Palahi nga negosyo

CEBU, Philippines -  Kung maghisgot na gani og mga indigay og kaanyag, dili gyud mawala sa eksena ang sash nga itaud sa lawas sa mga mananaug. Ang Sugbuanon nga event planner nga si Rhodel de Silva nagmalampuson sa iyang negosyo isip tigbuhat og mga sash.

Nagsugod kini niadtong 2011 sa dihang iyahang nadiskubrehan nga duna diay siya'y tinagoang talento sa paggama niini. Suma ni Rhodel nga gawas sa crown, mahimong remembrance sa usa ka tawo ang sash kung makadaug kini og pageant.

"Kung crown ra man gud, kay one year ra man na nga naa nimo kay imo nana i-turn over sa sunod nga winner, pero ang sash kay imo man mahipos hangtud sa hangtud na gyud," dugang pa niya. Nipuhonan lang siya og P10,000 alang sa pagpamalit og mga materyales ug lakip na niini ang makina.

   Organizer si Rhodel sa nagkadaiyang mga indigay og kaanyag busa mapahimuslan kaayo niya ang iyang katakus paggama og sash. Ang paggama og sash nag-agad lang sa desinyo nga ihatag sa kliyente ingon man usab ang klase sa panapton niini.

Labing minos nga sash nga iyang hinimo nagkantidad og P285.00 matag usa. Pipila sa iyang mga produkto ang naabot na didto sa Singapore, Canada, Amerika ug uban pa.

Suma pa ni Rhodel basta seguraduon lang gyud nga maayo ang kalidad sa imong produkto, segurado gyud nga hangupon kini sa mga kliyente. Si Rhodel maoy sponsor sa mga sash sa mananaug sa bag-ohay lang nga Mr. and Ms. Press Freedom 2014. Siya usab ang maghimo sa sash sa umaabot nga QueenSize of Cebu 2014.

 (Mahimong makontak si Rhodel sa +639276293485 o sa email ad: [email protected])