James nahulog sa entablado

CEBU, Philippines - Nahulog sa entablado si James Reid atol sa iyang pagrampa sa Cosmo Tower 69 Bachelor Bash 2014 sa milabay nga gabii.  Human sa pipila ka segundos, dali nga nakabarog si James ug nipadayon sa iyang pagrampa.

Norte ipadala sa Oscars

Ang pelikulang Norte, Hangganan ng Kasaysayan ni Director Lav Diaz maoy napilian sa Film Academy of the Philippines (FAP) sa posibling isalmot alang sa  Best Foreign Language Film category sa Oscar Awards sunod tuig. Sila si Sid Lucero ug Angeli Bayani maoy mga bida sa maong pelikula nga molungtad og upat ka oras.

Dementia giindorsar ni Anne

Todo pangampanya si Anne Curtis sa pelikulang Dementia nga gibidahan ni Nora Aunor ug sa iyang manghod nga si Jasmine Curtis Smith. Giawhag ni Anne ang iyang fans nga molantaw sa maong horror movie.

Hustisya ipasalida sa Poland

Malakip ang pelikula ni Nora Aunor nga Hustisya sa 30th Warsaw Film Festival nga himoon karong October 10-19, 2014 didto sa Poland. Moabot ngado sa 15 ka mga pelikula gikan sa nagkalain-laing nasud ang nisalmot sa maong film festival.

Istoryahee!

Hugtanong gihimakak ni KC Concepcion ang istorya nga matud pa uyab na sila ni Paulo Avelino. Wala makumbinser ang publiko sa iyang gisulti gumikan kay sweet kaayo sila ni Paulo kung manuroy silang duha.

Ruffa motrabaho sa Singapore

Usa si Ruffa Gutierrez sa mahimong hurado sa Season 2  sa  Supermodel Me didto sa Singapore. Magsugod ang maong show karong November 24 sa Diva Channel TV.

Makalugwa bisan asa

Wala'y exclusive contract si Regine Tolentino sa GMA-7 busa dili angayan kahibudngan kung makita siya isip guest sa mga programa sa TV5 ug ABS-CBN. Padayon gihapon nga makita si Regine isip regular host sa morning show sa GMA-7 nga Unang Hirit.

Jodi magminaldita

Kontrabida ang role ni Jodi Sta. Maria sa remake sa seryeng Pangako Sa 'Yo sa ABS-CBN. Siya ang modala sa karakter ni Amor Powers nga unang gidala niadto ni Eula Valdez.

Lig-ong writer

Masaligon sila si James Reid ug Nadine Lustre nga mahimuot ang viewers sa umaabot nila nga programa sa ABS-CBN, ang episode sa Wansapantaym nga My App Boyfie gumikan kay dili basta-basta ang nagsuwat niini. Nasayran nga si Noreen Capili maoy writer sa My App Boyfie ug siya usab ang nagsuwat niadto sa Walang Hanggan, Mirabella, My Binondo Girl, Katorse, ug Aryana.

Aron makabisita

Gipaneguro ni Lani Mercado nga dili mag-doble ang iyang showbiz projects gumikan kay dili siya gusto nga makawat ang iyang oras sa pagbisita sa iyang bana nga si Sen. Bong Revilla nga kasamtangang napriso.

Carlos sa Elemento

Malakip si Carlos Agassi sa umaabot nga programa sa GMA-7 nga Elemento. Maghisgot kini sa mga kahibulongang hitabo sa kalibutan. 

John ug Isabel engaged na!

Ni-propose na si John Prats ngadto kang Isabel Oli nga magpakasal ug nahitabo kini niadtong Miyerkules sa gabii sa Eastwood Citywalk sa Quezon City.

Nagtuo si Isabel nga manuroy lang sila sa igsuon ni John nga si Camille Prats ug nakugang na lang sila nga dunay flash mob nga nahitabo sa ilang gilaagan ug nakugang na lang kini nga lakip sa nisayaw mao ang boyfriend niya nga si John.

Human niini, nilugwa sa dakong video wall ang mensahe ni John alang kang Isabel nga gisundan og fireworks sa palibot sa mall. Human sa fireworks, niluhod si John atubangan ni Isabel ug mipakita sa cute kaayo nga singsing ug dinhi na ni-propose ang aktor ug emosyonal nga nitubag si Isabel og "Yes".

Gawas sa tagsa-tagsa nila ka mga pamilya, nisaksi usab sa proposal ni John kang Isabel mao ang ilang mga higala nga sila si Sam Milby, Angelica Panganiban  ug Chynna Ortaleza.

Wish nga natuman

Natuman na gyud ang pangandoy ni Rachelle Anne Go nga maka-duet sa entablado si Lea Salonga. Nahitabo kini atol sa 25th anniversary sa Miss Saigon sa miaging adlaw nga gipahigayon sa  Prince Edward Theatre didto sa London.

Toni gibalibaran  sa uyab

Giangkon ni Toni Gonzaga nga ang uyab gyud unta niya nga si Paul Soriano maoy direktor sa iyang umaabot nga major concert apan nibalibad kini gumikan kay duna kini movie project nga gihimo. Mahadlok si Direk Paul nga basin dili siya ka-focus sa maong concert busa mibalibad na lang kini og tarong.

Daniel gitambagan ni Sam

Gitambagan ni Sam Concepcion si Daniel Padilla nga kinahanglan nga magmabinantayon sa iyang ipanulti.Giklaro hinuon niya nga wala'y isyu tali nila ni Daniel bisan pa man sa giingong audio scandal. Nidayeg hinuon si Sam kang Daniel gumikan sa pag-angkon niini nga iyahang tingog ang naa sa audio clip. Giingong naghinam-hinam si Daniel nga makadawat og text message sa uyab ni Sam nga si Jasmine Curtis Smith.

Naghudyaka karon ang cast sa labing bag-ong GMA-7 primetime series nga "Strawberry Lane" gumikan kay nidaog sila sa ratings games didto sa kauluhan atol sa ilang pilot week sa nilabay nga semana. Gipildi sa maong serye ang katigi niini nga Hawak Kamay pinaagi sa Urban Luzon TV rating nga  24.8% ug Mega Manila TV rating nga 26.4%. Ang Hawak Kamay nirehistro og 22.6% sa Urban Luzon ug 20.7% sa Mega Manila. Base kini sa datos sa AGB Nielsen.

 Ang Strawberry Lane gilangkuban sa mga batan-ong Kapuso actresses sama nila ni  Bea Binene, Kim Rodriguez, Joyce Ching, ug Joanna Marie Tan.

Tandem inampingan

Gipadayag nila ni James Reid ug Nadine Lustre nga dili pa sila andam nga magkadayon gumikan kay buot nila ampingan ang ilang career isip magka-loveteam.  Suma pa sa duha nga nalingaw ra sila sa ilang tandem.

Peke nga friends

Nidepensa si Robin Padilla sa iyang pag-umangkon nga si Daniel Padilla sa "audio recording scandal" nga nalambigitan niini, bag-ohay lamang. Suma pa ni Robin, biktima si Daniel sa iyang mga peke nga higala, nga maoy nagpakatap sa nahisgutang recording. 

Strawberry Lane winner

Naghudyaka karon ang cast sa labing bag-ong GMA-7 primetime series nga "Strawberry Lane" gumikan kay nidaog sila sa ratings games didto sa kauluhan atol sa ilang pilot week sa nilabay nga semana. Gipildi sa maong serye ang katigi niini nga Hawak Kamay pinaagi sa Urban Luzon TV rating nga  24.8% ug Mega Manila TV rating nga 26.4%. Ang Hawak Kamay nirehistro og 22.6% sa Urban Luzon ug 20.7% sa Mega Manila. Base kini sa datos sa AGB Nielsen.

 Ang Strawberry Lane gilangkuban sa mga batan-ong Kapuso actresses sama nila ni  Bea Binene, Kim Rodriguez, Joyce Ching, ug Joanna Marie Tan.