Gipistahan sa Twitter

CEBU, Philippines - Trending sa Twitter niadtong Miyerkules sa gabii ang init nga eksena nila ni Maja Salvador,  Angel Locsin, ug Jericho Rosales sa seryeng The Legal Wife sa ABS-CBN.  Partikular nga gihisgutan mao ang eksena nga gisagpa ni Angel si Maja.

Vina sa MMK

Todo hinilakay ang mga  eksena ni Vina Morales sa episode ugma sa gabii sa Maalaala Mo Kaya. Lakip usab sa maong episode sila si Bianca Casado, Benjie Paras, Lloyd Zaragoza, Markki Stroem, AJ Muhlach, Bryan Homecillo, Rez Cortez, Janice Corado, CJ Navato, Alexander Diaz, Elisse Hoson ug  Vangie Mortell. 

Pangandoy ni Julia

Gipangandoy ni Julia Baretto nga makabaton puhon og kaugalingong clothing line. Target niya nga  siya mismo ang mangunay pagdesinyo niini.

Andam mag-artista

Bukas sa posibilidad nga mosulod sa showbiz ang igsuon ni anhing AJ Perez nga si Gello Perez. Samtang wala pa siya'y konkreto nga plano, ganahan una siya nga mo-focus sa iyang pagtungha.

Jovit ganahan mag-abogado

Gusto gyud ni Jovit Baldivino nga matuman gyud niya ang iyang pangandoy nga mahimong abogado. Matud pa ni Jovit mag-Law siya sa higayon nga mahuman na niya ang kursong Criminology sa Batangas State University.

Alden mosukol na og love scene

Nagsagunson na ang pagdawat ni Alden Richards og mga mature role. Matud pa nga makabaton na si Alden og love scene sa iyang leading lady sa umaabot niya nga pelikula.

Matud pa sa aktor nga naghinam-hinam na siya sa maong movie project ug usa sa bida niini mao ang kauban niya sa GMA-7 nga si Ajur Abrenica.

Nagkanayon si Alden nga mas mature ang tema sa maong pelikula  ug nabasa na niya ang script niini.

Nasayran nga nagpanikad na ang fans ni Alden sa mahimong ka-partner sa ilang idolo  sa nahisgutang pelikula.

Yolanda isalmot Cannes

Si Brillante Mendoza maoy direktor alang sa documentary film nga maghisgot sa pag-igo sa bagyong Yolanda dinhi sa Pilipinas. Si Senador Loren Legarda maoy producer sa maong proyekto. Target ni Legarda nga isalmot kini sa Cannes International Film Festival.

Cedric naproblema

Nitumaw ang mga pagduda nga matud pa si JP Calma maoy usa sa mobali aron motestigo batok kang Cedric Lee.  Nalakip si JC sa gipasakaan og kaso ni Vhong gumikan sa pagkalambigit niini sa pagpangulata sa aktor apan nasuta nga tua na kini sa Singapore ug padayon kini nga gipangita gumikan kay nalutsan kini og warrant of arrest. Giingong naproblema pag-ayo si Cedric sa giingong pagtestigo sa iyang higala batok kaniya.

Magpabilin si Kuya

Gihimakak ni Toni Gonzaga ang nigawas nga report nga ilisan na ang tawo nga maoy nagdala sa tingog ni Kuya sa reality show sa ABS-CBN nga Pinoy Big Brother. Matud pa sa TV host nga gipabilin gihapon ang tawo nga naa sa likod sa maong tingog gumikan kay mao na kini ang naandan sa viewers.

TV 5 mitin-aw sa isyu

 Gihimakak sa mga kadagkoan sa TV5 nga matud pa dili idayon ang local adaptation sa Pretty Little Liars. Giingong nangita lang og timing ang pag-ere niini sa telebisyon ilabi na nga gabaha pa karong panahona ang mga sports program sa maong network.  Ang mga bida sa local adaptation sa Pretty Little Liars mao sila si Sophie Albert, Chanel Morales, Stephanie Rowe, Valeen Montenegro, ug Danielle Lee.  Tsika pa ni Wilma Galvante, ang chief content entertainment officer sa TV5, nga dili tinuod ang nigawas nga report nga matud pa wala mauyoni sa foreign consultant ang nahisgutang proyekto.

Kathryn todo larga

Human sa paglarga niya sa Paris sa miaging buwan, sa South Korea napud nilaag ang teen star nga si Kathryn Bernardo dili pa lang dugay. Kauban ni Kathryn sa pagbakasyon sa maong dapit mao ang iyang Mommy Min. Suma pa ni Kathryn nga gipahimuslan niya ang bakante niya nga oras ug gusto niya nga mag-enjoy sa iyang kinabuhi samtang bata pa siya.

Conflict ang schedule

Gibutyag ni John Lloyd Cruz nga anugon gyud kaayo ang serye kung diin makauban unta niya sila si Piolo Pascual ug Anne Curtis apan dili na kini madayon. Matud pa ni Lloydie nga dili gyud magkatakdo ang mga bakante nila nga schedule nilang tulo hinungdan nga wala na lang kini gidayon sa ABS-CBN.

Jen gipangita ni Sen. Legarda

Gusto ni Senator Loren Legarda nga iyang mahimamat sa personal ang Ambassador of the Ocean sa Pilipinas nga si  Jennylyn Mercado aron magkauban sila sa umaabot niya nga proyekto sa pagpanalipod sa kalikupan.

Ex-BF ni Angel babaero

Tsika pa ni Angel Locsin nga duna siya'y ex-boyfriend nga gidudahan niya nga dunay laing babaye sa dihang uyab pa sila niini.  Kanunay niya nga naobserbahan nga kanunay nga limpyo ang inbox sa cellphone niini. Apan matud pa ni Angel nga ang labing importante nga suwerte siya karon sa iyang kasamtangang uyab nga si Luis Manzano.

Nagpungasi ang love scenes

Giangkon ni Jericho Rosales nga ang seryeng Legal Wife maoy labing daghan og love scenes sa nagkadaiyang proyekto nga iyang nahimo. Giklaro hinuon sa aktor nga wala magselos ang iyang girlfriend nga si Kim Jones niini.