga tawo nga dili makabawos ninyo, kanang mutabang mo nga walay bugti.  You will be surprised kay dili lang ninyo damhon ug paabuton, mubalik ra gyud na ninyo inyong gitabang bigger and better.  Trust me! Also, ingon sila maayo nang kitay mutabang kaysa kitay tabangan. Maayo nang kitay muhatag kaysa kitay hatagan. Tinuod sab gyud.

Laing pangutana: The Freeman Foundation ra gyud ang beneficiary? No. Ganahan lang sab ko nga adto dad-on sa The Freeman Foundation ang ubang proceeds kay kun mo-ukay mo sa The Freeman Newspaper makit-an ninyo dinha ang mga bata nga beneficiary sa maong foundation nga luoy kaayo, mga nagkinahanglan kaayo og medical assistance nga walay ipalit og tambal ug ikapatambal. Unya daghan mana ang magpatabang gud dinha maong para nako maayo na lang makatabang sab ta bisan ginagmay lang. Plano sab nako nga mu-donate ta sa Kapandesal Multi-Purpose Cooperative  nga maoy mupasiugda sa pagtukod og school building didto sa Lindogon, Simala.

Apan kun naa sab mo’y nahunahunaan nga grupo nga tabangan mahimo kaayo. Ang akong nahunahunaan gani nga inig-claim ninyo sa item, dili na bayad inyong ihatag nako kundili resibo na nga mumatuod nga gi-donate gyud ninyo sa inyong nauyonan nga foundation or charitable organization ang kantidad nga maoy magsilbing donation. Unsaon gani to? Kun ikaw nag-donate og item ato nang presyohan. Example: Ang imong donated item kay bag unya atong presyohan og P350 nga starting price. Unya mahalin na og P500 after the bidding. So ang P350 donation na sa tag-iya sa donor. Ang P150 donation na sa buyer. So, okay ra nga inig claim nimo sa item magbitbit ka diri’s Banat newsroom og official receipt sa imong ganahan nga foundation isip beneficiary either in your name or anonymous, basta ang importante ka yang amount P150 gyud as your donation.

I like ang atong “The Good Vibes Project”  facebook page or i-text ko sa :0932-2051991, aron makatabang ta sa atong ginaymay nga pamaagi.