Panalipdan to the max

CEBU, Philippines - Kutob sa mahimo, protektahan gyud ni Luis Manzano  si Jessy Mendiola nga gipunting karon sa iyang  bashers. Kever si Luis  nga duna’y masuko kaniya ug ang importante nga dili masakitan ang tawong duol sa  iyang kasingkasing karong panahona.

Once In A Lifetime

Sa Switzerland  himoon ang pipila ka eksena sa umaabot nga pelikula nila ni Piolo Pascual ug  Yen Santos nga Once In A Lifetime. Magtinabangay sa paggama niini mao ang Regal Films,  Star Cinema ug  Spring Films . Sunod buwan matud pa sugdan ang shooting niini.

Yves na-develop kang Loisa

Giangkon ni  Yves Flores nga duna siya’y  special feelings ngadto sa kauban niya sa seryeng Be My Lady nga si Loisa Andalio. Wala’y plano si Yves nga modiskarte kang Loisa gumikan kay dili mosugot ang amahan niini nga mosulod ang aktres og romantic relationship.

Gamay nga problema

Miulbo karon ang mga hungihong nga duna’y gamay nga problema tali sa  TV5 ug Viva Entertainment.  Giingong duna kini kalabotan sa pag-produce og mga programa.  Tak-om pa ang duha ka kampo kalabot sa maong isyu.

Happy alang sa ex

Malipayon si Piolo Pascual alang  sa  lovelife sa iyang ex-girlfriend nga si KC Concepcion . Ang kanhi team captain sa Philippine Azkals nga si Aly Borromeo maoy gikatahong uyab karon ni KC . "I'm happy for her. I always pray for her happiness,” tsika pa ni Piolo ngadto sa PEP. 

Supportive boyfriend

Giubanan gyud sa news reporter nga si Mark Zambrano ang uyab niya nga si Aicelle Santos didto sa Singapore. Usa ang singer sa ni-perform sa concert ni Alden Richards sa maong dapit sa miaging gabii.

Naghinamhinam

Nagpanikad  na si Vilma Santos sa umaabot niya nga pelikula nga pagadumalaon ni Direk Quark Henares.  Makauban niya  si Jasmine Curtis-Smith sa maong movie project.

Nagminyo na diay

Taudtaod na nga nagminyo ang  Malaysian actress  nga si Carmen Soo ug ang iyang hinigugma nga si  Benson Tan. Kahinumdoman nga nisikat si Carmen dinhi sa Pilipinas sa dihang nalakip siya sa serye sa  ABS-CBN nga   Kahit Isang Saglit  uban kang Jericho Rosales  niadtong 2008.

Birthday surprise

Gisurpresa si  Eugene Domingo sa tibuok  production staff sa show niya nga  Dear Uge sa bisperas sa iyang birthday.  Gisaulog ni Eugene ang iyang 44th birthday niadtong July 23 ug usa si Direk Joyce Bernal sa nisurpresa kaniya.

Makabalik na kaha?

Nasigpatan si Paolo Ballesteros  uban sa mga kadagkoan sa  Eat Bulaga sa miaging adlaw. Panghinaot sa iyang fans nga makabalik na unta ang ilang idolo sa maong noontime show.

Rufa Mae okay na

Gibutyag ni Rufa Mae Quinto nga nakagawas na siya sa tambalanan ug kinahanglan lang niya ang pipila ka adlaw nga pahuway sa dili pa siya mobalik sa trabaho.   Wala gidetalye sa aktres ang rason sa pagkalandig niya sa tambalanan sa miaging adlaw. (BANAT NEWS)