Nasaypan

CEBU, Philippines - Nagkatawang gipadayag ni Kakai Bautista nga  nasaypan sila ni Ahron Villena nga mag-inahan ug anak sa dihang nitikang sila sa Japan.  Ang duha gidungog nga duna’y espesyal nga relasyon.  “Ang supal ng face ng immigration officer ng Japan, napagkamalan niya ako... 'Is he your son?' Sabi ko, 'No, he is my friend.' Tapos nag-sorry siya, 'I'm very sorry.' Sabi ko, 'It's okay just let me pass.' Nakakatuwa," suma pa ni Kakai sa interview niya sa Umagang Kay Ganda kagahapon.

Teddy mibilib ni Dennis

Ang respetadong kolumnista  nga si Teddy Boy  Locsin  nipadayag nga pang-Oscar Awards ang performance ni Dennis Trillo sa pelikulang Felix Manalo. Suma pa nga nahatagan gyud ni Dennis  og hustisya ang iyang role.

Kris ug Carl nagbalik?

Nasigpatan nga nag-date sa miaging adlaw sila si Kris Bernal ug Carl Guevarra busa nitumaw ang mga pagduda nga nagbalik na ang duha.  Makadaghan na higayon nga magbuwag ang duha apan magbalik ra usab dayon.

Mibuhat ra sa trabaho

Gitataw ni Gerald Anderson nga wala siya kulbai atol sa iyang production number sa ASAP kung diin kadungan niya sa entablado ang kanhi niya nga mga uyab nga sila si Maja Salvador ug Kim Chiu. Gibutang ra gyud ni Gerald sa iyang huna-huna niadtong higayona nga makahatag sila og kalingawan sa audience.

Wish I May

Giusab na ang titulo sa drama series  nila ni  Miguel Tanfelix ug Bianca Umali. Gikan sa  titulong May Be This Time, giusab na kini ngadto  sa Wish I May.  Gibase kini sa hit single ni Alden Richards nga mao usab ang theme song sa maong serye.

Tinudloan ni Gaffud

Ang talent manager sa mga beauty queen nga si  Jonas Gaffud maoy nagtudlo sa  bida sa afternoon series  nga Destiny Rose nga si Ken Chan kung unsaon paglakaw nga susama og beauty queen. Sa umaabot nga mga episode sa maong serye, moanam-anam og lugwa ang babaye nga karakter ni Ken.

Mini-reunion

Aduna’y mini-reunion nga nahitabo sa pipila ka mga cast sa drama series kaniadto sa ABS-CBN nga Tabing Ilog.  Ang maong drama series gikagubtan kaniadto sa teenagers gikan sa 1999 hangtud 2003. Mitambong sa maong reunion niadtong Lunes sa gabii mao sila si John Lloyd Cruz, Kaye Abad, Desiree Del Valle ug Paula Peralejo. Wala katambong ang uban gumikan sa ka-busy. Kini naglangkob nila ni Jodi Sta. Maria, Baron Geisler, Patrick Garcia ug Paolo Contis.

Pasagdan na lang

Tsika pa ni Enrique Gil nga daghan siya og nakat-onan sa  kontrobersya nga iyang nasugatan kalabot sa pagkahubog niya sa eroplano. Apan iyang gitataw nga dili siya makapugong sa mga tawo nga nagmugna og laing version sa istorya.

Gipaluyohan sa GMA

Malipayong gipahibalo ni Willie Revillame nga dili na siya  blocktimer sa  GMA Network gumikan kay co-producer na ang network sa iyang Sunday show nga Wowowin.. “Magkasama na po tayo. Kasama na po kami sa pamilya ng GMA, Kapuso channel,” suma pa sa TV host. 

Pag-umangkon ni Gwen pasok sa The Voice-USA

Nakasulod sa blind audition sa “The Voice-USA”  ang 26 anyos nga Pinay singer nga si Amy Vachal kinsa nataypan sa mga hurado niadtong Martes nga episode sa maong show.

Pag-umangkon si Amy ni Cebu 3rd District Representative Gwendolyn Garcia ug nahugyaw kaniya ang mga tawo sa dihang giawit niya ang 1930’s classic standard “Dream A Little Dream of Me.”

Siya mismo ang miduyog sa iyang kanta gamit ang acoustic guitar.  Tulo ka mga hurado ang nipatuyok sa ilang lingkuranan, samtang ang laing usa nagmahay nga dali niyang nakumpleto ang iyang team busa dili na siya mahimong mopindot sa iyang buzzer.

Ang singer o vocalist sa Maroon 5 nga si Adam Levine nagkanayon nga, “Not only am I sad that I didn’t get to turn for you, but you could win this whole thing.”

Ang laing hurado nga si Gwen Stefani nikomento og, “First of all, I don’t have a beautiful Pocahontas, fairy princess, angel-like singer on my team. You’re creative with the way that you’ve performed and you seemed like a real honest artist. I can really help you on this journey, because I did this already. I feel like we could have such a connection.”

Nagpakiluoy kang Amy ang usa ka hurado nga si Blake Shelton nga unta siya ang pilion sa Cebuana singer.

“Please, Lord! Please pick me!, nagkanayon si Blake.

Nakadayeg og maayo sa iyang performance ang laing hurado nga si Pharrell Williams kinsa maoy napilian ni Amy isip iyang coach.

“I would be unbelievably appreciative to have the opportunity to aid you in that journey…Let me be the guy that can help you explore that side,” nagkanayon si Pharell.

It’s Showtime gipatawag sa MTRCB

Gipatawag sa  Movie and Television Review and Classification Board (MTRCB) ang mga executive sa noontime show nga It’s Showtime sa ABS-CBN Channel 2 isip aksyon sa nadawat nila nga reklamo nga matud pa nga susama nga gibugaw ngadto sa mga lalaki  si ¬Angelica Jane Yap o nailhan isip “Pastillas Girl”.

Sa suwat nga gipadala sa MTRCB, ilang ipatawag ang It’s Showtime director nga si Norbert Vidanes, Business Unit Head Reily San¬tiago ug Executive Producer Mark Rejano.

Aduna’y mahitabo nga dayalogo uban sa MTRCB- Gender And Development (GAD) committee karong  Oktubre 13.

Gipadayag ni MTRCB Chairman Atty.Toto Villareal nga kinahanglan nga tubagon sa maong show ang mga reklamo nga  ilang nadawat.

Kahinumduman nga niawhag ang Gabriela Party-list ngadto sa MTRCB nga imbestigaron ang nadawat nila nga report nga gibugaw si Pastillas Girl ug giingong nakalapas kini sa katungod sa mga babaye. 

Carmen Soo nagminyo na

Giangkon sa Malaysian model/actress nga si Carmen Soo nga nagpakasal na sila sa iyang boyfriend nga si Benson Tan nga susama ra gihapon niya og nationality.

Usa kini ka engrandeng beach wedding nga gipahigayon didto sa Bali, Indonesia sa miaging semana.

Nasayran nga nisikat si Carmen dinhi sa Pilipinas sa dihang nagkapares sila ni Jericho Rosales sa seryeng Kahit Isang Saglit sa ABS-CBN niadtong 2008. Nahimo usab siya nga kabahin kaniadto sa noontime variety show nga Wowowie.

Gawas sa Pilipinas, naglawig usab ang iyang career kaniadto sa Hongkong diin nahimo siya nga sikat nga modelo ug nalakip sa pelikula ni Jackie Chan nga “Gorgeous”. (BANAT NEWS)