Solenn nakapuntos

CEBU, Philippines – Nakadayeg kang Solenn Heusaff  ang mga direktor sa pelikulang Tiyanak nga sila si Peque Gallaga ug Lore Reyes gumikan kay wala'y daghang reklamo ang aktres sa binuntagay nila nga shooting.

Special birthday party

Gisaulog ni Rhian Ramos ang iyang 25th birthday dili pa lang dugay uban sa mga bata nga dunay cancer. Naandan na sa aktres nga makig-uban sa mga bata nga dunay sakit sa higayon nga magsaulog siya sa adlaw niya nga natawhan.

Suporta sa uyab

Adunay espesyal nga partisipasyon si Pauleen Luna sa pelikulang My Big Bossing. Nisugot si Pauleen niini isip suporta sa iyang boyfriend nga si Vic Sotto nga maoy bida sa maong pelikula.

Michelle gibiyaan sa GMA

Wala'y ideya si Michelle Madrigal sa rason sa wala pag-renew sa GMA-7 sa iyang kontrata. Naghinam-hinam na ang aktres nga makatrabaho og laing network.

Tom nakulbaan

Gikulbaan pag-ayo si Tom Rodriguez sa dihang nilugwa sa iyang show nga Don't Lose the Money ang amahan ni Carla Abellana nga si Rey Abellana. Mao kini ang labing unang higayon nga nahimamat niya ang amahan ni Carla.

Claudine gidemalas

Ganahan na gyud mobalik si Claudine Barretto sa showbiz apan wala'y network nga interesadong mokuha kaniya. Una na nga gipadayag ni Claudine nga gimingaw na siya og maayo nga moarte atubangan sa kamera.

Awit ni Gloc 9 gipistahan dayon

Naghudyaka ang rapper nga si Gloc-9  gumikan kay nahimutang dayon sa unang puwesto sa Pinoy MYX Countdown karong semanaha ang latest single niya nga "Business Man". Adunay partisipasyon sa maong awit ang sakop sa Parokya Ni Edgar nga si Vinci Montaner .

Oras dili mag-abot

Gikatahong dili madayon ang pelikula nga pagabidahan nila ni Kris Aquino ug Marian Rivera. Matud pa nga dili mag-abot ang ilang mga oras busa giatras na lang ang maong proyekto.

Nagpadala og flowers

Tsika pa ni Miguel Tanfelix nga crush niya si  Bianca Umali busa nagsagunson ang pagpadala niya og buwak ngadto sa aktres. Giklaro hinuon ni Miguel nga wala pa siya'y plano nga manguyab kang Bianca gumikan kay puros pa sila bata.

Rita nagpasalamat ni Paul Jake

Nagpasalamat si Rita Avila ngadto kang Paul Jake Castillo gumikan kay usa kini sa nipalit sa iyang libro sa dihang nagpa-book signing siya dili pa lang dugay sa usa ka mall dinhi sa Sugbo.  Nakugang si Rita sa presensya ni Paul Jake sa maong kalihukan.

Friends ra gyud

Aduna pa'y komunikasyon sa usa’g-usa sila si  Ynna Asistio ug  Derek Ramsay. Giklaro ni Ynna nga wala sila'y relasyon ni Derek busa iyaha lang nga gipagamay ang tsismis nga matud pa duna sila'y tinagoan nga relasyon. "Hindi naman naging kami!," suma pa ni Ynna.

Mansion ni Coco

Target ni Kris Aquino nga i-feature ang mansion ni Coco Martin sa programa niya nga Kris TV. Gihagoan pag-ayo ni Coco ang maong balay busa iyaha gyud kini nga ipasigarbo.

Gisul-ob gihapon?

Tak-om lang si Jennylyn Mercado sa mga istorya nga matud pa gisul-ob gihapon niya ang singsing nga hinatag niadto sa iyang kanhi boyfriend nga si  Luis Manzano. Nitumaw ang maong istorya sa dihang gi-post ni Jen ang iyang hulagway sa Instagram kung diin duna siya'y gisul-ob nga singsing.

Tinud-anay na gyud

Gipadayag ni Vic Sotto nga tiguwang na siya busa wala gyud sa iyang huna-huna nga mangita pa og laing babaye. Dili gusto si Vic nga magduwa-duwa sa usa ka relasyon busa kontento na siya kang Pauleen Luna. "Sa edad kong ito, makikipaglaru-laro pa ba ako sa relasyon?," suma pa ni Vic.

Sugot dayon

Makita sila si  Alden Richards  ug Diane Medina sa music video sa bag-ong awit ni Jennylyn Mercado nga  "Basta Nandito Ka."  Mapasalamaton si Jen sa duha  gumikan kay wala gyud sila  magduda-duha sa  pagsugot sa dihang gitanyagan kini nga mahimong kabahin sa iyang music video.

Miss Cebu 2015 arangkada na

Pormal na nga gipaila-ila sa mga sakop sa Cebu City Tourism Commission ang 12 ka mga opisyal nga kandidata sa Miss Cebu 2015 nga mahitabo karong January 14, diha sa Pacific Grand Ballroom sa Waterfront Cebu City Hotel and Casino.

Ang maong mga kandidata naglangkob nila ni Hanica Rachael Ong, Feb Flores, Mary Cyrielle Wong, Aivy Mae Castro , Katherine Jumapao, Ria Liza Vestil, Lucena Rose Magdadaro, Catherine Mier, Rosalyn Clavano, Maria Genefe Navilon, Domenic Reynes, ug Wynonah VanJoy Buot.

Ang chairperson sa maong kalihukan nga si Georgia Felice Rama nibutyag ngadto sa mga sakop sa media nga nagmalamboon ang maong indigay sulod na sa 31 ka tuig.

Padayon nga mupili og mga kababaenhan nga dunay tagsa-tagsa ka mga adbokasiya ang Miss Cebu.

Matud pa niya nga ang maong indigay maoy usa sa nakatabang sa pagpalambo sa turismo sa dakbayan sa Sugbo gumikan kay ang mga mananaug niini maoy magsilbing modelo aron i-promote ang dakbayan.

"In its three decades in the industry, Miss Cebu has produced women who have also become the faces of the country and the world. Going through a series of screenings, background checking and workshops, a Miss Cebu finalist becomes equipped and reveals the best version of herself on the day of the competition," matud pa niya.

Ang Miss Cebu nagpresenta sa babaye nga dunay maayong karakter nga kahibalo mosagubang sa nagkadaiyang sitwasyon ug sa samang higayon adunay mga adbokasiya nga makahatag og kaayohan sa kinabag-an. Sama na lang sa kandidata nga si Wynonah VanJ nipadayag nga ang maayong programa sa edukasyon ug ang pagpanalipod sa kalikupan maoy usa sa iyang magsilbing adbokasiya.

Samtang ang law student sa University of San Carlos nga si Hanica Rachael nipadayag nga ang pagsalmot niya sa Miss Cebu maoy usa sa iyang pamaagi nga iyaha pa nga madiskubre ang mahimo pa niya nga mabuhat sa iyang kaugalingon ingon man usab ang pagtabang sa pagpalambo sa turismo sa dakbayan.

Ang Mass Communication graduate nga si Maria Genefe nipadayag nga makatampo ang iyang talent sa pagpaabot ngadto sa katawhan sa maayong programa sa dakbayan ug usa kini sa rason nga nisalmot siya sa nahisgutang indigay.

Wala usab nagduha-duha sa pagsalmot sa Miss Cebu ang kanhi  finalist sa Mutya ng Pilipinas 2014 nga si Aivy Mae gumikan kay usa man ka prestihiyosong indigay ang Miss Cebu.

Ang Miss Cebu 2014 nga si Cheriemel Diane Muego nisaysay nga mga lig-on gihapon ang mga kandidata sa Miss Cebu sunod tuig ug masaligon siya nga ipadayon gihapon nila ang pag-promote sa turismo sa dakbayan sa Sugbo.

Tambag ni Muego sa mga kandidata nga kinahanglan nga duna lang gyu'y salig  sa kaugalingon. Kahinumduman nga wala'y naangkon bisan usa ka special award si Muego  kaniadto busa wala niya damha nga siya pa gyud ang makoronahan sa labing dako nga titulo.