Panggaa ang Imong Lawas

CEBU, Philippines - Gumikan kay naglabi ang mga pagkaon nga dili makaayo sa imong lawas nga imong gikaon sa miaging Pasko, ilabi na niadtong Noche Buena, aniay pipila ka pamaagi aron pagbanlas niini gikan sa imong sistema sa dili pa ang Bag-ong Tuig. Kining maong mga pamaagi sinuwat ni Shannon Farrell para sa Daily Makeover ug gimantala sa http://ph.she.yahoo.com.

1.Ayaw pag kape

Kasagaran ilabi na karong tingtugnaw, kape maoy pang-alkontra. Ang uban pud magkape gumikan kay mao kini ang makapalagsik sa ilang lawas sa sayong kabuntagon. Apan ang kape magpundo og carbohydrate sa imong lawas ug maoy makaingon nga magpangita ka og tam-is nga pagkaon sa tibuok adlaw. Inay kape, mas maayo nga green tea ang imong imnon gumikan kay gawas nga makapaabtik, makatabang pa kini sa mga aktibidad sa imong atay.

2.Inom og daghan tubig

Inom og daghang tubig aron lagsik ang imong lawas. Siguroha nga makainom ka og unom ngadto sa walo ka baso nga tubig kada adlaw. Mas maayo nga imo kining butangan og hiniwa nga lemon o orange aron adunay pakapin nga vitamin C nga maoy mugaling sa mga tambok sa imong lawas. Malipay ang imong tiyan ug panit niini.

3.Fiber, Fiber, Fiber

Human ka nagpalabi og lamoy sa mga Chirstmas party nga imong gitambongan, panahon na nga tabangan nimo ang imong digestive system. Sugdi kini pinaagi sa pagkaon og fiber foods sa pamahaw, usa ug labing dali niini mao ang oatmeal. Makatabang na sa imong sistema, makabusog pa.

4.Panggaa ang imong muscles

Pag-stretching bisag lima lamang ka minutos. Pinaagi niini, musugwak ang lab-as nga dugo diha sa imong lawas nga maghatag og nutrients ug oxygen sa imong muscles.

Kun aduna ka pay igong oras, paresi kini og cardio exercise: walking, jogging, running.

5.Biyai ang sugar

Walay laing makatabang kanimo kundili ang dinaliang pakigbulag sa tam-is nga mga pagkaon. Kini naglakip sa sweets ug processed foods. Kaon hinuon og utan, prutas ug grains.

Kun mabuhat kini nimong tanan, andam ka na aron pagsugat sa Bag-ong Tuig diin lain na pud nga bul-og sa pagkaon ang imong lamyon. Happy New Year!