Mr. Right nagkasikat

CEBU, Philippines – Malipayon si Kim Chiu gumikan sa init nga paghangop sa mga tawo sa latest single niya nga Mr. Right. Giingong paborito na kini nga kantahon sa mga tawo.

Gihangop sa OFW’s

Gisalida na sa pipila ka dapit sa Middle East ang pelikulang The Love Affair nga gibidahan nila ni Dawn Zulueta, Richard Gomez ug Bea Alonzo.  Gihangop ang maong pelikula nga nagbase sa maong dapit.

Kris moatras?

Miulbo ang mga hungihong nga posibleng moatras si Kris Aquino sa pelikula nila ni Mayor Herbert Bautista sa Metro Manila Film Festival nga Mr. and Mrs. Split. Matud pa nga nagsige og kasakit ang TV host ug nagkinahanglang kini og saktong pahulay.

Xian gidayeg ni Ate V

Gibutyag ni Governor Vilma Santos-Recto nga maayo moarte si Xian Lim ug wala kini labad ikatrabaho sa dihang gigama nila ang pelikula sa Star Cinema kung diin kauban usab nila si Angel Locsin.

Seloso gamay

Giangkon ni Coleen Garcia nga seloso ang iyang boyfriend nga si Billy Crawford apan dali ra kini mokalma. “Cute na seloso lang pero hindi nakakatakot,” suma pa sa aktres.

Alexa nakahilak sa ticket

Puwerting lipaya ni Alexa Ilacad gumikan kay nakatan-aw gyud siya sa cocenrt ni Arian Grande niadtong Dominggo sa gabii. Suma pa nga ang ka-loveteam niya nga si Nash Aguas maoy naghatag kaniya og ticket sa maong concert. Nakahilak matud pa Alexa sa gibuhat ni Nash.

Kalingawan na lang

Gipadayag ni Martin del Rosario nga gihimo na lang niya nga kalingawan ang tsismis nga matud pa usa siya ka bayot ug duna pa gyu’y photo scandal.  “Source of entertainment ko na lang ‘yon,” hirit pa sa aktor.

Jaclyn nalingaw ni Wally

Nahimuot pag-ayo si Jaclyn Jose sa karakter ni Wally Bayola isip Lola Nidora sa Eat Bulaga.  Nasayran nga peg ni Wally ang role ni Jaclyn isip kontrabida sa seryeng Mundo Mo’y Akin.

Tanan uy

Giklaro ni Jodi Sta. Maria nga ang kinatibuk-ang cast ug production team maoy rason sa kakusog sa seryeng Pangako Sa ‘Yo’ sa ABS-CBN. Gisalikway ni Jodi ang obserbasyon sa ubang viewers nga siya maoy hinungdan sa kalampusan sa maong serye.

Zero sa final round

Wala’y nadala nga alaga ni Sarah Geronimo alang sa final round sa The Voice Kids. Ang mga gipanghuptan nila ni Leas Salonga ug Sarah Geronimo maoy pasok sa final round ug kini naglangkob nila ni Reynan Dal-Anay, Esang De Torres, Sassa Dagdag ug Elha Nympha . 

“Cute and sweet” ang mga Pinoy -  Ariana

Gihulagway sa international singer nga si Ariana Grande ang iyang Filipino fans nga “cute and sweet” atol sa iyang labing una nga concert dinhi sa Pilipinas.

Ang iyang concert nahitabo niadtong Dominggo sa gabii sa Mall of Asia Arena nga nagtangag sa titulo nga Honeymoon Tour.

Sa iyang usa ug tunga sa oras nga concert, gikanta niya ang 17 ka mga awit ug lakip na niini ang mga unod sa iyang mga album nga Yours Truly ug My Everything.

Midalit usab siya sa  iyang version sa kanta ni  Madonna  nga  “Vogue” , ug sa mga awit  ni  Whitney Houston nga  “I’m Every Woman” ug  “I Have Nothing.”

Gipasalamtan ni Ariana ang iyang Pinoy fans ug nilenggua gyud siya og, ” I Love You.”

Si Ariana maoy nagpasikat sa awit nga One Last Time ug Bangbang.