Gitangtang kay di kamao!

CEBU, Philippines – Gi-intriga si Xian Lim nga matud pa gisawo lamang sa kauwawan hinungdan nga gidali paghatag og teleserye diin mag-uban sila ni Kim Chiu.

Suma pa sa mga tsismosa, naglabad matud pa ang ulo sa production sa umaabot nga teleserye “Bridges” gumikan kay dili matud pa makakuha si Xian sa gikinahanglan sa direktor nga emosyon bisan sa ka-simple ra sa eksena.

Matud pa may usa ka eksena nga niabot og 30 takes si Xian hinungdan nga nahukman matud pa nga tangtangon siya sa maong teleserye ug gipalutaw na lamang nga kinahanglan niyang unahon ang teleserye nga romantic –comedy nga pagabituonan nila ni Kim.

Kahinumduman nga si John Lloyd Cruz gyud ang orihinal nga gitanyagan sa role, apan niadtong giluto pa ang maong proyekto padung nga  mapupos ang iyang kontrata sa ABS-CBN nga hangtud karon wala pa ma-renew.

Sila si Jericho Rosales ug Maja Salvador ang kauban unta nga mga bida ni Loydie niining maong proyekto. Sa pagbalibad sa award-winning actor sa maong proyekto, si Xian ang gihulip, diin naka two taping days na siya.

Apan niining bag-o lamang nabalita nga gitangtang na si Xian sa cast sa “Bridges.” Daghan ang nahimuot sa maong kalambuan sanglit layo ra matud pa kaayo ang abilidad ni Xian itandi kang Loydie kun pag-arte maoy hisgutan.

Gikatahong si Paulo Avelino na matud pa ang gihulip kang Xian sa “Bridges.”

Alice gipahit sa tigre

Gipahit sa tigre ang paa ni Alice Dixson ug giingong nanglagom kini.  Giingong gihagwa-hagwa ni Alice ang tulo ka buwan nga Bengal Tiger ug kalit siya nga gipahit niini.

Online na lang

Gipistahan na lang online ang trailer sa horror film nga “Tragic Theater nga gibidahan ni  Andi Eigenmann. Kahinumduman nga nakadawat og rating nga “X” sa Movie and Television Review and Classification Board (MTRCB) ang maong pelikula busa dili mahimo nga ipagawas sa mga sinehan ang trailer niini.

Enzo dili mosalmot

Sukad sa pagsulod ni Enzo Pineda showbiz, naandan na niya nga magsaulog sa bag-ong tuig pinaagi sa himoong countdown sa GMA-7.  Apan sa pagsugat karong 2015, magpalahi na si Enzo ug gusto niya saulogon ang bag-ong tuig uban sa iyang pamilya busa dili siya kaapil sa tradisyonal na nga countdown sa GMA-7.

Stars Versus Me

Tsika pa sa kanhi  housemate sa Pinoy Big Brother All-In nga si Maris Racal nga nahimuot siya pag-ayo sa iyang role sa pelikula nila ni Manolo Pedrosa nga Stars Versus Me. Modala si Maris isip teenager nga mahiligon kaayo sa pagtuo og mga horoscope.

Career ni Derek nagpungasi

Bisan pa man sa mga problema nga nasugatan ni Derek Ramsay karong tuiga, wala gihapon siya magpatandog gumikan kay natabonan ra usab kini sa mga maayong nahitabo sa iyang showbiz career. Nasayran nga pinangga kaayo si Derek sa TV5 gumikan sa nagsagunson niya nga mga proyekto.

Lovi mitin-aw sa isyu

Gihimakak ni Lovi Poe ang niulbo nga taho nga matud pa mobalhin siya sa ABS-CBN. Suma pa sa aktres nga duna siya’y nakalinya nga projects sa GMA-7 busa hanap kaayo ang posibilidad nga motikang siya sa ABS-CBN sunod tuig.

Artista search

Adunay instant artista search nga himuon ang TV5 atol sa ilang New Year’s Eve special nga ipahigayon didto sa Quezon City Memorial Circle. Usa ka bongga nga fireworks display ang giandam sa maong kalihukan.

Aksyon og kabalaka

Gidungog nga nabalaka og maayo si Nora Aunor gumikan kay wala pa’y laing network ang mitanyag kaniya og proyekto sukad wala siya mo-renew sa TV5. Nasayran nga napupos ang kontrata ni Nora sa TV5 niadtong October.

Mitoy nakadaug

Gibutyag ni Mitoy Yonting nga seguradong daghan gyud siya og matabangan nga mga tawo human siya nakadaug og P900, 000 sa game show sa ABS-CBN nga “The Singing Bee” .

Birthday concert

Gisaulog ni Aiko Melendez ang iyang 39th birthday kagabii sa Crowd Bar sa  Mandaluyong City. Birthday concert ang gidalit niya ngadto sa iyang bisita ug lakip sa nikanta mao ang kanhi niya bana nga si Jomari Yllana ug ang anak nila nga si Andre.

Mga pagsulay

Gibutyag sa magsuong Toni ug Alex Gonzaga nga duna gyu’y panahon nga mingaw kaayo ang ilang Pasko gumikan sa kakuwang sa ilang kuwarta. Nahitabo kini niadtong 2000 sa dihang minos pa kaayo ang raket ni Toni ug napildi usab sa eleksyon niadtong tuiga ang iyang amahan. Samtang nagtungha usab si Alex niadtong higayona.

Ikaw na gyud Julie Anne!

Si Julie Anne San Jose maoy ikatulong OPM artist nga dunay album  nga nagtangag og diamond record. Nasayran nga moabot ngadto sa 150,000 units ang nahalin sa iyang self-titled album ubos sa GMA Records. Nag-una kaniya sila si Jose Mari Chan alang sa mga album nga Constant Change ug Christmas In Our Hearts, ug gisundan kini ni Nina alang sa  Nina Live album. “Yung makahabol po ng ganung klaseng status, it’s really an achievement for me,” matud pa ni Julie Anne.

White Christmas

Human nakakita og snow si Kim Chiu sa paglarga niya sa Canada sa miaging buwan, gusto niya nga makasinati niini ang iyang pamilya. Christmas gift ni Kim sa iyang pamilya mao ang paglarga og laing nasud aron makakita usab kini og snow.

Nightlife

Tigtambayan si James Reid sa mga  bar sa Taguig City basta wala siya’y lingaw. Gisaludohan ang aktor sa mga tawong nakabantay kaniya gumikan kay mapaubsanon gihapon kini bisan pa man sa iyang kasikat. 

Kubot dili mabentahan

Labing hugyaw nga special effects ang malantawan sa pelikula ni Dingdong Dantes nga  Kubot: The Aswang Chronicles Part 2  nga mosikad na karong December 24 sa gatosan ka mga sinehan sa lukop nasud.

“Kung nakita ninyo ang Part one, yung Tiktik, kung maganda ang special effects nun,   times five po ginawa naming ngayon sa Kubot,” nagkanayon si Dingdong ngadto sa mga sakop sa E-Group (Cebu Entertainment Group) sa iyang pakighimamat niadtong Domingo sa hapon.

Si Dingdong maoy co-producer sa maong pelikula uban sa Agosto Dos Production, GMA-Films ug Reality Entertainment.

Ang termino nga Kubot nagpasabot nga usa kini ka mangtas nga aswang nga wala’y pili sa tawo nga gusto niya nga biktimahon.

“Sinigurado talaga namin ang magandang istorya, yung magustohan talaga ng tao. Meron ding angle na nakakatawa pero nakakatakot sa bandang huli,” dugang pa sa aktor.

Malakip usab sa maong pelikula sila si Isabelle Daza, Lotlot de Leon, Ramon Bautista, Bogart The Explorer, Julie Anne San Jose, Abra, Joey Marquez, Elizabeth Oropesa ug ang beauty queen nga si Hanna Ledesma nga maoy mihulip sa karakter ni Lovi Poe.

Gidayeg sa aktor si Hanna gumikan kay dali ra kaayo kini makahimo sa gipabuhat niini nga mga eksena.

“Nag-audition talaga si Hanna bago siya nakapasok sa Kubot bilang kapalit ni Lovi.  Bagohan pa lang sa pag-arte, pero magaling talaga siya,” matud pa sa aktor.

Gipasigarbo ni Dingdong ang maayong paggama sa Kubot gumikan kay si Erik Matti ang direktor niini.

“Bilib ako kay direk, hindi yan titigil kapag hindi makontento sa eksenang ginawa namin,“ saysay pa ni Dingdong.

Dakong hagit alang kang Dingdong nga nahimong kabahin sa pelikula nga siya ra pud ang producer apan iyaha gyud napamatud-an nga mahimo ra gyud niya ang pagbalanse niini.

“Kung nandyan ako sa set, ang karakter ko lang ang iniisip.  Kung tungkol naman sa pera, pinag-usapan naming yan sa ibang oras para naman maging matulin tayo sa shooting, “ say pa sa aktor.

Una na nga gipadayag sa direkto sa maong pelikula nga moabot sa P80 million ngadto sa P90 million ang nagasto sa maong pelikula apan nagdumili si Dingdong pagkumpirma niini.

“Hindi ko sasabihin kung magkano ang nabigay, hahahaha.  Basta siyam  na buwan ginagawa namin ang pelikulang ito ,” niya pa.

Bisan sa kadaghang trabaho sa aktor apan pabilin gihapon kini nga mapahiyomon aron dili siya bation og kakapoy ilabi na karong panahona nga todo na ang preparasyon alang sa umaabot nga kasal nila ni Marian Rivera karong December 30.

“Handa na po ang lahat, depende lang po yan sa tao, kahit marami tayong ginagawa, ang importante na marunong ka magbalanse sa oras mo. Matagal naming pinaghandaan ni Marian ang kasal,  so handang-handa na kami!,” matud pa sa aktor.

Gibutyag ni Dingdong nga usa ka dakong butang sa kinabuhi ang pagpakasal busa gipaneguro gyud nila ni Marian nga mag-uban gyud sila hangtud sa kahangturan.

“Hindi ito isang laro, kasi tungkol na ito sa sarili natin. Sa lahat ng bagay na ginagawa natin, dapat may patungohan. Sa pagmamahalan namin ni Marian, ginagawa talaga namin ang lahat para lang makabuo ng isang magandang pagsasamahan. Excited na ako magkaroon ng sariling pamilya,” suma pa sa Kapuso actor.

Gipadayag sa aktor nga parti na ang mga Cebuano sa padayong pagsulbong sa iyang career gumikan kay kanunay gyud siya makadawat og init nga suporta niini sa nagkadaiya niya nga mga proyekto.

“Napapansin ko naman, kung meron akong mga mall show dito sa Cebu, palagi  ko talagang nakikita ang init na suporta ng mga Cebuano sa akin. Kaya isa ko kayo (mga Cebuano) sa aking pinasalamatan. Ang supporters ang dahilan kung successful ang career ng isang artista, kaya salamat talaga sa inyong lahat,” panapos pa ni Dingdong.

Samtang kauban ni Dingdong sa iyang pagduaw dinhi sa Sugbo ang iyang co-star sa Kubot nga si Isabelle Daza.