Layo sa usa’g-usa
CEBU, Philippines – Wala mag-uban sila si John Prats ug Isabel Oli niadtong Pasko ug mao usab kini ang mahitabo karong Bag-ong Taon. Mibakasyon si John sa Amerika uban sa iyang pamilya. Samtang gipili ni Isabel nga moistar sa Pilipinas.
Zsa Zsa gipugngan
Giingong nagplano diay unta si Zsa Zsa Padilla nga ibaligya ang balay nga kabilin ni anhing Dolphy apan gipugngan kini sa mga anak sa komedyanteng aktor. Matud pa nga gusto sa mga anak ni Dolphy nga makita gihapon nila ang balay sa ilang amahan.
Vina andam na mahigugma
Taud-taud na nga wala’y hinigugma si Vina Morales busa gipadayag sa singer nga andam na siya mosulod og balik sa usa ka relasyon. Gitataw hinuon ni Vina nga wala pa’y lalaki nga mipakita og labok kaniya.
Natag-anan
Gikatahong dili na angayan kahibudngan ang kadaugan sa mga bida sa English Only Please nga sila si Jennylyn Mercado ug Derek Ramsay kinsa maoy napili nga best actress ug best actor sa Metro Manila Film Festival 2014. Sa paglugwa pa lang kaniadto sa trailer sa maong pelikula, nahugyaw na daan ang publiko niini.
Nadawat na?
Dungan nga miabot sa awards night sa MMFF ang mag-uyab nga sila si Bernard Palanca ug Jerika Ejercito. Giingong gitagad si Bernard ni Manila Mayor Joseph Estrada busa migaan-gaan na ang iyang pamati. Una na nga nigawas ang tsika kaniadto nga matud pa wala pa madawat si Bernard sa pamilya ni Jerika.
Nagkasuod
Nasuod na ni Jennylyn Mercado si Nikka Martinez, ang hinigugma sa iyang ex-boyfriend nga si Patrick Garcia. Nagpahulagway ang duha ug ila dayon kini nga gi-post sa Instagram.
Benjamin naka-P172M
Nagmaya ang mga bitoon ug ang tibouk production team sa “The Amazing Praybeyt Benjamin” gumikan kay matud pa mikita na og P172 million ang maong pelikula ug gipaabot nga mosaka pa kini sa umaabot nga mga adlaw. Nasayran nga padayon nga gilinyahan sa mga sinehan ang maong pelikula nga gibidahan nila ni Vice Ganda, Alex Gonzaga ug Richard Yap.
Nanghatag og pinaskohan
Nanghatag og pinaskohan sa miaging adlaw sila si Kris Aquino ug Coco Martin sa mga tawo sa Baclaran. Miuban usab kanila ang ubang Kapamilya stars nga sila si Shaina Magdayao, KZ Tandingan ug Morissette Amon.
Paugat
Gihulagway ni KC Concepcion si Paulo Avelino nga iyang best friend. Tak-om gihapon ang duha sa tinud-anay nila nga istado.
Bag-ong Kathniel movie
Gawas sa seryeng Pangako sa ’Yo, giingong dunay nakaluto nga pelikula sila si Kathryn Bernardo ug Daniel Padilla apan wala pa kini titulo. Giingong mao kini ang Valentine offering sa Star Cinema.
Feng Shui nagmalampuson
Malipayon gipahibalo ni Kris Aquino nga mikita na og P88 million ang pelikula nila ni Coco Martin nga “Feng Shui” sulod sa upat ka adlaw nga pagpasalida niini sa mga sinehan. Todo pasalamat si Kris ngadto sa iyang fans gumikan sa init nga suporta nga iyang nadawat sa maong pelikula.
ABS-CBN nag-sorry
Nangayo na og pasaylo ang ABS-CBN sa publiko kalabot sa gipamaligya nila nga “statemen shirt” nga gipahinungod kang Pope Francis nga mobisita sa nasud sunod tuig.Gihunong na sa maong network ang pagpamaligya sa nahisgutang produkto. Kahinumduman nga nipahimangno sa publiko ang Catholic Bishops Conference of the Philippines (CBCP) nga dili dayon magpadala sa mga “statement shirt “ kalabot sa Papal Visit nga nagtangag sa linya nga “No Race, No Religion” gumikan kay basin dili maklaro ang pagsabot niini sa katawhan
Init nga suporta sa fans
Mapasalamaton kaayo si Sheryl Cruz sa iyang fans gumikan kay wala gyud kini mobiya kaniya bisan pa man nga nangaraan na siya sa showbiz. “All this time nandiyan sila for me at hindi nila ako iniwan,” matud pa ni Sheryl.
Panawagan ni Robin
Giawhag ni Robin Padilla ang fans ni Daniel Padilla nga molantaw sa pelikulang Bonifacio: Ang Unang Pangulo. Ang maong pelikula mikita pa lang og P10 million. Giingong dul-an sa P100 million ang nagasto sa maong pelikula.
Best Christmas gift
Gibutyag ni Ryzza Mae Dizon nga ang kadaugan niya sa Metro Manila Film Festival isip Best Child Performer maoy labing hugyaw nga nadawat niya nga Christmas gift . Kahinumduman nga naukay ang publiko sa iyang performance sa pelikulang My Big Bossing.
MMFF 2014 producer sa Bonifacio mikuwestiyon
Bisan pa man nga nanghakot og mga pasidungog ang pelikulang “Bonifacio: Ang Unang Pangulo” sa 40th Metro Manila Film Festival, nakapangutana gihapon ang producer niini kung nganong wala malangkat sa maong pelikula ang mga award nga Best Screenplay ug Best Director.
Ang maong pelikula nga gibidahan nila ni Robin Padilla ug Vina Morales maoy nilangkat sa mga pasidungog nga Best Picture, Best Musical Scorer, Best Theme Song, Best Cinematographer, ug Best Sound Engineer.
Nasayran nga si Dan Villegas maoy napili nga Best Director alang sa pelikulang "English Only Please" kung diin ang mga bida niini nga sila si Derek Ramsay ug Jennylyn Mercado maoy best actor ug best actress.
Giklaro hinuon ni Navarro nga wala siya’y pagsupak sa kadaugan sa “English Only Please” ug igo ra siya mikuwestiyon sa proseso sa pagpili sa mga mananaug.
“Sa mga nanalo, I want to congratulate them. Hindi nila kasalanan that they won. Lahat ng mga artista, of course, they gave their best. I only speak po for 'Bonifacio,'" suma pa sa producer sa Bonifacio nga si Rina Navarro kinsa nahinabi kagahapon sa programang “Umagang Kay Ganda” Samtang nagdumala sa MMFF nga si chairman Francis Tolentino nagkanayon nga patas gyud ang proseso sa maong kalihukan ug dili basta-basta ang mga hurado niini.
Adele mihimakak sa isyu
Hugtanong gihimakak sa Grammy-winning singer nga si Adele ang niulbo nga tsika nga matud pa nagbuwag na sila ni Simon Konecki.
Suma pa sa 26 anyos nga singer nga igo lang siya nikatawa sa dihang nakadungog sa maong taho ug iyang gitataw nga nagmalipayon siya karon sa relasyon nila ni Simon.
Matud pa ni Adele nga dili angayan touhan ang maong istorya ug masaligon siya nga wala’y makabungkag sa ilang relasyon.
Si Adele maoy nagpasikat sa awit nga "Someone Like You" , “Sky Fall” , “Rolling in the Deep” ug uban pa.
- Latest