Hugyawnatic

Dear Banat hugyaw,

Ako diay si Chris, 24 ug nagpuyo sa Barangay Labangon, Cebu City ug ako diay i-share ang makalingaw kaayo namo nga kaagi sa akong uyab nga si Jessa.

Lima na diay ka buwan ang relasyon namo ni Jessa ug dili gyud ko kalimot akong kaagi kay dili gyud mosugot sauna ang iyang father nga mosulod og relasyon.

Sa dihang bag-o paming nagkauyab, nagkauyon mi nga itago lang namo ang among relasyon kay lage dili mosugot iyang papa ug segurado gyud nga masuko kini kung makahibaw nga uyab ming duha.

Ganahan jud ko ni Jessa kay grabe siya ka buotan unya caring pa gyud kaayo. Naabot ang panahon nga nakahuna-huna mi nga mag "in a relationshiop" mi sa Facebook. Wala name nag-mind kung mahibaw-an mi sa mga tawo.

Kapoyan man gud ko magtago-tago og relasyon. Naa'y mga oras nga ako ihatud si Jessa inig pauli niya pero kutob ra gyud ko sa eskina kay mahadlok mi makit-an sa iyang papa.

Ganahan jud ko nga ihatud nako siya sa tugkaran gyud sa ilang balay pero unsaon taman, dili jud mosugot si Jessa kay seguradong makatilaw gyud ko og kasaba sa iyang amahan .

Pait kaayo og tago-tago nga relasyon uy, sige lang bantay sa palibot kung manglaag mi. Arang-arang na lang kay kahibalo na among suod nga friends. Pero mas maayo unta kung kahibalo pud ang iyang pamilya.  Aron makaingon sila ba nga nagtinarong jud ko kang Jessa.

Tungod ni Jessa, inspired kay ko sa akong work. Bahalag gikapoy ko gikan sa trabaho, basta makakita lang ko niya, kay ma-wala man ang kapoy.

Panagsa ra gyud mi magkalalis ani niya. Kung maglalis man gani mi, gamay ra jud kaayo ang rason. Naa usahay dili kay siya sweet nako, mangluod nako ana, haha. Kataw-anan kaayo paminawon, pero ganahan man gud ko nga sweet gyud ang girl nako.

Ayahay kaayo si Jessa kay pinangga gyud siya sa ako family, maypa siya kay naila-ila na sa ako family. Ang nakanindot sa ako uyab kay dili gyud siya arte.  Moangkon ko, chixboy kay ko sauna, bisan kinsa na lang nga girl kay akong patolan. Dili sa pagpanghambog, pution pud baya ko og pamanit, naa pud hitsura gamay, hahahaha, mao man ilang ingon.

Samtang nagdako ang atong edad, kapoy naman anang mosulod ta og relasyon nga puros lang duwa-duwa maong nakaingon ko nga magtinarong na gyud ko sa usa ka relasyon.

Dako kaayo akong pasalamat nga naabot si Jessa sa akong kinabuhi. Dunay higayon nga wala nako kaagwanta , ako gyud giingnan si Jessa nga andam nako moatubang sa iyang ginikanan, labi na sa iyang amahan.

Pag-una dili mosugot si Jessa, pero ako gyud siya gitarong og pasabot.  Mao tung nisugot siya pagdugayan. Kulba kaayo sa dihang gihatud nako si Jessa padulong uli, ug pag-abot nako sa ila, gipaila-ila ko ni Jessa sa iyang ginikanan.

Isog kaayo og nawong ang amahan ni Jessa , klaro kaayo nga wala kauyon sa akong presensya, pero ang iyang inahan kay okay raman.

Nananghid na lang ko ni Jessa nga mouli na kay dili ko komportable sa facial expression sa iyang amahan. Pag-uli nako sa amo, nakadawat ko og text message gikan ni Jessa ug gikasab-an daw siya og maayo sa iyang amahan. Hinuon , wala moana ang iyang amahan nga magbuwag mi ni Jessa, niana ra daw nga dili siya gusto nga makakita sa akong dagway sa ila.

Hangtud karon, kung ihatud man gani nako si Jessa sa ila, kutob ra gyud intawn sa eskina kay wala gihapon kadawat ang iyang amahan sa among relasyon.

Manghinaut na lang ko nga makadawat siya puhon, seguro hinay-hinayon lang ang pagdiskarte hangtud makadawat siya sa among relasyon. Mo-request diay ko sa lyrics sa kanta sa Magic  nga  "Rude."  Daghang salamat Banat Hugyaw sa paghatag og pagtagad sa akong love story.

Hi Chris! Atangi ugma puhon ang lyrics nga imong gipangayo. Dear HUGYAWnatics aduna ba kamoy LOVE STORY?  Ganahan ka ba nga paambitan kini ngadto sa uban? Suwata kana ug ipadala pinaagi sa Facebook: [email protected] or email: [email protected]