Pagluwas sa nagtakilid nga relasyon

CEBU, Philippines - Sa usa ka relasyon, magsugod gyud kini sa kalipay, apan dili malikayan nga mag-agi usab kini og kagul-anan.

Pipila sa mga tawo ang mo-give up dayon taliwala sa nagtakilid nga relasyon, hinungdan nga moresulta gyud ang panagbuwag.

Apan ang uban, mangita gyud og paagi aron dili kini matumpag, laktod nga pagkasulti,  aduna sila’y buhaton aron mokalma ang sitwasyon.

Ayaw dayon og surrender. Ang suliran sa gugma , aduna’y nagpahipi nga solusyon .

Suma pa sa   shakeoffthegrind.com,    aduna’y pipila ka tips sa pagpukan sa negatibong sitwasyon aron mahimo kini nga positibo sa paghupot sa usa ka relasyon.

Ang maong tips naglangkob sa:

1.Dili dayon magpadala sa nagtakilid nga sitwasyon.  Importante ang gitawag nga “quality time” sa imong partner gumikan kay mao kini ang magkonektar sa tagsa-tagsa ninyo ka emosyon.  Ayaw  una unaha ang dili kaayo importante nga butang, paggahin og igong oras sa imong partner. Laktod nga pagkasulti, mag-istoryahanay mo og tarong.

2. Kung dili magkasinabot sa usa ka butang, motumaw gyud ang panaglalis. Simple ra kaayo, gamita ang magic word nga “sorry”, gumikan kay mao kini ang makapakalma sa naumol nga tensyon. Importante ang pagpinasayloay aron matuldokan na ang away.

3. Likayi ang pagsabwag og negatibong komento gumikan kay dili kini makatabang sa inyong relasyon. 

4.Likayi nga dili mahimong laay ang inyong relasyon, labing maayo nga magpabugnaw mong duha, sama sa pagpanuroy o ba kaha mobakasyon sa mga paborito ninyo nga lugar.

5.Importante ang respeto sa usa’g-usa, gumikan kay diha masukod ang tinud-anay nga gugma. Suma pa sa best-selling author sa libro nga Love and Respect nga si  Emerson Eggerichs,  “Women need love. Men need respect. It’s as simple and as complicated as that.”

6.Kinahanglan kahibalo maminaw sa tagsa-tagsa ninyo nga habig. Aduna mo’y saktong kumunikasyon para maluwas pa ang inyong nagtakilid nga relasyon.

Ayaw na balika ang nangagi ninyo nga problema nga hagbay ra nga nasulbad. Adto mopunting sa kasamtangang suliran nga angayan hatagan ninyo og pagtagad.