Close sa pamilya sa ex

CEBU, Philippines - Tsika pa ni Kaye Abad nga suod gihapon niya ang pamilya sa kanhi niya boyfriend nga si Chito Miranda. Malipayon si Kaye alang kang Chito kinsa kaslunon na kang Neri Naig.

Angeline nabiyaan sa eroplano

 Nabiyaan si Angeline Quinto sa iyang flight padulong sa Amerika sa miaging adlaw. Giingong dugay nigikan ang singer hinungdan naabtan kini sa problema sa trapiko.

Ogie ihulip ni Ronnie?

Gihugon-hugon nga si Ogie Alcasid maoy temporaryong mohulip sa nasuspenso nga chairman sa Optical Media Board (OMB) nga si  Ronnie Ricketts.  Tak-om lang si Ogie sa maong report ilabi na nga wala pa siya'y pormal nga suwat nga nadawat gikan sa Palasyo.

Marvin nayayay

Maglisod og lakaw si Marvin Agustin human kini nalamba sa pagduwa niya og tennis. Kinahanglan pa nga agakon si Marvin kung maglakaw.

Ipaila-ila ni daddy

Mobakasyon si Yasmien Kurdi sa Bahrain karong Disyembre ug mao kini ang labing una nga higayon nga mahimamat sa iyang anak nga si Ayesha ngadto sa apohan niini nga nagbase sa maong nasud. Ipaila-ila na usab ni Yasmien ngadto sa iyang amahan ang bana niya nga si Rey Soldevilla, Jr.

Kever magsaka ang edad

Gipadayag ni Dennis Trillo nga bisan nagkadako ang iyang edad, wala niya gi-pressure ang iyang kaugalingon nga magminyo. Suma pa sa aktor nga wala siya magdali  ilabi na nga wala pa niya makaplagi ang iyang ideal girl.

Kalamboan sa career

  Gipadayag ni Frank Magalona nga wala siya makugang sa pagbalhin sa iyang igsuon nga si Maxene Magalona ngadto sa ABS-CBN. Suma pa ni Frank nga nananghid si Maxene sa iyang pamilya gumikan kay gusto niini nga dili mabakante ang iyang career.

Ganahan og kaluha

Tsika pa ni Sarah Lahbati nga kung makaanak sila og balik ni Richard Guttierez , gusto niya makabaton og kaluhang anak. Wala  pa'y plano ang duha nga magpakasal.

Seryosohay ang peg

Kapoyan si  Paul Jake Castillo sa relasyon nga susama ra nga nagdula busa gusto niya nga si Kaye Abad na gyud ang babaye nga iyang maasawa puhon. Mibilib siya sa ka maayo nga batasan sa aktres.

Lovi ug Rocco nag-away?

Dili motubag si Lovi Poe sa dihang gipangutana kung nganong gitangtang niya ang pipila ka mga hulagway nila sa iyang uyab nga si Rocco Nacino sa Instagram.  Gidudahan nga dunay gamay nga lalis nga nahitabo sa duha.

Ina mibalhin sa GMA

Nibalhin na si Ina Feleo sa GMA-7 ug nalakip kini sa afternoon series nga Yagit. Gikatahong na-expire na ang kontrata ni Ina sa Star Magic sa ABS-CBN.

Matteo miangkon

Giangkon ni Matteo Guidicelli ang nitumaw nga taho nga matud pa kanunay siya motambay sa dressing room sa iyang uyab nga si Sarah Geronimo sa programang ASAP 19.  Matud pa sa aktor nga wala siya'y dautang gibuhat ug iyang gipaneguro nga dili madisturbo ang trabaho sa pop star.

John misakay og MRT

 Nahadlok si John Lapus nga ma-late sa presscon sa iyang pelikulang  Moron 5.2 busa nisakay na lang siya sa MRT niadtong Martes sa gabii. Suma pa ni John nga maikog siya nga siya na lang ang paaboton sa presscon.

Diskarte aron dili ma-late

Nisakay og motorsiklo sila si Gerald Anderson, Maja Salvador, Sam Milby, Daniel Padilla ug  Erik Santos paingon sa airport busa nakaapas gyud sila sa ilang flight padulong sa Amerika. Naglikay ang maong grupo sa grabeng kahuot sa trapiko didto sa kaulohan.

Masidlakon gayod nga Jewel

 Dili na gyud mabangbang ang career sa Sugbuanon nga singer nga si Jewel del Rio Villaflores gumikan kay nagpusot pusot na karon ang iyang mga gig.

Kasamtangan usab karon nga nag-compose si Jewel og dugang mga kanta, sanglit parti kini sa preparasyon sa pagama niya og album sa sayong bahin sunod tuig.

Samtang usa ka dakong kompanya nga nagpaluyo sa "online buy and sell" sa Pilipinas ang nakauyon sa tingog ni Jewel busa siya ang nihatag og kinabuhi sa jingle niini.

Si Jewel maoy nagkanta sa jingle sa OLX Philippines nga madungog karon sa pipila ka radio stations sa Sugbo.

Dako ang pasalamat ni Jewel nga siya maoy nataypan sa OLX ug malipayon niya nga gipaambit nga mahiligon usab siya sa pagpalit og mga butang online.

Nakatabang kang Jewel sa pag-angkon niya sa maong proyekto mao ang background niya sa Cebu music scene.

Kahinumduman nga si Jewel maoy champion sa Visayan Pop Music Festival niadtong 2013 gumikan sa awit niya nga Duyog.

Mahiligon si Jewel sa pag-compose og mga kanta busa kanunay gayud siya makadaog sa mga songwriting contest ug ang labing bag-o niya nga titulo mao ang pagka-champion niya karong tuiga sa Visayan Pop Music Festival.

Nahuman si Jewel sa kursong Mass Communication sa Saint Theresa's College ug nagtrabaho siya karon isip marketing assistant sa usa ka ilado ug dakong kan-anan dinhi sa Sugbo.

Giingong moabot sa dul-an sa 500,000 ang aktibo karon sa pagpamaligya og butang pinaagi sa pag-post sa ilang second hand nga mga butang sa www.olx.ph ug giingong daghan na kaayo nga mga Pinoy ang natabangan niini.

Suma pa sa OLX Philippines senior marketing manager nga si Regina Aguilar nga dili malikayan nga duna gyu'y mga butang sa ubang tawo ang gusto nila nga ibaligya busa dako kaayo og tabang ang OLX.

Derek nag-sorry kang Angelica

Nangayo og pasaylo si Derek Ramsay sa iyang ex-girlfriend nga si Angelica Panganiban human nadamay kini sa concubinage complaint nga gipasaka sa iyang estranged wife nga si Mary Christine Jolly sa Parañaque Prosecutor's Office niadtong Miyerkules.

"I would like to apologize to Angel (Angelica), her family and all her fans for what's happening right now. I assure you hindi ko siya papabayaan," suma pa ni Derek.

Gikatahong gamiton ni  Jolly isip  ebidensya ang artikulo sa Star Studio magazine niadtong April 2013  kung diin dunay detalye matud pa nga nagtumbok nga nag-ipon na sila ni Derek  sa  Parañaque sulod na sa lima ka tuig.

Imbes nga motubag , nag-post na lang si Angelica sa  iyang  Instagram account og hulagway nilang duha sa iyang uyab nga si  John Lloyd Cruz ug nagtangag kini sa caption nga: "This is us happy. God be with you."

Dennis nasagpaan kay gikasab-an si Julia

Giingong nakatilaw og sipa nga  sagpa si Dennis Padilla gikan sa iyang kanhi hinigugma nga si Marjorie Barretto ug nahitabo kini sa dihang nagkaabot ang duha ka kampo sa haya sa inahan ni Raymart Santiago nga si Mrs. Cielito Legaspi-Santiago. Matud pa sa mga istorya nga wala mahimuot si Dennis sa iyang anak nga si Julia Barretto gumikan kay klaro kaayo nga naglikay kini kaniya ug wala gyud kini managad.

Suma pa nga gipatawag ni Dennis si Julia ug  iyaha kining gikasab-an og maayo ug mao kini rason nga puwerting hilaka ni Julia matud pa.

Sa dihang nasayran kini ni Marjorie, iyang gisulong ang nahimutangan ni Dennis ug nakatilaw kini og sagpa.

Nagpakahilom pa si Dennis sa maong istorya apan matud pa, daghan ang nakakita sa maong insidente.