Derek gibasura sa pelikula
CEBU, Philippines - Si Luis Alandy na ang himuong lead star sa pelikulang Mandirigma, ug dili na si Derek Ramsay. Nakugang si Derek sa maong taho ug sa press lang niya kini nahibaw-an. Suma pa sa aktor nga ganahan gyud unta siya sa iyang role sa maong pelikula apan wala siya’y mahimo kung dili kahuwat ang production team sa bakante niya nga mga oras.
Nangita og paagi
Human nagkatingog sila si Julia Barretto ug sa iyang amahan nga si Dennis Padilla, nihimo matud pa og paagi ang dalagita ug ang inahan niini nga si Marjorie nga magkatagad sila og balik ni Claudine Barretto. Una na nga gipadayag ni Julia nga giidolo niya ang iyang iyaan nga si Claudine, gani paborito niya ang pelikula sa aktres nga Anak.
Kris mibisita ni Jam
Gibisita sa Queen of All Media nga si Kris Aquino ang YouTube sensation nga si Jam Sebastian kinsa naka-life support karon sa tambalanan. Gihambin ni Jam ang stage 4 lung cancer.
Natagam
Gibutyag ni Rufa Mae Quinto nga kinahanglan nga dawaton gyud ang natural nga lawas nga gihatag sa Kahitas-an. Usa kini sa leksyon nga iyang nakuha sa pagpabutang niya og silicone sa iyang boobs. Suma pa ni Rufa Mae nga nagmahay siya nga nagpabutang siya niini gumikan kay mao kini ang hinungdan nga nasakit siya. Ipaubos ang aktres og laing operasyon aron ipatangtang niya ang silicone.
Isabelle sa MMK
Naghinam-hinam na si Isabelle Daza sa iyang paglugwa sa Maalaala Mo Kaya sa ABS-CBN. Suma pa niya nga mao kini ang unang higayon nga matan-awan siya sa maong longest drama anthology sa telebisyon.
Alex mag-concert sa Araneta
Matuman na gyud ang pangandoy ni Alex Gonzaga nga makabaton og kaugalingong concert. Suma pa ni Alex nga molugwa siya sa Araneta Coliseum alang sa iyang “AG From the East: The Unexpected Concert,” karong April 25 . Giseguro sa aktres nga maukyab gyud ang iyang fans niini.
Mahilom ra
Nagmalaumon si Diego Loyzaga nga maabot ra ang panahon nga mahunong ra ang pagsinukliay og bati nga mga pulong tali sa iyang amahan nga si Cesar Montano ug Sunshine Cruz. “I’m sure this is something na lilipas din,” suma pa ni Diego.
Charo mo-retiro
Mosilbi gihapon si Charo Santos-Concio sa ABS-CBN bisan pa man nga mo-retire na siya isip presidente sa maong network karong tuiga. Giingong kuhaon gihapon si Charo isip consultant gumikan sa maayo niya nga performance sa pagdumala sa ABS-CBN.
Vilma gipasidunggan
Gihatagan og Award of Merit si Batangas Governor Vilma Santos-Recto sa “IndieFest” Film Awards gumikan sa maayo niya nga pagkadala isip Loida Malabanan sa indie film nga Ekstra. Nasayran nga gipasalida na ang maong indie film sa pipila ka mga dapit sa Asya.
Kylie nalipay kang Aljur
Miulbo ang taho nga puwerting lipaya ni Kylie Padilla sa dihang nasayran niini nga mahatagan na og balik og mga proyekto si Aljur Abrenica sa GMA-7. Gihugon-hugon nga nagbalik ang duha.
Dingdong fans wala kauyon
Giingong dili uyon ang fans ni Dingdong Dantes sa pangalan sa aktor sa seryeng Pari ‘Koy. Suma pa nga magtangan siya sa pangalan nga Jericho Evangelista ug dunay nakaingon nga kombinasyon kini sa pangalan nilang Jericho Rosales ug Heart Evangelista. Si Heart maoy usa sa kaaway sa asawa ni Dingdong nga si Marian Rivera.
Action movie
Giatngan sa fans ni Robin Padilla ang iyang pelikula kung diin siya mismo ang direktor. Matud pa nga aksyon ang tema niini nga pagabidahan sa iyang anak nga si Kylie Padilla. Giingong dako ang magasto sa maong pelikula gumikan sa ginubatay nga mga eksena.
Dili gusto’g publicity
Gipadayag ni Patrick Garcia nga dili tanang detalye sa umaabot nga kasal nila ni Nikka Martinez ang iyang iyagyag sa kadaghanan. Kung mahimo, gusto niya nga ihilom lang ang maong okasyon.
Kinahanglan nga sexy
Tsika pa ni Bea Binene nga nagkadalaga na siya busa mabinantayon na siya sa pamorma sa iyang lawas. Gipaneguro ni Bea nga mamintinar ang iyang sexy body.
Jolo mag-bise gobernador gihapon
Gihimakak ni Jolo Revilla nga matud pa gobernador ang daganan niya nga posisyon karong 2016 sa Cavite. Suma pa sa aktor nga pagka-bise gobernador gihapon ang iyang daganan aron matiwas pa niya ang mga nasugdan niya nga projects.
- Latest