Pandora

CEBU, Philippines – Si Solenn Heussaff maoy mudala sa papel nga Pandora, ang misteryosa ug maanyag nga babaye sa Wawa River.

Nasayran nga ang Wawa River kanhi walay tatsa nga sapa, apan paglabay sa mga katuigan gipanamastamasan sa mga turista nga nibisita niini matag karon ug unya, diin ang hugaw nga gibilin, nakadaot sa katubigan niini.

Dungan niini mao usab ang kahibulungan nga insidente sa pagkalumos sa mga lalaki nga mangaligoay dinhi, diin puros mga kamaguwangang anak.

Suma pa sa tabi-tabi sa maong dapit, si Pandora, ang engkantada sa maong sapa, maoy gibasul sa nahisgutang mga kamatayon.

Gumikan niini, usa ka tour guide ug environmentalist nga pagadad-on ni Carlos Agassi ang nilusad og pakisusi ug nahiagom og kasinatian nga nakapakugang kaayo kaniya.

Ang Elemento Pandora episode masud-ong ugma puhon Biyernes 5:45 PM sa GMA7.

Angelica nayayay

Giangkon ni Angelica Panganiban nga duna siya'y problema sa panglawas busa duna siya'y gitumar nga mga medisina karong panahona. Suma pa sa aktres nga usa kini sa iyang gidudahan nga nanambok ang iyang lawas.

Wala'y kompetisyon

Gitataw sa rapper nga si Abra nga wala siya maghuna-huna og kompetisyon busa nihangyo siya sa publiko nga dili siya isabong ngadto sa laing rapper nga si   Gloc-9.

Derek nakigbatok sa pirata

Nitabang si Derek Ramsay sa kampanya batok sa pirata. Suma pa sa aktor nga panahon na nga  hingusgan ang maong kampanya aron dili mahagba ang movie industry sa Pilipinas.

Trabaho gihapon

Gisaulog ni Matt Evans ang iyang 28th birthday kagahapon ug dunay salo-salo nga nahitabo sa set sa seryeng Pure Love. Dako ang pasalamat ni Matt sa Ginoo gumikan sa nagsagunson niya nga TV projects.

Usahay na lang

Usahay na lang mag-uban sa pagpanuroy sila si Piolo Pascual ug Shaina Magdayao. Giingong busy si Piolo sa taping sa seryeng Hawak Kamay.  

Fans club sa JaRon

Tsika pa ni Jeron Teng nga karon lang siya kasuway nga nakahimamat sa iyang fans pinaagi sa usa ka party busa puwerti niyang lipaya. Nasayran nga nag-uban sila si Jeron ug Jane Oineza sa miaging adlaw alang sa usa ka party nga gi-organize sa "JaRon" fans club.

Alden na-pressure gamay

Giangkon ni Alden Richards nga na-pressure siya og gamay sa Bayaniserye nga Ilustrado gumikan kay gigastohan kini og maayo sa GMA-7.

Marvin nakahilak

Giangkon ni Marvin Agustin nga nakahilak gyud siya sa hingpit na niya nga pagbalik sa ABS-CBN."Dito ako lumaki, dito ako nagsimula. I was 16 when I started. I'm very emotional," tweet pa sa aktor.

Final na

Nakapili na og buwan sila si John Prats ug Isabel Oli alang sa umaabot nila nga kasal. Gusto sa duha nga mahitabo kini sa katapusang semana sa Mayo sunod tuig.

Aljur nakaamgo na?

Adunay mga hungihong nga matud pa nagplano si Aljur Abrenica nga iyaha na lang iatras ang reklamo niya niadto sa GMA-7 nga gipasaka niya didto sa korte. Giingong nakaamgo na ang aktor nga dili diay lalim kung kontrahan niya ang iyang mother network. Gilangaw na ang career ni Aljur sukad niya gikontrahan ang GMA-7.

Gikondisyon ang kaugalingon

Gipadayag ni Enrique Gil nga bukas siya sa posibilidad nga ma-develop sa iyang leading lady sa seryeng Forevermore nga si Liza Soberano. Susama sila nga single busa wala'y babag kung maabot ang panahon nga makagusto siya kang Liza.

Billy wala nagmahay

Gitataw ni Billy Crawford nga nalingaw ra siya sa dagan sa iyang career dinhi sa Pilipinas busa wala gyud mosangpot sa iyang huna-huna ang pagmahay nga iyang gibuhian ang iyang career didto sa Europe.

Tanging Ina Part 4

Gikumpirmar ni Direk Wenn V. Deramas nga himoon niya ang Tanging Ina Part 4 ug sugdan na ang shooting niini karong January 2015. Ang Tanging Ina maoy blockbuster movie nga gibidahan ni  Ai Ai delas Alas niadtong 2003.

John natagam

Dose ka tuig na nga wala'y uyab si John Lapus ug dili pa siya andam mosulod pagbalik sa usa ka relasyon. Natagam na siya sa tulo ka mga lalaki nga nauyab niya niadto. 

Sila na ba?

Si 2009 Miss Earth Philippines Sandra Seiffert na ba ang nanag-iya sa kasingkasing ni Cesar Montano?

Walay diretso nga tubag si Cesar, apan matud pa niya ngadto sa Yahoo Philippines: "Church mate ko siya. Kasama ko sa outreach program."

Dugang pa niya, "Nagpupunta kami out-of-town usually every Saturday with my mom and my brother as part of Seventh Day Adventist events."

Seventh Day Adventist si Sandra.

Apan matud ni Cesar, wala pa siya nibalhin pagka Seventh Day Adventist, nagtuo hinuon siya nga managsama lamang sila nga sumusunod kang Jesus Christ.

Nasayran nga niadtong Mayo, nilugwa usab si Cesar ug Sandra sa Cuneta Astrodome diin nitestimonya siya kabahin sa ilang pagtuo atol sa Revelation of Hope fellowship.

Nitungas na si Cesar sa kabukiran sa Bukidnon alang sa usa ka feeding program para sa mga bata.Nag-shooting usab siya didto sa indie film, "Pangayaw (Right to Kill)," diin siya maoy direktor, nagsuwat ug nagbida.

Dili pa annulled ang kasal ni Cesar ug Sunshine Cruz, apan nagbuwag na sila og mga dalan kapin sa tuig na ang nilabay.