Celtics nakabawi na gyud

CEBU, Philippines — Nakaipsot gyud ang Boston Celtics bitbit ang 103-102 nga kadaogan sa kulbahinam nilang duwa batok sa Los Angeles Clippers aron putlon ang upat ka sagunson nilang pilde  sa NBA kagahapon didto sa Staples Center sa Los Angeles, California.

Si Kyrie Irving mirehistro og 20 puntos uban ang walo ka rebounds ug pito ka assists sa Celtics nga daw sa nahuwasan sa maong kadaogan kay nakahaw-as na gyud sila sa labing taas nilang sunod-sunod nga pilde karon nga  season. 

Miamot si Jayson Tatum og 18 puntos, walo ka rebounds ug tulo ka assists, samtang sila si Marcus Morris ug  Terry Rozzier mitampo’g 15 puntos matag usa alang sa Celtics nga naglukdo na karon og 35-14 record.

Sila si Blake Griffins ug Lou Williams nagkumboya’g 43 puntos, apan wa’y nahimo gumikan kay ang Clippers nadakin-as ngadto sa 23-24.

Sa laing aksiyon, sila si Pau Gasol ug Patty Mills maoy nangulo sa balanseng ataki sa dihang gilubong sa San Antonio Spurs ang Memphis Grizzlies sa iskor nga 108-85.

Hapit maka-triple double si Gasol nga mitapos uban ang 14 puntos, 15 ka rebounds ug siyam ka assists, samtang si Mills mikadlit og 15 puntos.

Wala miduwa si LaMarcus Aldridge nga  tuyo  sa gipapahuway ni coach Gregg Popovich, apan wala kini nahimong babag  sa San Antonio kay walo ka Spurs ang mitali og double figures.

Sila si Bryn Forbes ug Danny Green mihipos og 14 puntos matag usa, samtang sila si Davis Bertans ug Dejounte Murray nagkumboya’g 11 puntos nga wala na mopaginhawa pa sa Grizzlies human miposte og 17 puntos nga labaw sa katapusang kuwarter.

Didto sa Dallas, si James Harden mitali og 25 puntos ug mipasa og 13 ka assists sa dihang  ang Houston Rockets midaog sa  Mavericks, 104-97.

Wala sab magpa-alkansi  si Trevor Ariza nga mipabuto og 23 puntos ug ingon man si Chris Paul nga midugang og 12 puntos, pito ka rebounds ug upat ka assists sa Rockets nga mipukan sa Mavs sa ikaunom nga sunod-sunod nga higayon.

Si Wesley Matthews miposa og pito ka tres sa iyang 29 puntos alang sa Mavs nga napilde kapito sa katapusan nilang 10 ka duwa.