GM Sevillano naghari sa Pyroworks chessfest
CEBU, Philippines — Ang mga dekalibreng magduduwa og chess nga gipangulohan sa Sugboanong Grandmaster nga si Enrico ‘Ikong’ Sevillano maoy nanghawod sa Pyroworks Sinulog Open Handicapping Chess Tournament niadtong weekend diha sa Basement 2 sa Robinsons Galleria Cebu.
Si Sevillano nagtabla ug si International Master Kim Steven Yap sa katapusang hugna, apan wala kini nahimo niyang problema gumikan kay siya gihapon ang mibulsa sa P10,000 nga ganti alang sa kampiyon human miposte sa labing taas nga 6.5 puntos ning torneyo nga gipasiugdahan ni chess patron Boojie Lim inabagan sa Cebu Executives and Professionals Chess Association (CEPCA).
Sila si Yap, Rommel Ganzon ug National Master Merben Roque parehong mitali og 6.0 puntos, apan si Ganzon maoy mopahiluna sa ikaduhang puwesto gumikan sa mas taas niyang tie-breaker. Si Yap maoy ikatulo ug gisundan kini ni Roque.
Mipahimutang sa ikaupat hangtod sa ikaunom nga puwesto mao sila si Jethro Esplanada, Ronald Ganzon ug Kaypee Cale bitbit ang 5.5 puntos matag usa.
Naglangkob sa top 14 mao sila si Diego Abraham Caparino, Rafael Sim, Bryle John Arellano, Bonn Rainauld Tibod, Antonio Cabibil, Remegio Galenzoga ug Leo Cortes nga dunay 5.0 puntos.
- Latest
