Julia maoy nangandam

CEBU, Philippines – Nangunay mismo si Julia Barretto sa preparasyon sa iyang debut. Mahitabo ang usa ka engrandeng birthday party karong March 10 sa usa ka five star hotel didto sa kaulohan.

Special guest

Tsika pa ni Ai Ai delas Alas nga dili gyud niya  kalimtan ang kabuotan ni Richard Yap busa usa kini sa iyang special guest sa iyang valentine concert karong February 12 sa  Solaire Hotel. Nagkauban sila si Ai Ai ug Richard kaniadto sa seryeng  'My Binondo Girl sa ABS-CBN niadtong 2011.

Eula mitin-aw sa isyu

Giklaro ni Eula Caballero nga wala siya magselos sa dakong atensyon nga gihatag sa  TV5 ngadto kang  Jasmine Curtis-Smith. "Hindi po totoo 'yon," suma pa ni Eula.

Nagpungasi ang  trabaho

Duha ka mga serye ang nagdungan og abot ngadto kang Dominic Ochoa busa todo balanse siya sa iyang karong panahona. Nasayran nga gawas sa Oh My G! , nalakip usab si Dominic sa  Nasaan Ka Nang Kailangan Kita .

Dili magdugay?

Gikataw-an lang si Angeline Quinto sa iyang mga kritiko gumikan  kay nagpungasi ang gugma niini ngadto kang Erik Santos. Napanglantawan nga di magdugay ang giingong espesyal nila nga relasyon.

Bea mitingog

Gibutyag ni 2013 Miss International Bea Rose Santiago nga dili na angayan himoong isyu ang national costume sa iyang higala nga si  MJ Lastimosa sa preliminary round sa Miss Universe gumikan kay ang labing importante niini mao ang tawo nga nagsul-ob niini. Kahinumduman nga napuno sa pagsaway ang national costume ni MJ gumikan kay matud pa wala kini muhaom sa gidala niini nga nasud.  "It's never about the clothes, it's always about the woman behind the dress," matud pa ni Bea.

Zsa Zsa gisaway

Naputos sa mga pagsaway ang nadawat ni Zsa Zsa Padilla sa iyang pagkanta kagahapon og Thinking Out Loud sa  ASAP. Suma pa sa mga himantayon nga wala mahatagi ni Zsa Zsa og hustisya ang maong awit nga gipasikat ni Ed Sheeran.

Saab ug Jim nagpakasal

Gikasal na si Saab Magalona sa iyang hinigugma nga si Jim Baccarro niadtong Sabado, January 24 didto sa   Baguio City . Ganahan kaayo ang duha sa Baguio  City busa sa maong dapit sila nanumpa sa ilang kaminyoon.

Robin nasagmuyo

Gibutyag ni Robin Padilla nga duna gyu'y kakulangan sa paghatag og suporta ang mga kadagkoan sa Metro Manila Film Festival busa nahimutang lang sa ikapito nga puwesto ang pelikula niya nga  Bonifacio: Ang Unang Pangulo. Nasayran nga giendorso kini sa Department of Education (DepEd) apan dunay mga tinun-an niadtong Disyembre ang nasagmuyo gumikan kay wala sila makakita sa pelikula gumikan kay minos lang ang mga sinehan nga nagpasalida niini.

Dedma galore

Gipadayag ni  Ruffa Gutierrez magsige gihapon og padala og mensahe kaniya pinaagi  sa email ang iyang ex-husband nga si Yilmaz Bektas . Suma pa ni Ruffa nga wala gyud siya ka-reply niini gumikan kay malipayon na siya sa iyang kinabuhi karon ilabi na nga duna na siya'y boyfriend.

Rico naglikay ni Bamboo?

Miatras si Rico Blanco sa dakong concert nga mahitabo sa Mall of Asia Arena karong January 31 kung diin makauban unta niya ang mga sikat nga mga mang-aawit ug rock bands. Wala mosulti si Rico sa rason sa iyang pag-atras apan dunay mga nagduda nga dili lang gusto ang singer nga makauban niya sa entablado ang kauban niya niadto sa grupong Rivermaya nga si Bamboo.

Glaiza dunay album

Nagpaabot pa si Glaiza de Castro sa sunod niya nga proyekto sa GMA-7 busa ang pag-release sa iyang album maoy iyang gikabisihan karon. Nag-ulohan kini og Synthesis ug ang aktres mismo maoy naggama niini.

Claudine nahiubos ni Atty. Topacio?

Gidungog nga matud pa dili na ganahan motagad si Claudine Barretto kang Atty. Ferdinand Topacio human kini mibiya sa iyang mga kaso nga gipasaka ngadto kang Raymart Santiago. Naproblema og maayo ang aktres sa kalit nga pag-atras sa iyang abogado.

Big project ni Xian

Ang Kapamilya star nga si  Xian Lim maoy mohatag og kinabuhi sa tingog  sa pelikula sa  sikat nga  bear sa  United Kingdom, ang Paddington. Gi-produce ni David Heyman ang maong pelikula nga mao usab ang producer sa  pelikulang Harry Potter.

Rich mopadayon sa pagtungha

Target gyud ni Rich Asuncion nga makahuman sa kolehiyo busa ipadayon gyud niya ang iyang pagtungha sa kursong BS Tourism sa  University of the Philippines- Diliman. Giingong magsugod na siya sa iyang thesis sa sunod nga semester.

James gidepensahan sa fans

Tak-om gihapon ang kampo ni  James Reid kung kinsa ang babaye nga gikahalok niini niadtong Sinulog. Hinuon midepensa ang fans sa aktor kung diin matud pa dili kini isyu ug dunay katungod si James nga malingaw sa gitambongan niya nga party.

Kathniel sa Crazy Beautiful You

Gikan sa working title nga   "There Was A Boy, There Was A Girl," nakapili na ang Star Cinema og  official title  sa umaabot nga pelikula nila ni   Kathryn Bernardo ug  Daniel Padilla, ug kini nag-ulohan og  "Crazy Beautiful You" . Instagram.

Sukad gipahibalo sa Star Cinema ang maong movie project, nahimo dayon kini nga trending sa Twitter niadtong Sabado sa gabii.

Nasayran nga nagbaha ang fans sa Kathniel worldwide ug wala gyud kini nagpadala sa mga negatibong isyu sa ilang mga idolo.

Solenn gusto'g hilom ug simple nga kasal

Gibutyag ni Solenn Heussaff nga wala pa'y final date ang kasal nila sa iyang Argentinian boyfriend nga  si Nico Bolzico ug wala pa gyud masugdi ang pagplano niini gumikan kay wala sila'y gidalian.

Suma pa ni Solenn nga bisan engaged na sila ni Nico , ilaha pa gyud nga gi-enjoy ang kinabuhi nila isip manag-uyab ug ang labing importante nga segurado na gyud silang duha nga sila maoy mag-uban sa pagpaso sa altar sa kaminyoon.

Gusto ni Solenn nga hilom ug simple lang kasal nila ni Nico ug dili sama sa ubang artista nga kisaw kaayo ang pagpakasal.

Samtang naghinam-hinam na si Solenn sa umaabot nga kasal sunod buwan  sa iyang mga higala nga sila si Heart Evangelista ug Sen. Chiz Escudero.

Sequel sa English Only Please kumpirmado na!

Gikumpirmar ni Derek Ramsay nga dunay sequel ang pelikula nila ni Jennylyn Mercado nga English Only Please.

Kahinumduman nga nakadawat og daghang mga pasidungog ang maong pelikula sa miaging Metro Manila Film Festival 2014 kung diin napili nga best actor si Derek, samtang best actress usab si Jennylyn.

Suma pa ni Derek nga wala pa hinuo'y detalye kung ilaha pa ba kini nga ipasalmot sa  MMFF ang sequel sa nahisgutang pelikula.

Nasayran nga nagbaha ang movie projects ni Derek karong tuiga kung diin usa na niini ang pelikula nila ni Kris Aquino sa Star Cinema.

Giingong hatagan usab siya og proyekto sa Viva Films kung diin makapares gihapon niya si Jennylyn. 

Andi ug Jake nanuroy sa Singapore

Nasigpatan nga nanuroy sa Singapore ang kanhi mag-uyab nga sila si Andi Eigenmann ug  Jake Ejercito  ug kauban nila ang  ilang barkada.

Wala hinuon matino kung nagbalik ba sila si Andi ug Jake apan duna pu'y niingon nga nagkauban lang ang duha gumikan kay hagbay naman nasabotan sa ilang barkada ang maong bakasyon.

Samtang ang gidungog nga bag-ong inspirasyon ni Andi nga si Bret Jackson giingong ni-post og makaukay nga mensahe nga nagkanayon," Cheater, Cheater."

Nagdumili hinuon pagbutyag si Bret kung kinsa ang gipasabot sa iyang tweet.