Dili perpekto

CEBU, Philippines - Gipadayag ni Sarah Geronimo nga dili siya perpekto nga pagkatawo ug dili malikayan nga mogawas pud usahay ang bati niya nga kinaiya.  Suma pa sa singer nga nagdepende hinuon kini sa sitwasyon nga iyang masugatan.

Pinangga sa best friend

Gipadayag ni Alex Gonzaga nga pinangga niya ang iyang best friend nga si Fifth Pagotan busa todo ang gihatag niya nga suporta sa dihang niangkon ang maong PBB housemate nga usa siya ka bisexual. Suma pa ni Alex nga angayan respitohon si Fifth, sanglit wala man kini gibuhat nga dautan ug igo lang siya nisulti sa tinud-anay niya nga pagkatawo.

Edukasyon

Ipasalida na karong Miyerkules, July 23 ang pelikulang Edukasyon nga gibidahan sa kanhi Star Magic talent nga si Diane Medina. Mapasalamaton si Diane sa JMS Films gumikan sa maong proyekto.

Van ni Angelu nabanggaan

Nabanggaan sa trak sa miaging adlaw ang  likod nga bahin sa van nga gisakyan ni Angelu de Leon samtang padulong siya sa taping sa seryeng Niño sa Laguna. Kauban ni Angelu niadtong higayona ang iyang anak ug maayo na lang gani nga wala'y naangol sa maong insidente.

Daniel nausab?

  Mitumaw ang istorya  kagahapon kalabot ni Daniel Padilla ug matud pa nga wala na siya tagda sa iyang mga barkada. Wala hinuon matino ang rason kung nganong gibiyaan si Daniel sa pipila niya ka mga higala.

Alang sa anak

Gibutyag ni LJ Reyes nga nagsagunson ang komunikasyon nila ni Paulo Avelino  karong panahona gumikan kay silang duha maoy nangandam sa umaabot nga  birthday party sa ilang anak nga si Aki karong July 24.  Gipaneguro ni LJ nga dili na sila mag-away ni Paulo aron dili maalaot ang ilang anak.

Todo promote

  Gihatagan gyud og dakong oras ni Ai Ai delas Alas ang pag-promote sa indie film niya nga Ronda nga entry sa  Cinemalaya Philippine Independent Film Festival. Ang komedyanteng aktres maoy producer sa Ronda busa iyaha gyud nga seguradoon nga mo-click kini sa publiko.

Direk Jun nakadaug

Ang direktor sa indie film nga Barber's Tales nga si  Jun Lana maoy napili nga Best Director sa bag-ohay lang nga 3rd Madrid International Film Festival.  Si Eugene Domingo maoy bida sa maong indie film.

Wala'y love scene

Magtiayon  ang papel nila ni LJ Reyes ug Dennis Trillo sa pelikulang The Janitor apan giklaro sa duha nga wala sila'y love scene sa maong pelikula. Una kini nga higayon nga nagkauban silang duha sa trabaho.

Nagtingog na

Nagtingog na sila si Marian Rivera ug Bela Padilla ug hingpit na nga gikalimtan sa duha ang panagsungi nila niadto. Si Bela maoy special guest sa dance show ni Marian sa GMA-7 karong Sabado, July 26. Kahinumduman nga giselosan niadto ni Marian si Bela nga gipasanginlan niya nga nagpa-cute ngadto sa iyang boyfriend nga si Dingdong Dantes.

Piolo malingaw ni Ryan

Gipadayag ni Piolo Pascual nga malingaw gyud siya  kung ka-eksena niya si  Ryan Bang sa seryeng Hawak Kamay. Suma pa ni Piolo nga buotan ug maayo nga komedyante si Ryan.

Ang pagbalik ni Victor

Tsika pa ni Victor Neri nga nitrabaho siya sa Thailand isip chef sa dihang nibiya siya sa showbiz niadtong 2007. Mibalik na si Victor sa pag-arte pinaagi sa seryeng Hawak Kamay sa ABS-CBN.

She's Dating The Gangster naka-P80M na!

Kapin na sa  P80 million ang kita sa upat pa lang ka adlaw nga pagpasalida  sa pelikula nila ni Kathryn Bernardo ug Daniel Padilla nga She's Dating The Gangster.

Matud pa nga padayon gihapon nga gilinyahan sa mga sinehan ang nahisgutang pelikula.

Ikaupat na nga pelikula sa Kathniel ang She's Dating The Gangster ug una  na sila nga nag-uban niadto sa pelikulang  24/7 in Love (2012), Must Be Love (2013) ug Pagpag: Siyam na Buhay (2013).

Adam ug Behati nagpakasal

Nagpakasal na niadtong Sabado sa gabii ang Maroon 5 vocalist nga si Adam Levine ug ang hinigugma niya nga Victoria's secret model  nga si  Behati Prinsloo . Gihimo ang seremonya sa  Flora Farms, Los Cabos, Mexico .

Mga sakop sa ilang pamilya ug ang mga suod lang nila nga higala ang  nitambong sa maong seremonya busa  dul-an lang sa 300  ang ilang guests. (BANAT NEWS)