Aiza wala magpatandog

CEBU, Philippines – Gipadayag ni Aiza Seguerra nga bisan gikasal na sila ni Liza Diño nakadawat gihapon sila og mga  diskriminasyon sa ubang mga tawo. Una na nga gipadayag ni Aiza nga igo ra sila nagkahigugmaay sa usa’g-usa busa wala sila’y nakita nga dautan sa ilang relasyon. Suma pa ni Aiza nga dili gyud siya magpatandog sa mga negatibong istorya.

James nag-sorry sa taga CDO

Nangayo og pasaylo si James Reid sa iyang fans nga nag-atang kaniya sa Cagayan de Oro. Wala makuyogi ni James ang iyang ka-loveteam nga si Nadine Lustre sa mall show nila sa CDO niadtong Domingo gumikan sa iyang hilanat.

Crowd favorite natagak

Napuno sa emosyon niadtong Domingo ang pagkatagak ni Kokoi Baldo sa The Voice of the Philippines. Ubos si Kokoy sa Team Sarah ug daghan ang nakugang sa iyang pagkatagak ilabi na nga siya ang giisip nga crowd favorite. Gipili ni Sarah Geronimo nga magpabilin sa iyang team mao si Monique Lualhati.

Deretsohay sa trabaho

Mibalik dayon si Jennylyn Mercado sa Manila pagkahuman niya og tambong sa kasal nila ni Sen. Chiz Escudero ug Heart Evangelista gumikan kay duna pa siya’y taping sa seryeng Second Chances. Suma pa ni Jen nga importante kaayo ang eksena nga iyang gibuhat busa dili siya mahimong moabsent sa taping.

Luis misaludo kang Sandara

Misaludo si Luis  Manzano kang Sandara Park gumikan kay wala gyud mausab ang batasan niini bisan pa man sa kasikat niini karong panahona. Nagkahimamat ang duha sa bag-ohay lang nga pagtikang ni Sandara sa nasud.   

Kilig factor

Tsika pa ni Gabby Concepcion kusog gyud ang kilig factor nila ni Kathryn Bernardo ug Daniel Padilla busa wala na siya nahibulong nganong nagmalampuson ang mga proyekto sa duha. Nalakip si Gabby sa bag-ong pelikula sa Kathniel nga Crazy Beautiful You.

Bunot sa Magpakailanman

Hatagan og luna sa programang  Magpakailanman ang istorya sa kinabuhi sa Sugbuanon nga YouTube sensation nga si Ronald “Bunot” Abante.  Si Mark Bautista maoy modala sa karakter ni Bunot.

Sakit sa tutonlan

Wala pa naayo ang sakit sa tutunlan ni Lani Misalucha busa gitambagan siya sa doktor nga mopahuway una sa pagkanta sulod sa tulo ka buwan. Kahinumduman nga nahimong kabahin si Lani sa bag-ohay lang nga Ultimate Concert kauban nila ni Gary V., Regine Velasquez ug Martin Nievera.

Repeat concert gipanawagan

DIli pa segurado ang part two sa Ultimate concert  nila  ni   Martin  Nieverra ,  Lani  Misalucha,  Regine Velasquez ug Gary  Valenciano  sunod bulan gumikan kay dili magkatakdo ang schedule sa nahisgutan nga singers. Kahinumduman nga nagmalampuson ang  ilang Ultimate Concert sa miaging semana busa daghan ang nanawagan nga himoan kini og part two.

Gigamit ang talento

Si Solenn Heussaff  maoy make-up artist ug stylist ni Lovi Poe kinsa kauban niya nga bridesmaid sa kasal nila ni Heart Evangelista ug Sen. Chiz Escudero niadtong Domingo.

Mingawon dayon

Tsika pa ni Matteo Guidicelli nga seguradong mingawon dayon siya sa iyang girlfriend nga si Sarah Geronimo gumikan kay panagsa na lang sila magkita sanglit ma-busy na siya sa taping sa Inday Bote. Paningkamotan na lang sa aktor nga iyang makauban ang singer sa mga bakante niya nga oras.

Honeymoon

Kung sa Maldives nag-honeymoon ang bag-ong gikasal nga sila si Yeng Constantino ug  Pastor Victor ‘‘Yan’’ Asuncion, sa Japan usab nitikang ang  bag-o pud nga magtiayon nga sila si  Senator Chiz Escudero ug Heart Evangelista.

Vin masinabtanon

Gipadayag ni Vin Abrenica nga suportado niya ang career sa iyang girlfriend nga si Sophie Albert busa dili siya magselos kung lain ang kapares niini. Si Sophie maoy kapares ni Ahron Villena sa Wattpad series nga Cupid Fools.

Yassi nasakitan

Giangkon ni Yassi Pressman  nga nasakitan gyud siya sa iyang pagkatagak sa musical-variety show sa  GMA Network nga Sunday All Stars (SAS). “Ipinaliwanag naman nila kung bakit kailangan magtanggal at naiintindihan ko naman. Kaya lang, nakakalungkot talaga, kasi hahanap-hanapin din ng katawan mo yung ganung routine every week,” suma pa ni Yassi.

Aicelle in a dozen ni Ryan Mark

Nagsugod siya sa industriya niadtong 2005, human siya nahimong first runner-up sa second season sa GMA7 reality show Pinoy Pop Superstar. Karon, usa na siya sa labing kasaligan nga mga mang-aawit sa nasud. Siya si Aicelle Anne Santos o mas naila isip Aicelle Santos ug makit-an matag Domingo sa Sunday All Stars, kansang tingog dili gayud mabentahaan.

Kamatuoran nga usa siya sa mga lig-on nga mang-aawit sa nasud karon mao ang pasidungog nga iyang nadawat gikan sa prestihiyoso nga ‘Aliw Awards”. Si Aicelle ang napili nga Best Actress for a Musical sa nilabay nga tuig pinaagi sa iyang hugyaw nga performance isip bida sa Rak of Aegis, diin nidala siya sa papel nga Aileen, usa ka promodizer nga kinahanglang mupili unsay iyang sundon: ang pagpangita og tiunay nga gugma o paggukod sa iyang pangandoy.

Ug karong umaabot February 25, subling paambitan ni Aicelle ang iyang abilidad sa pag-awit, diin gipaabot nga mubirit sab siya sa mga kanta sa Aegis, pinaagi sa iyang birthday concert nga giulohan og Class A. Ipahigayon kini didto sa Philippine Educational Theater Association (PETA) theatre.

“What I do is I try to sing every day and learn my songs thoroughly while doing promos for the concert. Gusto ko kasi na dito sa concert, makita nila kung sino talaga ako as a performer,” nagkanayon siya.

Makauban ni Aicelle sa mao niyang birthday concert ang mga personalidad nga nakatabang sa iyang paglambo isip singer.

Heart nakahilak sa mensahe sa iyang amahan

Nagpadala  og suwat ang amahan ni Heart Evangelista  bisan pa man nga wala kini motambong sa kasal sa ilang anak  niadtong Domingo.

Sa wedding reception nga gihimo sa  Toscana Garden, Balesin Island sa Quezon Province, gibasa sa ig-agaw ni Heart nga si  Happy Ongpauco ang mensahe nga gipadala sa amahan sa aktres nga si Reynaldo Ongpauco.

Aduna’y mga obserbasyon nga insulto ang maong mensahe ngadto sa bana ni Heart nga si Sen. Chiz Escudero.

Ang maong mensahe nagkanayon, ”If the time comes that we see that you and Chiz are happy and if I see him loving you the way you deserve to be loved, I will come knocking at your door.”

Nakahilak si Heart sa mensahe sa iyang amahan busa pipila ka netizens ang nakaingon nga wala na lang unta gibasa sa atubangan sa daghang tawo ang maong mensahe gumikan kay segurado gyud nga masakitan niini ang magtiayon ilabi na ngadto kang Sen. Chiz.