Echo gilangaw sa Cambodia?

CEBU, Philippines – Miulbo ang istorya nga matud pa gilangaw ang concert ni Jericho Rosales didto sa Cambodia. Suma pa sa report nga hinay kaayo ang promosyon sa maong concert hinungdan nga diyutay ra ang nasayod niini.

Tinagoang talento

Gipang-display na ang paintings ni Solenn Heussaff sa Bonifacio Global City .Tsika pa sa aktres nga ang painting maoy usa sa iyang kalingawan kung wala siya’y  taping.

Nakatabang ni Sharon

Giangkon ni Sharon Cuneta nga dako kaayo og natabang ang programang Your Face Sounds Familiar sa pagbanhaw ang iyang career. Nasayran nga gihangop dayon ang maong show sa publiko sukad nagsugod ang maong show sa ABS-CBN.

KZ andam na mag-concert

Plantsado na ang  first major self-titled solo concert ni  KZ Tan­dingan karong  Abril 17 sa Music Museum. Gipahibalo ni KZ nga nagkalain-laing genre ang iyang idalit sa maong konsyerto. “Sinisiguro ko pong ibibigay ko ang lahat para mapasaya po ang lahat ng magiging part ng napakalaking milestone sa music career ko,” nagkanayon si KZ.

Albert miatras sa Sugo

Miatras na si Albert Martinez sa pelikulang Sugo nga maghisgot sa kinabuhi ni  Felix Manalo, ang founder sa Iglesia ni Cristo (INC). Giingong apektado pa si Albert sa kamatayon sa iyang kapikas nga si Liezl .

Bearwin emosyonal

Nakahilak si  Bearwin Meily  sa dihang nadag-an niya ang P1 million nga premyo sa “Kapamilya, Deal or No Deal”. Suma pa sa komedyanteng aktor nga lingaw-lingaw ra unta ang iyang tumong sa pagsalmot niya sa maong show.”Nandito ako para maglaro from the very beginning. Binigay lang sa akin ‘tong briefcase na ‘to. Pera lang ‘yan. I want to play,” suma pa ni Bearwin.

Hugyaw nga studio

Todo monitor si Willie Revillame sa konstruksyon sa studio sa umaabot niya nga show sa GMA-7 nga Wowowin. Ang studio niini nahimutang sa Kalayaan Avenue sa Quezon City.  Gipaneguro ni Willie nga hugyaw ang studio sa iyang show sama sa iyang gibuhat kaniadto sa TV5.

Pacman giduaw sa big stars

Nagbaha ang international stars nga miduaw sa Pambansang Kamao Manny “Pacman” Pacquiao sa Wild Card Gym sa Los Angeles, California. Kini sama nila ni Mark Wahlberg, Bob Dylan, Justin Timberlake, Mario Lopez, Jeremy Piven ug Brad Pitt. Ang maong mga artista nipadayag sa ilang suporta kang Pacman.

Kutob ra sa serye

Gipasalig sa mga bida sa seryeng Dream Dad nga sila si Zanjoe Marudo ug Beauty Gonzales nga dili ma-develop sa usa’g-usa  gumikan kay susama sila nga dunay uyab. Mapasalamaton ang duha sa positibong feedback nga ilang nadawat kalabot sa ilang panagpares sa maong serye. 

Tinud-anay nga gugma

Nagmalaumon si Pauleen Luna nga makita sa mga anak ni Vic Sotto ang maayo niya nga intensyon ngadto sa aktor ug tinud-anay gyud ang gugma niya niini.”I love their father,” suma pa ni Pauleen.

Tsismis lang

Hugtanong gihimakak ni Shaira Mae ang taud-taud  nga tsismis nga matud pa naglive-in na sila sa iyang boyfriend nga si Edgar Allan Guzman.

Wala gihapon magtagad

Wala gihapon magtingganay ang kanhi mag-uyab nga sila si Louise delos Reyes ug Enzo Pineda. Gipadayag ni Louise nga malipayon ra gihapon ang iyang kinabuhi bisan pa man nga wala pa siya kauyab og balik.

Maayong exposure

Dakong exposure sa career ang nahatag sa programang Your Face Sounds Familiar ngadto sa mga artista nga contestants sa maong show nga naglangkob nila ni Melai Cantiveros, JayR, Nyoy Volante, Karla Estrada, Tutti Caringal, Maxene Magalona ug Jolina Magdangal.

Ex-girlfriend ni Piolo

Mibalik na sa showbiz ang actress-singer nga si Jenn Umali ug sugdan kini pinaagi sa iyang birthday concert karong Biyernes.  Nagsugod sa showbiz si Jenn sa dihang nakadaug siya sa usa ka segment sa Eat Bulaga nga “Beautiful Girl” niadtong 1990. Ka-batch usab niya si Piolo Pascual kaniadto sa ABS-CBN. Giangkon ni Jenn nga nagkauyab sila ni Piolo.

Album ni Kathryn naka-platinum

Nagmaya si Kathryn Bernardo gumikan kay nagplatinum status ang iyang self-titled album nga dunay onse ka kanta.

Base sa Philippine Association of the Record Industry (PARI) standards, ang platinum record award idalit ngadto sa album nga nahalinan og 15,000 units.

Usa sa sikat nga kanta ni Kathry nga unod sa maong  album mao ang  remake sa  “Mr. DJ” nga orihinal nga giawit ni Sharon Cuneta.

Kahinumduman nga sa miaging semana, nakaangkon usab og double platinum ang I Heart You album sa ka-loveteam ni Kathryn nga si Daniel Padilla.