Samtang sayo pa

CEBU, Philippines - Nanghinaut si Richard Gomez nga himuon na unta karong tuiga ang pelikula nila ni  Dawn Zulueta gumikan kay humot pa kaayo sa publiko ang ilang tandem.

Ritz nataypan sa direktor

Gibutyag ni Ritz Azul nga kahibalo siya nga dunay gusto kaniya ang direktor nga si GB Sampedro. Gihimakak niya ang tsismis nga uyab sila karon. Suma pa ni Ritz nga giprangkahan na niya si Direk GB nga dili pa siya andam mosulod og relasyon.

Past Tense

Past Tense ang working title sa umaabot nga pelikula nila ni Xian Lim, Kim Chiu, ug AiAi delas Alas sa Star Cinema. Sugdan na karong July 29 ang shooting niini.

Arjo magpaabot ra

Gitataw ni Arjo Atayde nga wala siya magdali ug iyang respitohon ang mahimong hukom ni Alex Gonzaga kalabot sa pagdiskarte niya sa TV host. Una na nga gipadayag ni Arjo nga si Alex maoy mipapitik sa iyang kasingkasing karong panahona.

Donasyon lang

Magsaulog na si Alice Dixson sa iyang 45th birthday karong July 28 ug giawhag niya ang mga suod niya nga higala nga imbes hatagan siya og regalo, mas maayo nga hinabang lang ang ihatag alang sa mga charitable institution.

Tungod sa PBB

Giangkon ni Jason Abalos nga sa Pinoy Big Brother All-In lang niya nasayran nga duna siya’y pagkulang sa relasyon nila ni Vickie Rushton.  Suma pa sa aktor nga mamawi siya sa iyang mga pagkuwang sa higayon nga makagawas na si Vickie sa PBB house.

Garret mitikang sa Pilipinas

Nia karon sa nasud ang American actor nga si Garret Dillahunt kinsa nailhan pag-ayo human nahimong bida sa pelikulang 12 Years a Slave. Adunay gigama nga pelikula si Garret ug himoon sa Pilipinas ang pipila ka mga eksena niini. Katapusan nitikang si Garret sa Pilipinas niadtong 2010 alang sa pelikula niya nga Amigo.

Naa pa’y followers

Masaligon si Gerald Anderson nga daghan gihapon og followers ang tandem nila ni Kim Chiu busa napanglantawan niya nga mo-click gyud ang umaabot nila nga pelikula. Giingong hanap pa kini nga mahitabo karong tuiga gumikan kay unahon pagbuhat ang pelikula nila ni Kim ug Xian Lim.

Career ni Aljur mahagba?

Nibutyag ang mga tigpaniid sa showbiz nga sama ra nga giputol ni Aljur Abrenica ang iyang career human niya gikiha ang GMA-7 nga maoy naghupot kaniya sulod na sa taas nga katuigan. Ang mga kritiko ni Aljur nibutyag nga wala’y utang kabubut-on ang aktor.  Kahinumduman nga nidangop si Aljur sa korte sa miaging adlaw gumikan kay gusto na niya nga maputol ang iyang kontrata sa GMA-7 gumikan kay wala na siya kasabot sa direksyon sa iyang career.

Pasalig sa uyab

Gipasalig ni Matteo Guidecelli nga dili gyud niya pasakitan ang iyang girlfriend nga si Sarah Geronimo. Una na nga gibutyag ni Sarah nga dili lalim ang iyang naagian sa mga nangagi niya nga uyab.