Dili mabangbang ang ka trending

CEBU, Philippines - Wa pa gani nagsugod ang Eat Bulaga kagahapon, nikapin na  usa ka million ang tweets gamit ang  #ALDUBMaiDenHeaven. Kahinumduman nga niadtong nilabay nga Sabado, nihipos og 2.5 million tweets usab ang hashtag pahinungod sa AlDub.

Mubalik na gyud

Gitakda na nga mulugwa sa telebisyon sunod bulan ang second season sa Your Face Sounds Familiar isip hulip sa The Voice Kids of the Philippines kansang mananaog mahibaw-an na karong gabii. Matud pa ni Jed Madela labihan matud pa ka maayo sa mga contestants nga hapit na ipailaila sa publiko. Nag-taping na sila sa nilabay nga adlaw, diin kauban gihapon niya sila si Gary V.  ug Sharon Cuneta isip mga hurado ug si Billy Crawford gihapon ang host.

Dili sikat

Gisugilon ni Coco Martin nga sa ilang panimalay wala matud pa superstar treatment para niya. Gani niya pa, dili sila maghisgot kun unsa siya ka sikat karon. Si Coco gitakdang mulugwa pag-usab sa telebisyon alang sa Probinsyano, ang TV version sa pelikula ni anhing Fernando Poe Jr., nga isalida sa ABS-CBN.

Nagbalik?

Nasigpatan nga nagkuyog sa usa ka party sila si Chris Villongco ug James Reid niadtong nilabay nga adlaw. Ang duruha kanhi manag-uyab sulod sa tulo ka tuig, apan nagkabuwag niadtong nagsugod na ang ka sikat ni James isip loveteam ni Nadine Lustre nga naila na karon kaayo isip JaDine.

Anne ni-donate og tambal

Gipasalamatan sa Philippine General Hospital si Anne Curtis gumikan sa donation matud pa niini nga mga medical supply ug chemo medicines balig tulo ka bulan. Suma pa sa PGH dako kaayo og matabang ang donasyon ni Anne ngadto sa mga pasyente nga mukabat og 250 ka buok matag semana.

Gikuninitan ang magazine

Gikagubtan matud pa dayon ang Metro magazine cover ni Liza Soberano nga nigawas niadtong Biyernes. Suma pa sa mga tinugyanan sa maong magazine, usa pa lamang gani ka oras sukad gi-display sa newsstands ang maong magazine gikuninitan kini ug hapit na mahurot.

Dili magmuse

Gituldukan na ni Malou Choa Fagar, executive producer sa Eat Bulaga ang mga huhungihong nga murampa isip muse sa usa sa mga PBA teams si Maine Mendoza o Yaya Dub. Matud ni Fagar niadtong Biyernes, dili mag-muse si Maine sa bisan unsang team, busa walay kamatuoran ang nanggawas nga mga taho.

Magmatngon gyud

Nihunong na matud pa ang nagpada og death threats kang Max Collins sukad niya kini gibutyag. Matud ni Max nga aduna siyay gidudahan nga kaila ra usab niya ang nanghulga niya. Ang leksyon suma pa niya mao nga dili magpataka og salig ug kanunay mag-amping.