Sultada Sa Sunday All Stars

CEBU, Philippines - Aduna pay dugang segments nga makita sa bag-ong noontime show sa GMA-7, ang Sunday All Stars.

Kini maoy gibutyag ni Marivin T. Arayata, Vice President for Entertainment TV, Head for Comedy/Game ngadto sa mga entertainment editors gikan sa Davao ug Cebu adtong Domingo human sa Sunday All Stars.

May mga talents pa pud nga wala makalugwa sa maong show sanglit  aduna pay commitment, ang uban nagbakasyon sa gawas sa nasad.

Kahinumduman nga nagsugod adtong Domingo ang Sunday All Stars, isip hulip sa Party Pilipinas. Nasaksihan nga adunay upat ka mga grupo nga nagtigi sa ilang production numbers. Kini naglakip sa Tweet Hearts, Insta Gang, Ligang I Like ug Tropang Trending nga gipanguluhan nila ni Mark Bautista, Christian Bautista, Jolina Magdangal ug Jennylyn Mercado. Base sa nasaksihan susama sa That’s Entertainment ang format sa Sunday All Stars, diin magtigi ang mga grupo sa production number. Si Christian mihulagway sa iyang kaugalingon nga istrikto nga leader sanglit iyang gipatuman ang matang sa disiplina nga iyang nakat-onan sa teatro. Apan giklaro niya nga bukas matud pa siya sa mga ideya sa iyang  mga ginsakpan.

Si Jennylyn misugilon nga wala silay klarong practice sanglit lisud gayud takduon ang oras sa mga miyembro nga adunay laing kabilinggan.

Si Diva Mantalaba kinsa sakup sa grupo ni Jolina mitug-an nga niadtong Domingo lamang sa buntag sa ilang rehearsal siya nakakita sa halos nga ilang gigamit sa ilang production number, diin nagpuli-puli sila ni Sam Pinto paggunit niini. Nahadlok matud pa siya, apan iya na lang giantos sanglit buot niya nga matarong ang ilang performance.

Si German “Kuya Germs” Moreno kinsa maoy nagmugna sa That’s Entertainment kaniadto midasig sa mga sakop sa matag grupo nga buhaton ang tanan nga ilang mahimo aron malipay ang mga tumatan-aw. Dugang pa niya nga importante gayud matud pa ang disiplina sanglit dili sayun ang pagtapok sa mga artista nga adunay tagsa tagsa ka mga kabilinggan.

Samtang gitug-an ni Arayata nga kada buwan mag-ilis og leader ang matag grupo. Suma pa niya daghan pang mga big stars ang mu-guest sa maong show sa musunod nga mga Domingo.