Hugyawnatic

Dear Banat hugyaw,

Ganahan gyud kay ko mobasa og Banat News, ug mao gyud kini ang among basahon permi dinhi sa  Samboan, Cebu.

Ako diay si James, 25 anyos ug nagtrabaho  sa usa ka tindahan dinhi sa Samboan. Dugay nako nagplano nga magpadala og suwat ug karon pa gyud ko nakalugar.

Naa diay ko’y uyab karon, ang iyang pangalan kay Monilyn, 20 anyos ug nagpuyo siya sa Cebu City. Nag-eskwela siya sa usa ka dako nga eskwelahan sa kursong  education.

Ako lang diay i-share ang among kaagi o among love story. Nagkaila mi ni Monilyn sa dihang nagkauban mi sa usa ka beach outing.

Friend man siya sa akong higala nga lalaki, ug adunay time nga mangaligo ang ilang barkada sa nindot kaayo nga resort dapit sa amo. Maong giimbitar ko sa akong friend nga motapok kanila  kay kahibalo man siya nga dapit ra sa amo ang resort nga ilang giadtoan.

Maulaw gyud ko makig-istorya kanila, kay ang akong amigo ra baya akong close, pero wala ko magdahom nga dunay babaye nga nitagad kanako ug nag-istorya mi nga mura na kaayo mi og close.

Siya si Monalyn, ug nagkaistorya mi og maayo kay akong amigo naligo naman sa dagat ug kami na lang duha ang nahibilin sa cottage.

Sa pagsige namo og istorya, nagpabaga na lang gyud ko, nangayo ko sa iyang number, ug maayo gani kay wala’y nakadungog  nga kauban niya.

Wala ko magdahom, nihatag dayon siya sa iyang number, kay dili man daw siya arte ug bisan kinsa ang mahimo niya nga mahigala. Naganahan na hinuon ko og samot ug nakaingon ko nga basin na hinoun nga permi nako moadto og Cebu City aron makabisita niya, hehehe.

Naabot og usa ka buwan kapin sa  pagsige namo og teksanay,  nakaingon ko nga ganahan na ko niya kay dili man gyud siya arte busa nananghid ko kung puwede ba mi mag-meet kung molaag ko sa Cebu City ug nisugot man pud siya kay single man sad kuno siya.

Pag-abot og upat ka buwan, mo-aksyon na unta ko og panguyab niya apan mura kog nahugno kay gibasted ko niya ug niangkon siya nga dugay nga naa diay siya’y uyab apan tua kini nagtrabaho sa laing nasud busa  makalugar ra siya og tubag sa akong mga text message.

Bisan unsaon nako og pugong, dili ko makapugong sa paghilak kay gatuo ko nga dako ko og tsansa, kay tarong man gud ang pag-entertain niya nako pero giilad ra diay ko niya. Tan-aw nako nga gikalingawan rako niya isip tambal sa iyang kalaay samtang naa sa laing lugar ang iyang uyab.

Wala nami mag-teksanay sulod na sa kapin sa usa ka tuig, ug nahibong na lang nga nagpadala siya og kalit og text message ug gusto siya makigkita kanako.

Niangkon siya nga buwag na sila sa iyang  unom ka tuig nga boyfriend ug  gusto niya nga ako ang mo-comfort kaniya. Nisugot na lang ko, pero sa tinuod lang nahupas na akong feeling kaniya ug inamiga na lang gyud ang pagsige nako og tambag kaniya.

Pero pagkadugayan, sa pagsige nako og comfort kaniya, na-develop naman hinuon ko og balik uy ug nanguyab ko niya og balik. Wala nako damha  ug iya kong gisugot kay na-develop na pud siya kanako  tungod sa kaayo nga akong gipakita kaniya, laktod nga pagkaistorya, uyab nami, ug ako gyud nga seguraduon nga dili mi magkabuwag gumikan kay guwapa ug maayong  tawo gyud si Monalyn.  Mo-request diay ko og lyrics sa  Thinking Out Loud ni Ed Sheeran.

Salamat James sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY.

Mahimo sab nga pinaagi sa snail mail. Ang atong address mao kini:

Love Story

C/o Banat News

V. Gullas St. corner D. Jakosalem St.

Barangay Sto. Niño

6000 Cebu City, Philippines