Deniece: Wala ko'y STD!

CEBU, Philippines - Gihimakak ni Deniece Cornejo ang mikatap nga istorya nga matud pa duna siya sexually transmitted disease (STD). Naanad na si Deniece sa mga intriga busa iyaha lang gipagamay ang maong report. Online business ug painting maoy gikabisihan ni Deniece karong panahona.

Lloydie giplanohan ni Ellen

Gipangandoy Ellen Adarna nga makauban sa trabaho si John Lloyd Cruz gumikan kay nabatyagan niya nga kalmado kaayo moarte ang aktor. Samtang nagpasalamat si John Lloyd ngadto kang Ellen gumikan sa positibo nga mensahe niini.

Kasal maoy unahon

Tsika pa ni Camille Prats nga bisan naa na siya'y boyfriend, wala pa sa iyang huna-huna nga masundan ang iyang anak. Gusto ni Camille nga mag-una ang kasal sa dili pa sila makabaton og anak sa bag-o niya nga uyab.

DJ modagan pagka-mayor

Nagplano ang aktor nga si DJ Durano nga temporaryong mobiya sa showbiz gumikan sa iyang laraw nga modagan pagka-mayor sa Sogod sa Probinsya sa Sugbo karong 2016 nga piniliay.

Alfred mibakasyon sa Europe

Gisaulog ni Alfred Vargas ang iyang birthday kagahapon ug gikatakda siya nga molarga karong adlawa sa Europe. Gusto sa aktor nga hatagan og igong oras ang iyang kaugalingon.

Bairon pag-ayo

Gipaubos og todo nga acting workshop ni Direk Mario J. delos Reyes sila si  Miguel Tanfelix ug Ruru Madrid gumikan kay pasuwayon ang duha nga makabaton og dakong role sa usa ka movie project.  Kasamtangang makita ang duha sa Magpakailanman partikular sa episode nga "Cain at Abel: Kalakal Boys" sa GMA-7 .

Bata pa si Coleen

Gibutyag ni Billy Crawford nga 22- anyos pa lang si Coleen Garcia busa wala pa siya'y plano nga manghagad og kasal niini gumikan kay nasayod siya nga daghan pa og mga pangandoy sa kinabuhi ang iyang girlfriend. Nagpangedaron si Billy og 32 anyos.

Enzo duna'y bag-ong uyab

Giangkon ni Enzo Pineda nga duna siya'y non-showbiz girlfriend busa nagpasabot kini nga hagbay ra siya naka-move on sa breakup nila ni Louise delos Reyes. Suma pa ni Enzo nga panahon na nga magmalipayon siya gumikan kay dili gyud kapugngan ang pagpitik sa iyang kasing-kasing sa bag-o niya nga uyab.

Robi saludo kang Luis

Tsika pa ni Robi Domingo nga mibilib gyud siya sa estilo ni Luis Manzano sa pag-host ug daghan gyud siya og nakat-onan niini. Gipadayag ni Robi nga dili na gyud mailog ang korona ni Luis.

Jake nakadaug sa NY

Ang Kapamilya star nga si Jake Cuenca maoy napili nga  Best Actor sa bag-ohay lang nga  Manhattan International Film Festival didto sa New York gumikan sa maayo niya nga performance sa pelikulang Mulat. Personal nga gidawat ni Jake ang iyang tropeyo.

Guji nakadawat na

Gipadayag ni Guji Lorenzana nga nasakitan siya og maayo sa panagbuwag nila ni  Kaye Abad niadto ug dunay mga panahon nga naghandum siya nga magkabalik silang duha . Samtang nagdagan ang panahon, anam-anam na nga nadawat ni Guji nga dili na gyud sila magkauli. Malipayon si Guji sa bag-ong lovelife karon ni Kaye kinsa maoy inspirasyon karon ni  Paul Jake Castillo.

Gihangop sa viewers

Malipayon sila si Nadine Lustre ug James Reid gumikan kay puros mga positibong feedback ang  ilang nadawat sa episode nila sa  Wansapanataym nga  My App Boyfie. Misamot kailado ang ilang tandem gumikan sa maong programa.

Muslim ang gusto

Kung si Robin Padilla ang pasultion, gusto niya nga Muslim pud ang mauyab sa iyang anak nga si Kylie Padilla.  Gipadayag kini ni Robin isip reaksyon sa lenggua ni Kylie nga type niya si Rayver Cruz.

Boyfriend ni Karla

Gipaila-ila na ni Karla Estrada sa publiko pinaagi sa programang Kris TV kagahapon ang iyang non-showbiz boyfriend nga si Mark Yatco.  Aduna'y construction company ang boyfriend ni Karla ug nagkaila-ila sila niini sa dihang nitambong siya sa birthday party sa iyang higala.