Wa gyu’y plano

CEBU, Philippines - Wala gyu’y plano si Marian Rivera nga musulod sa kalibutan sa politika bisan pa og kaniadto pa daghan na kaayong sige og hagad kaniya. Suma pa niya makatabang siya sa iyang isigkatawo bisan pa og dili siya magpapili og posisyon sa gobyerno. Apan kun mulansar gyud ang iyang uyab nga si Dingdong Dantes, tabangan gayud matud pa kini ni Marian sanglit buotan ang actor ug tininuod ang tinguha niini nga muserbisyo.

Gisagpa’g kaso

Gisagpa og kaso sa Slimmers World International  ang usa sa mga reklamante batok kang Vhong Navarro nga si Roxane Cabanero. Buot ang Slimmers World, kinsa organizer sa Miss Bikini Philippines diin usa sa mga kandidata kaniadto si Roxane, nga mubayad ang nahisgutan og P1 million "for the damage sustained by [the organization's] goodwill and business reputation." Wala pa kini labot sa P400,000 as corrective damages and P205,000 for legal costs.” Kahinumduman nga gitumbok ni Roxane nga niadtong 2010 diin kandidata siya sa Miss Bikini Philippines  nahitabo pag-among-among ni Vhong kaniya. Hugtanon kining gihimakak sa TV host.

Di makigkita sa anak

Wala’y plano si Albie Casino nga makita ang iyang anak kang Andi Eigenmann. Wala matud pa siya makakita sa bata bisan sa hulagway lamang sanglit dili man siya follower ni Andi sa Instagram. Pagkakaron, gym, trabaho ug iyang kaugalingon usa maoy iyang atimanon.

Di ganahan magbida

Gipadayag ni Jackie Rice nga wala gyud matud pa siya’y ambisyon nga magbida gumikan kay dili siya ganahan nga ma-pressure. Pero pangandoy niya ang makadaog og acting award.