Nietes nanganti tumbahon si Reveco
CEBU, Philippines — Wala itago ni three-division world champion Donnie ‘Ahas’ Nietes ang iyang plano nga palukapahon si Juan Carlos Reveco sa iya unyang pagdepensa sa iyang IBF flyweight title batok sa Argentinian niyang challenger nga tipik sa “Superfly 2” card karong Pebrero 24 didto sa The Forum sa Inglewood, California.
Matud pa sa 35-anyos nga si Nietes nga iyang buhaton tanan kutob sa iyang mahimo aron mokuha og atensiyon sa maong pasundayag ilabi na kay mao kini ang labing unang higayon sa iyang karera nga ang iyang away dunay live telecast pinaagi sa HBO.
Makab-ot lamang kini sa bitoon sa ALA Gym kun ugaling makaiskor siya og ‘knockout’ batok ni Reveco, butang nga iyang gipangandaman og maayo.
“Og naay chance nga matumba siya, tumbahon gyud nako siya,” matud pa sa garbo sa Murcia, Negros Occidental.
Gitaaw hinuon ni Nietes nga dili siya magdali-dali ug pokus lang gyud siya sa dagan sa ilang away kay kinahanglan pa man niya estudyohan ang estilo ni Reveco.
Mao kini ang labing unang higayon nga panalipdan ni Nietes ang iyang IBF flyweight title nga iyang nasakmit human gipilde si Thai Komgrich Nantapech pinaagi sa desisyon sa ilang sangka niadtong
Abril 29 sa miaging tuig diha sa Waterfront Cebu City Hotel and Casino.
Si Nietes nga anaa karon sa katapusang hunat sa iyang training didto sa Wild Card Gym ni Freddie Roach sa Hollywood, California, nagkupot og (40-1-4 record uban ang 22KOs, samtang si Reveco dunay 39-3 nga baraha uban ang 19KOs. (BANAT NEWS)
- Latest
