Birthday special
CEBU, Philippines - Hugyaw nga episode ang malantawan karong gabii sa Celebrity Bluff sa GMA-7 gumikan kay saulugon ang birthday sa host niini nga si Eugene Domingo. Nasayran nga ni-click ang tandem nila ni Eugene ug Jose Manalo sa nahisgutang programa.
Enchong migimik?
Igo lang gikataw-an si Enchong Dee sa iyang bashers kalabot sa rebelasyon niini nga duna siya'y girlfriend. Suma pa nga gimik lang kini ni Enchong gumikan kay duna siya'y umaabot nga pelikula nga nag-ulohan og "Once A Princess” kung diin makapares niya si Erich Gonzales.
Martin matinabangon
Mibilib ang mga higala ni Martin Nievera ngadto sa singer gumikan kay bisan tihik kini nga pagkatawo, dali ra kini makakuot sa iyang bulsa basta dunay mangayo og tabang kaniya. Kanunay usab mo-perform si Martin sa mga benefit concert.
Megan nag-sorry ni Freddie
Nangayo na og pasaylo si Megan Aguilar ngadto sa iyang amahan nga si Freddie Aguilar. Kahinumduman nga nagyawyaw pag-ayo si Megan niadto human siya gipalayas sa iyang amahan. Apan gitataw ni Megan nga unya ra siya magpakita ngadto kang Freddie gumikan kay wala pa gyud niya nadawat ang minor de edad nga asawa sa beteranong singer.
Apeke sa oras
Wala'y trabaho si Rachelle Ann Go sulod sa upat ka adlaw sa Miss Saigon sa Edwards Theater , London gumikan kay holiday sa maong dapit. Apan giklaro ni Rachelle Ann nga dili pa siya makahirit og uli dinhi sa Pilipinas gumikan kay apeke ra kaayo sa oras.
Sharon nahilom
Wala'y kisaw kung unsa ang sunod nga programa ni Sharon Cuneta sa TV5. Katapusang nalantawan ang megastar sa programang Madam Chairman.
Chynna nakapuntos ni Nora
Nakahilak si Chynna Ortaleza human gidayeg ni Nora Aunor ang iyang pag-arte sa indie film nga Hustisya. Nasayran nga magkauban ang duha sa maong indie film. Suma pa ni Chynna nga dakong garbo alang kaniya nga makadawat og pagdayeg gikan sa usa ka banggiitang artista.
Fourth duna na'y anak?
Gisumsuman karon sa nagkadaiyang online forum ang tsismis nga matud pa duna na'y anak ang Pinoy Big Brother housemate nga si Fourth Pagotan. Nagpakahilom lang ang igsoun ni Fourth nga si Chariz Solomon kalabot sa maong tsismis.
Aga-Lea movie madayon
Gikatahong nakigtagbo na ang Star Cinema ngadto kang Aga Mulach ug gihisgutan na matud pa ang umaabot nga pelikula sa aktor uban kang Leah Salonga. Giingong nag-gym na og sugod si Aga isip preparasyon sa maong pelikula.
Mga lig-ong kauban
Gipasigarbo pag-ayo ni Piolo Pascual ang upcoming series niya sa ABS-CBN nga Hawak Kamay gumikan kay mga lig-on gyud nga mga batang artista nga iyang kauban. Kini naglangkob nila ni Zaijan Jaranilla, Xyriel Manabat ug Andrea Brillantes nga puros na nahimong bida sa nangagi nga mga serye sa ABS-CBN.
- Latest