“Anay”

“Dapat may valid reasons kung dapat nga magselos, yan kasi nakakasira sa relasyon. Parang anay yan, maliit na insekto lang pero pag-umatake, sira pundasyon ng poste.” Mao ni tubag sa akong higala nga taga Manila dihang gipangutana nako niadtong nilabay nga adlaw og seloso ba siya. Ug nahugyaw ko sa iyang tubag. Ilabi na ang pagtindi niya sa anay ug sa poste. Pakpak!

Husto dili ba? Kun magabok gyud ang relasyon kun sudlan na og selos. Maguba gyud ang balay kun kutkuton na sa anay ang pundasyon niini. Ang selos magsugod sa ginagmay apan kun imong pasagdan mudako kini ug malisud na nga masulbad. Kun masulbad man gani, dili na mahibalik sa karaan nga relasyon ang tanan gumikan kay magpabilin diha sa imong panumduman ang unsa man gani nga imong nakita o nakaplagan nga maoy rason sa imong gibati nga pangabubho o selos. Sa samang higayon bisan unsa kadako sa balay ug ka lig-on, kun masugdan na kini pagkutkot og anay, maremedyohan man tuod apan aduna nay lama sa kinutkutan. Pakkk!

Ang anay gagmay ra nga mga nilalang. Apan hinumdumi nga ang tanang dagko nagsugod sa gagmay ug ginagmay. Ang P100 dili makumpleto ang kantidad kun kuwangan kini og P1. Ang iro magsugod sa pagka itoy. Ang cat magsugod isip kitten. Kana ug daghan pang sanglitanan. Ang punto mao nga angayan kitang magmatngon kay ang gamay nga rason ug hinungdan siguradong mugun-ob og mga relasyon ug kabutangan kun pasagdaan. Hinungdan nga angayan kita nga magmatngon ug magmabinantayon diha sa atong mga panikaysikay ug mga paghugoyhugoy. Pakpak!

Sa maong sitwasyon sa mga manag-uyab angayan nga istoryahan ang mga ginagmay nga mga butang nga nakapasakit sa imong hinigugma. Ang mga magtiayon angayan usab nga tukion ang ginagmay nga kahiubos nga gihambin sa imong kapikas sa kinabuhi. Ingon bitaw sila, ang sekreto sa usa ka hapsay nga relasyon mao ang dili pagpa-ugma sa unsa man ugaling nga wala ninyo mahisabti. Angayan matud pa nga dili una matulog kun ugaling wala nagkasinabot ang magtiayon o adunay gamay nga panagbingkil. Gumikan kana kay gagmay ug ginagmay nga mga rason ug hinungdan daw sama og anay nga inanay nga mukutkot sa pundasyon sa usa ka relasyon, kaminyuon man, pagminahalay o panaghigalaay.

Ang Anay. Bow! Awww!

* * *

Hi Baby Rose Bardillo nga cashier diha sa Apurado’s diha ubos sa Sampaguita Suite sa Fuente kay diehard reader gyud kuno siya sa Banat News Hugyaw ug sa okRYAN uy. Nikaon ko diha last week wa gyud siya kaantos ug nangutana gyud kun ako bay Ryan Mark. Infairness, maayo siyang muabi-abi og customer and magpasalamat gyud inig human nimo’g bayad. Nakabasa tingali dinhi nga saputon ko basta isnabera ang sales clerk ug cashier. Hahahahaha. Hello sab kang Merlyn Gutierrez, nga sama kang Baby, wala sab nakaantos ug nangutana gyud nako adtong Biyernes sa buntag paghuman sa Hubo Mass diha sa Pilgim Center kun ako ba ang naa sa Banat kay kaila matud pa siya nako kay sige sab siya’g basa. Taga Tubigon, Bohol siya apan kasamtangan nga anaa sa Talisay, City kay nagtungha aron mamahimong caregiver. Salamat ninyo ha! Naa man sab gyud diay mubasa nato uy kay ma-inspire matud pa sila sa atong mga hisgutan dinhi. Salamat intawon! Pakpak para nila ug ninyo! Awww!